Jó 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wazar Izo waze'eg wanupe kury.

²Azeharomoete peze'eg teko wanekuzaromo. Pemume'u wama'enukwaw paw. Pemàno mehe naheta kwaw ma'e ikwaw katu haw ywy rehe nehe kury.

³Ihe akwaw ma'e ihe no. Napekàg wera'u kwaw ihewi. Mo nukwaw kwaw ko penemimume'u kwer wà.

⁴Hemyrypar upuka herehe wà. Aiko imunar 'ym ma'e romo. Aiko ikatu 'ym ma'e iapo 'ymar romo. Kwehe mehe aze'eg teko Tupàn pe. Uwazar heze'eg ihewe a'e.

⁵Ikàg ma'e uze'eg zemueteahy iaiw haw pupe u'ar ma'e kwer wanehe wà. Umuàzàn u'ar etea'i ma'e ràm wà no.

⁶Imunar ma'e wiko ikatu haw rehe wàpuz me wà. Tupàn henataromo ikatu 'ym ma'e iapo har wikuwe uzemupy'a 'ym pà wà. Wakàgaw uzeapo wazar romo.

⁷Zopar, epuranu wiràmiri wanehe nehe, ma'ea'yr wanehe nehe no. Nemu'e putar ma'e rehe wà nehe.

⁸Eze'eg ma'ea'yr ywy rehe har wanupe, ipira yryhu rupi har wanupe nehe no. Nemu'e putar ma'e rehe wà nehe no.

⁹Tupàn Tuweharupi Wiko Ma'e wiko a'e ma'ea'yr paw wapo arer romo a'e. A'e ma'ea'yr ukwaw heko haw wà.

¹⁰Ma'ea'yr paw waneko haw upyta Tupàn ipo pe. A'e umuigo kar teko paw wanereko wà.

¹¹Hemyrypar wà. Zaneapyakwar wenu amo ze'eg ikatu haw. O wenu ikatu 'ymaw. Zaneapeku ukwaw zaneremi'u ikatu haw. Nezewegatete azeapyaka katu penemimume'u rehe. — Azeharomoete, aze a'e izupe, xo a'e mehe zo azeruzar hehe.

¹²Tua'uhez ma'e wiko ma'e kwaw katu har romo wà. Ta'e tua'uhez haw werur ma'e kwaw paw purupe xe.

¹³Tupàn ukwaw katu ma'e a'e. Upuner katu no. Heta ma'e kwaw katu haw hehe. Ukwaw ma'e a'e.

¹⁴Aze Tupàn weityk ma'e, ni amo nupuner kwaw a'e ma'e iapo wi haw rehe wà. Aze upyhyk ma'e, ni amo nupuner kwaw imuhem kar haw rehe izuwi wà.

¹⁵Aze Tupàn umupytu'u kar àmàn ikyr ire, uxinig ywy a'e. Aze umuhem kar 'y, Tynehem ywy 'y pupe.

¹⁶Tupàn ikàg a'e, weityk wàmàtyry'ymar wà no. Aze amo imunar amo ma'e rehe, Tupàn ikàg wera'u imunar ma'e wi a'e. Ikàg wera'u a'e ma'e izarer wi no.

¹⁷O'ok ma'e kwaw katu haw tuwihaw wanuwi. Umuigo kar tuwihaw awa iranaiw ma'e romo wà no.

¹⁸Tupàn o'ok tuwihawete wanenaw wi a'e wà, Wamono pà zemunehew paw pe wà.

¹⁹Tupàn umunyryk kar xaxeto wama'ereko haw wi wà. Weityk upuner ma'e wà no.

²⁰Tupàn umupytu'u kar pureruze'eg ma'e waze'eg ire wà. Umumaw tua'uhez wama'ekwaw katu haw wanuwi no.

²¹Nuwereko katu kwaw tuwihaw wà. Umumaw wapuner haw upuner ma'e wanuwi no.

²²Tupàn wexak kar ma'e imim pyrer ipytunahy haw pupe har a'e. Umuhyape katu kar tatainy ipytunaw rehe no.

²³Tupàn umuhua'u teko imono'og pyrer ywy rehe har wà. Omono wapuner haw wanupe no. A'e re weityk a'e teko wamumaw pà wà.

²⁴Umue'o kar teko wanuwihaw wà. Weraha ywyxiguhu rehe pe heta 'ymaw rupi no.

²⁵Wata ipytunahy haw rupi ma'e hexak 'ym pà. Uzepyapi oho waiko uka'u ma'e ài wà.