1Aexak a'e ma'e paw hereha pupe ihe. Aenu heapyakwar pupe no. Aenu katu ikwaw pà.
2Hemyrypar wà. Napeiko kwaw ihewi ikàg wera'u ma'e romo. Akwaw penemigwaw.
3Heze'eg wer Tupàn upuner wera'u ma'e pe. Hepurumume'u wer heremiapo kwer rehe izupe.
4Penemu'em pema'ekwaw 'ymaw imim pà. Peiko muhàg kwaw par teko imukatu 'ymar ài.
5A. Aze mo pepytu'u peze'eg ire, — Ma'ekwaw katu har, i'i mo teko peme wà.
6Peinu heremiapo kwer imume'u àwàm nehe kury. Pezekaiw heze'eg rehe nehe no.
7Aipo penemu'em putar Tupàn ipyro pà nehe. Pemume'u putar temu'emaw ipyro pà nehe.
8Aipo peiko putar huwake nehe, heruwake 'ym nehe. Aipo pemume'u putar ikatu haw tuwihaw wanenataromo nehe.
9Aze upuranu penehe nehe, aipo ikatu putar nehe. — Zaneremu'em teko wanupe. Nezewegatete Tupàn pe nazapuner kwaw zaneremu'emaw rehe no.
10Aze napekatu kwaw nehe, te pekatu 'ymaw iàmim pà nehe, Nezewe mehe we uzepyk putar penehe nehe.
11Tupàn uhua'u haw umynehem putar wakyze haw pupe a'e wà nehe. Ipurumukyzeahy haw u'ar putar penehe nehe.
12Pema'enukwaw ze'eg kwehe arer rehe. Nuzawy kwaw tanimuk. Xityk imono. Tàpuz ipywahy ma'e nupurupyro kwaw zauxiapekwer wanuwi. Peiko tàpuz ywyzuwa iapo pyrer ài. Napekàg kwaw.
13Peze'eg zo kury. Aze'eg putar kury. Wyzài ma'e izeapo mehe aze'eg putar kury.
14Nakyze kwaw hemàno àwàm wi. Azemuàgà'ym hemàno àwàm rehe.
15Naheta kwaw ma'e hàrogatu haw ihewe kury. Ta'e Tupàn hezuka putar nehe xe. Nezewe rehe we amume'u putar hekatu haw henataromo nehe.
16Aze ru'u hekyze 'ymaw hepyro putar nehe. Ta'e ni amo teko ikatu 'ym ma'e noho kwaw Tupàn henataromo wà xe.
17Herenu katu pe heze'eg mehe nehe. Pezeapyaka hema'emume'u haw rehe nehe.
18Azemuàgà'ym hekatu haw imume'u àwàm rehe. Akwaw hekatu haw.
19Ni amo nupuner kwaw ma'e imume'u haw rehe tuwihaw wanenataromo herenataromo wà, aze i'i Tupàn ihewe nehe, A'e mehe apytu'u putar heze'eg ire nehe, hemàno pà nehe.
20O Tupàn, xo mokoz ma'e zo ainoz newe. Nezewe mehe nazeàmim kwaw newi nehe.
21Erezepyk iko herehe. Epytu'u kury. Epytu'u hemukyze kar ire.
22O Tupàn, aze herenoz pe nerenataromo nehe, awazar putar neze'eg nehe. Aze ru'u ihe ràgypy aze'eg putar. Na'e erewazar putar heze'eg nehe.
23Màràn haw rupi azawy. Màràn ikatu 'ym ma'e azapo. Ma'enugar heremiawy kwer eremume'u iko. Ma'enugar heremiapo kwer ikatu 'ym ma'e eremume'u iko.
24Màràzàwe tuwe erezeàmim ihewi. Màràzàwe tuwe herereko pe neàmàtyry'ymar ài.
25Aiko ka'a huwer ywytu hemiraha zàwe ihe. Màràzàwe tuwe hemukyze kar pe ne. Nazawy kwaw pino uxinig ma'e. Màràzàwe tuwe nepurupuraraw kar wer ma'erahy rehe ihewe.
26Eremuapyk heremiapo kwer iaiw ma'e pape rehe. — Nepurumekuzar kar wer heremiapo kwer ikatu 'ym ma'e hekwàkwàmo mehe arer rehe ihewe.
27Erezàpixipixi hepy iko kyhàhàm tàtà ma'e pupe. Ereme'egatu heata haw nànàn. Ereme'e hepypor pe rupi heremizar nànàn no.
28Nezewe mehe apaw aha iteko ywyra kupi'i hereko har ài. Nazawy kwaw kamir yhok tetea'u wanemi'u kwer no.
