Jó 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Àmànuhu umututukahy kar hezà'à. Nuzawy kwaw hepuxi'a wi ipor wer ma'e.

²Ezeapyaka katu Tupàn ize'eg iànoànogaw rehe nehe. Einu iànoànogaw izuru wi uhem ma'e nehe.

³Omomor iweraw haw ywak nànàn, Ywy nànàn heityityk pà no.

⁴Na'e teko wenu ize'eg ikororo mehe wà. Wenu àmàn iànoànogaw wà no. A'e 'ar mehe we iweraw haw nupytu'u kwaw u'ar ire.

⁵Tupàn wànoànog uze'eg ikatuahy ma'e pupe. Uzapo ma'e uhua'u ma'e. Nazapuner kwaw a'e ma'e ikwaw paw rehe.

⁶Tupàn umugyr kar àmàntàtà ywy rehe. Umugyr kar àmànuhu no.

⁷Nezewe mehe teko upyta wàpuz me uma'ereko 'ym pà wà. Nezewe mehe wexak kar a'e ma'e iapo har romo weko haw purupe.

⁸Miar wixe uker haw pe wà. Uzeàmim a'e pe wà.

⁹Àmànuhu ywytu inuromo har ur kwarahy ihemaw awyze har kutyr har wi. Tuixàgaw ur kwarahy heixe haw awyze har kutyr har wi.

¹⁰Tupàn purupy haw umuàtà 'y. Nezewe mehe 'y tàtà upyk yryhu.

¹¹Tupàn umynehem ywàkun 'y pupe. Na'e ywàkun omomor uweraw haw no.

¹²Ywàkun weruzar Tupàn ze'eg. Uhàuhàz ywak rehe. Uzapo Tupàn hemiapo karer wà, Ywak nànàn, ywy nànàn no.

¹³Tupàn umugyr kar àmàn ywy rehe Zanerehe uzepyk pà. Umugyr kar àmàn ywy rehe zaneamutar haw hexak kar pà zanewe no.

¹⁴Izo. Epytu'u nezeapyaka pà nehe kury. Nema'enukwaw ikatuahy ma'e Tupàn hemimutar rehe nehe.

¹⁵Aipo erekwaw Tupàn hemiapo. Uze'eg a'e. Na'e iweraw haw uhem ywàkun wi uhyape katu pà.

¹⁶Ywàkun uzeaiko ywak rehe. Aipo erekwaw wamuzeaiko haw. Tupàn ukwaw katu ma'e paw rupi a'e. Xixak ywàkun izeaiko haw zane. A'e rupi xikwaw Tupàn ikàgaw.

¹⁷Ywytu kwarahy ihemaw awyze har kutyr har wi ur ma'e werur ywyxig tetea'u a'e. Tur 'ym mehe nerakuahy nekamir pupe. Nerepuner kwaw nehemaw rehe a'e ywytu ywyxig inuromo har wi.

¹⁸Nanekàg kwaw ne. Aipo erepuner Tupàn ipytywà haw rehe ywak imuzaiko haw rehe ne, Imuàtà mehe ita imumew pyrer ài ne.

¹⁹Uremu'e pe izupe ureze'eg àwàm rehe nehe. Ta'e nurupuner kwaw ma'e rehe urema'enukwaw katu haw rehe xe.

²⁰Akyze Tupàn wi. A'e rupi naze'egahy kwaw izupe. Namume'u kwaw hemiawy kwer izupe. Nezewe haw iapo haw nuzawy kwaw hemumaw pàwàm henoz taw.

²¹Aze ywàkun upyk kwarahy, nazapuner kwaw hexakaw rehe. Aze ywytu ur ywak imukatu pà, Uhyape wi kwarahy.

²²Kwarahy heixe haw awyze har kutyr har rehe xixak tatainy or hexakaw hereko har. Tupàn ipuràgeteahy haw ipuner haw inuromo har zanemynehem a'e. Xixak tuwe ikatu haw.

²³Nazapuner kwaw Tupàn upuner wera'u ma'e ikwaw paw rehe. Uhua'u ipuner haw. Ikatuahy haw nupaw pixik kwaw. Nuzuka kwaw teko wà.

²⁴A'e rupi teko ukyze izuwi wà. — Aiko ma'e kwaw katu har romo ihe, aze amo i'i, Tupàn nuzekaiw kwaw hehe.