Jó 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Aipo erekwaw àràpuhàrànetea'yr hehaite ma'e wazexak kar haw 'ar. Aipo erexak arapuha kaiwer pe har izexak kar mehe.

²Màràn zahy umumaw wahy waneraha pà wie pupe. Aipo erekwaw. Ma'e 'ar mehe imemyrzexak kar wà. Aipo erekwaw.

³Màràn mehe uwezyw wà umemyrzexak kar pà wà, Umemyr ko ywy rehe wanerur pà wà. Aipo erekwaw.

⁴Wamemyr itua'u ikàg ma'e romo kaiwer pe wà. A'e re oho wà, nuzewyr kwaw wà.

⁵Mo umuhem kar zumen hehaite ma'e wazar wi wà. Mo umuata kar wanemimutar rupi wà, wazar imono 'ym pà wanupe wà.

⁶Amono ywyxiguhu wanupe waneko haw romo ihe wà. Amuigo kar ywy xa heta haw rehe wà.

⁷Nuputar kwaw tawhu iànoànogaw wà. Ni amo nupuner kwaw wazar romo weko haw rehe wà. Ni amo nupuner kwaw ma'e heraha kar haw rehe wakupe pe wà.

⁸U'u ka'api'i ywytyruhu rehe wà. Wekar wyzài ka'akyr wemi'u ràm romo a'e pe wà.

⁹Aipo amo tapi'ak hehaite ma'e ima'ereko wer putar newe nehe. Aipo uker putar pyhaw nereimaw wapyta haw pupe pàrirogaw pupe.

¹⁰Aipo erepuner iàpixipixi haw rehe kyhàhàm pupe ywy iwykawyka kar haw rehe izupe. Aipo umutyk putar ywy iwykawyka pà newe nehe. Aipo umutyk putar ywy kàràz taw newe nehe.

¹¹Aipo erepuner ikàgaw uhua'u ma'e rehe nezeruzar haw rehe. Aipo a'e ae uzapo putar nema'ereko haw ipuhuz ma'e newe nehe.

¹²Aipo werur putar arozràn neremimono'og ràm no. Aipo umuapyteràkwà arozràn imono'og pà newe.

¹³Wiranu uzepepopetepetek e na'arewahy a'e. Nezewe rehe we nuwewe kwaw hoko ài.

¹⁴Wiranu upi'amomor ywy rehe. Nezewe mehe ywyxiguhu haku ma'e umuaku a'e.

¹⁵— Aze ru'u amo upyrog putar herupi'a rehe nehe, ni'i pixik kwaw uzeupe. — Amo miar hehaite ma'e upuner ika haw rehe nehe, ni'i kwaw uzeupe.

¹⁶— Naiko kwaw a'e ma'e rupi'a izar romo ihe, i'i ru'u uzeupe. Amo upuner hemiapo kwer imuaiw paw rehe wà. Nezewe rehe we nuzekaiw kwaw hehe.

¹⁷Ihe amuigo kar wiranu iranaiw ma'e romo ihe. Namono kwaw ma'e kwaw katu haw izupe.

¹⁸Nezewe rehe we uzàn mehe uzàgatu na'arewahy a'e. Upuka wyzài kawaru rehe, wyzài kawaru kupe pe har rehe.

¹⁹Izo. Aipo ne kawaru eremuigo kar ikàg ma'e romo ne wà. Aipo eremupuràg eteahy kar kawaru iatuwa i'aw imono pà hehe.

²⁰Opoopor tukur ài wà. Aipo ereiko wamopor kar har romo ne. Teko ipytuhegatu waze'eg mehe. Aipo ereiko wamuze'eg kar har romo.

²¹Iho wer wà, a'e rupi uzehàwykàwykàz ywy rehe opo pupe wà. Uzàn oho zeàmàtyry'ymawhu pe ukàgaw nànàn wà.

²²Nukyze kwaw wà. Ni amo ma'e numukyze kar kwaw wà. Takihepuku numuzewyr kar kwaw wà.

²³U'yw upepoze'egahy wa'aromo ukwaw mehe wà. Purukutukaw wà, u'ywpuku wà no, heny katu wanenataromo wà no.

²⁴Uryryryryz wà, ta'e iho wer na'arewahy wà xe. Na'e uhem oho uzàn pà wà. Xi'àm ma'e 'ak kwer iapo pyrer ipy mehe nupuner kwaw upytu'u haw rehe wà.

²⁵Uwazar xi'àm ipy haw uze'eg pupe wà. Muite wi wetun zeàmàtyry'ymawhu wà. Wenu zauxiapekwer wanehapukaz taw wà no. Wenu tuwihaw wà no, zauxiapekwer wanupe ma'e iapo kar mehe wà no.

²⁶Aipo ne eremu'e kàkà iwewe haw rehe. Upepozaz kwarahy ihemaw awyze har kutyr uwewe pà. Aipo eremu'e a'e ma'e rehe.

²⁷Aipo ereiko wiràhu izar romo. Aipo wàro neze'eg waity ywate har iapo 'ym mehe.

²⁸Wiko ita ywate wera'u ma'e rehe. Ywate itahu i'aromo uzapo waity ikatu 'ymaw wi imonokatu pyr.

²⁹A'e pe wiko mehe wexak wemiar ràm wemipyhyk ràm. Heha wexak ma'e muite har.

³⁰Aze amo miar umàno, wiràhu uzemono'og a'e pe wà. Imemyr u'u huwykwer wà.