Jó 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Na'e Minaz Xuwa ywy rehe har uze'eg a'e kury.

²Màràn 'ar eremumaw putar nezewe neze'eg pà nehe, Izo. Màràn 'ar neze'eg umumaw putar ywytuhu iawy 'ym pà nehe.

³Aipo Tupàn umuaiw ukatu haw. Aipo upuner wera'u ma'e uzapo ma'e ikatu 'ym ma'e.

⁴Azeharomoete nera'yr uzapo ikatu 'ym ma'e Tupàn henataromo wà. A'e rupi uzepyk wanehe ta'e ikatu wanehe izepykaw izupe xe.

⁵Ezewyr Tupàn pe kury. Eze'eg Upuner Wera'u Ma'e pe nehe.

⁶Aze nekatu azeharomoete, aze ereiko imunar 'ym ma'e romo, Tupàn ur putar na'arewahy nepytywà pà nehe. Umur wi putar nereko haw newe nehe, ta'e nekatu tuwe ne xe.

⁷Nanema'enukwaw tetea'u kwaw ma'e newi upaw ma'e kwer wanehe nehe. Ta'e Tupàn umur wi putar ma'e tetea'u newe a'e wà nehe no xe.

⁸Epuranu tua'uhez ma'e wanehe nehe. Ezemu'e neipy wanemiapo kwer rehe nehe no.

⁹Ta'e zazexak kar karumehe zane xe. Naxikwaw pixik kwaw ma'e zane. Zane'ar ywy rehe har upaw ma'e i'àgaw ài.

¹⁰Tuwe tua'uhez ma'e uze'eg newe nemu'e pà wà nehe. Uze'eg putar nezewe newe uzeapo ma'e kwer rehe wà nehe.

¹¹Aipo wywàràn upuner hezuz haw rehe muite 'y wi. Aipo ka'api'i popok upuner utua'u haw rehe 'y heta 'ymaw pe.

¹²Ikyr katu a'e. Nezewe rehe we imonohok 'ym mehe we uxinig a'e, Amogwer ka'a ixinig 'ym mehe we a'e.

¹³Nezewegatete haw uzeapo teko Tupàn wi heharaz ma'e wanupe no. Nezewegatete ikatu 'ym ma'e wama'eràrogatu haw uxinig wanuwi no.

¹⁴Waneko haw ikatu haw nuzawy kwaw inemu'i. Wazeruzar haw nuzawy kwaw zanu ikyhaw.

¹⁵Wapyk ikyhaw rehe wà. Owok wanuwi. Upyhyk inemo wà. Nupuner kwaw upu'àmaw rehe wà.

¹⁶Ikatu 'ym ma'e itua'u ka'a kwarahy rehe har ài wà. Uhàuhàz ma'etymaw nànàn wà.

¹⁷Wanapo umàumàn ita wà. Upyhyk itahu wà.

¹⁸Nezewe rehe we aze amo ozo'ok nehe, Ni amo nukwaw kwaw a'e pe waneko awer wà nehe.

¹⁹Nezewe ikatu 'ym ma'e waneko haw upaw. Amo teko uhem wanekuzaromo wiko pà wà.

²⁰Azeharomoete Tupàn nuityk kwaw teko imunar 'ym ma'e wà. Nomono kwaw opo ikatu 'ym ma'e wanupe wapytywà pà.

²¹Nemupuka wi kar putar a'e nehe. Erehapukaz putar nerurywete romo nehe no.

²²Neàmàtyry'ymar wiko putar maranugar haw rehe wà nehe. Amo weityk putar ikatu 'ym ma'e wanàpuz wà nehe no.