1Uze'eg wiwi Eriu izupe.
2Izo, emumaw màràn 'ar nereko haw imume'u katu haw hàro pà nehe. Ta'e amume'u putar amo ma'e newe nehe xe, Tupàn ikatu haw hexak kar pà newe nehe xe.
3Akwaw katu ma'e tetea'u ihe. A'e rupi aexak kar putar Tupàn heapo arer ikatu haw newe ihe nehe kury.
4Heremimume'u ràm paw azeharomoete har romo a'e. Newe uze'eg ma'e wiko ma'e kwaw katu har romo azeharomoete a'e.
5Upuner tuwe Tupàn a'e. Nuityk kwaw ni amo wà. Tupàn ukwaw ma'e paw rupi a'e.
6Numuigo wiwi kar kwaw ikatu 'ym ma'e wà. Wereko katu hemetarer 'ym ma'e wà.
7Tupàn uzekaiw katu awa ikatu ma'e wanehe wà. Umuigo kar tuwihawete romo wà. Tuweharupi wiko putar upuner ma'e romo wà nehe.
8Aze umunehew kar amo wà, Aze uzàpixipixi amo ma'erahy kyhàhàm zàwenugar pupe wà nehe,
9Uzapo nezewe haw ta'e a'e awa uzapo ikatu 'ym ma'e a'e wà xe. Uzepyk wanehe, ta'e wiko ikatu 'ym ma'e iapo har romo wà xe, ta'e wiko wera'u ma'e romo wanekon wà no xe.
10Tupàn wenu kar wemimume'u a'e awa wanupe a'e. — Pepytu'u ikatu 'ym ma'e iapo re nehe, i'i wanupe.
11Aze weruzar Tupàn wà, Aze umuwete katu wà, A'e mehe wiko putar zeàmàtyry'ym 'ymaw rehe tuweharupi wà nehe, wemetarer katu pà tuweharupi wà nehe no, te umàno haw 'ar mehe wà nehe.
12Nuzekaiw kwaw Tupàn rehe wà. A'e rupi umàno ma'e ikwaw 'ym pà wà. Uwahaw yrykawhu oho umàno ma'e kwer wapyta haw pupe wixe pà wà.
13Upy'a iaiw ma'e hereko har omonokatu wekwahy haw upy'a pe wà. Tupàn uzepyk wanehe. Nezewe rehe we nuhapukaz kwaw upytywà àwàm henoz pà wà.
14Uzapo iaiw ma'e amo awa wapuhe wà. A'e rupi umàno kwàkwàmo romo wiko mehe we wà.
15Tupàn zanemu'e ma'erahy pupe a'e. Upuraraw kar ma'eahy haw zanewe zanereha imuzawok kar pà.
16Izo. Kwehe mehe Tupàn nepyro ikatu 'ymaw wi a'e. Nemuigo kar ikatu haw rehe. Neràpuz me teko umai'u katu tuweharupi wà.
17Amo 'ar mehe umume'u neremiapo kwer ikatu 'ym ma'e a'e, nerehe uzepyk àwàm imume'u pà a'e. Ko 'ar rehe uzepyk nerehe neremiapo kwer hekuzaromo kury.
18Eme'egatu nehe. Amo umur putar temetarer newe nehe, uwàmàtyry'ymar rehe nezepyk àwàm imekuzar pà nehe. Epyhyk zo a'e temetarer nehe. Aze amo umur temetarer tetea'u newe ikatu 'ym ma'e iapo kar pà newe nehe, ezapo zo nehe, epyhyk zo nehe.
19Aze erehapukaz nepytywà àwàm henoz pà nehe, ni amo nur kwaw wà nehe. Nepuner awer uhua'u ma'e nuzawy kwaw heityk pyrer kury.
20Epyta zo ywy paw imumaw pàwàm hàro pà nehe. A'e 'ar nuzawy kwaw ipytunahy haw nehe.
21Erepuraraw ma'erahy iko ta'e neaiw ne xe. Eme'egatu nehe, ezewyr zo izupe nehe.
22Tupàn ipuner haw uhua'u tuwe a'e. Mo upuner upureruze'egatu haw rehe izàwe wà.
23Ni amo nupuner kwaw ma'e iapo kar haw rehe Tupàn pe wà. — Erezapo ikatu 'ym ma'e ne, nupuner kwaw u'e haw rehe izupe wà.
24Teko ywy nànànar umume'u ikatu haw hemiapo kwer hexak mehe wà. Ne nehe no, emume'u ikatu haw nehe no. Nereharaz zo izuwi nehe.
25Aze zaiko muite izuwi, nezewe rehe we xixak. Tupàn hemiapo ikatuahy zanewe.
26Uhua'u tuwe a'e. Nazapuner kwaw ikwaw paw rehe. Nazapuner kwaw Tupàn i'ar ipapar haw rehe.
27Tupàn umuzeupir kar 'y ywy rehe har a'e, hyru pe a'e. A'e re uzapo a'e 'y àmàn romo ipiripirik ma'e romo.
28Ywàkun uzakook a'e 'y. Ukyr u'ar pà 'y uwyrykahy ma'e romo uzeapo pà ywy rehe.
29Mo ukwaw ywàkun iho haw wà. Mo ukwaw àmàn iànoànogaw ywak rehe har Tupàn henaw pe har wà.
30Tupàn umuhàmuhàz àmàn iweraw paw uzeiwyiwyr. Nezewe rehe we ipytunahy yryhu wy pe.
31Nezewe haw iapo mehe Tupàn umumai'u kar teko wà. Omono temi'u wanupe wanemimutar rupi no.
32Upyhyk àmàn iweraw paw opo pupe. Uzapi wemiapi ràm ipupe.
33Tapi'ak ukwaw àmàn ywytu inuromo har tur àwàm 'ar wà. Ta'e iànoànogaw umume'u tur àwàm wanupe a'e xe.
