Jó 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹A'e awa umumaw uze'egaw a'e kury. Na'e, ywytu àmànuhu herur har inuromo, Tupàn uwazar Izo ize'eg wà izupe kury.

²Nerekwaw kwaw ma'e ne. Neze'eg awer wexak kar ikwaw 'ymaw ihewe. Mo romo ereiko. Màràzàwe tuwe nerezeruzar kwaw hema'ekwaw katu haw rehe.

³Exak kar nekàgaw ihewe nehe kury. Ewazar newe hepuranu àwàm ihewe nehe no.

⁴Kwehe mehe azapo ywy ihe. Ma'e pe ereiko a'e 'ar mehe. Aze ereiko ma'e kwaw katu har romo, emume'u ko ma'e ihewe nehe.

⁵Mo umume'u ywy uhua'u àwàm a'e. Aipo erekwaw. Mo uzapo ywy uhua'u ma'e romo. Aipo erekwaw.

⁶Ma'e i'aromo u'àm ywy izyta wà. Mo omono itahu ipy ywy iwy pe har henaw pe.

⁷Ma'e paw iapo awer 'ar mehe zahytata uzegar uzeinuinuromo wà. Tupàn pe uma'ereko ma'e ywate har uhapukaz urywete haw rehe wà no.

⁸'Y uhem ywy wi kwarer uhy hie wi uhem ma'e ài yryhu romo uzeapo pà a'e. Mo uwàpytym hukenawhu zàwenugar imupytu'u kar pà i'ar mehe.

⁹Ihe apyk yryhu ywàkun pupe ihe. Azuwàzuwàn ipytunaw pupe no.

¹⁰Amume'u iho àwàm izupe. Awàpytym hukenawhu zàwenugar iwàpytygatu haw pupe.

¹¹Na'e aze'eg izupe. — Erehem putar te xe nehe. Ehem zo xe wi nehe. 'Ykotok nerehe har upytu'u putar xe nehe, a'e izupe.

¹²Izo. Aipo amo 'ar mehe nereko mehe eremur kar ku'emaw ne. Aipo eremuhem kar kwarahy amo 'ar mehe.

¹³Aipo amo 'ar mehe eremuhàmuhàz tatainy ywy rehe. Aipo nezewe haw iapo mehe eremutuhug iaiw ma'e ne wà, Wazeàmimaw wi wamuhem kar pà ne wà.

¹⁴Tatainy 'aromo uhyape ma'e wexak kar ywytyruhu hexakaw. Wexak kar ywyàpyznaw hexak haw no. Nuzawy kwaw topoz izekanapaw. Nuzawy kwaw ter kwàku'aw har hemimuapyk kwer ywyzuwa rehe har no.

¹⁵A'e tatainy uhyape katu wera'u iaiw ma'e wanupe. Teko wexak wanemiapo wà, a'e rupi a'e iaiw ma'e wà, nupuner kwaw puruzuka haw rehe a'e tatainy rehe wà.

¹⁶Izo. Aipo erexak 'ytyzuzàmaw yryhu imynehemar. Yryhu ohoete a'e. Aipo ereata eho iwy pe.

¹⁷Aipo amo wexak kar umàno ma'e kwer wapyta haw hukenawhu newe wà. Heta ipytunaw upaw 'ym ma'e a'e pe.

¹⁸Aipo erekwaw ywy iànàmaw. Aze erekwaw ko ma'e paw rupi, ewazar heze'eg ihewe kury.

¹⁹Ma'e wi tatainy tur a'e. Ma'e wi ipytunaw tur no.

²⁰Aipo erekwaw waho àwàm hexak kar haw rehe wanupe. Aipo a'e re erepuner wamuzewyr kar haw rehe wahem awer pe ne wà nehe.

²¹Erepuner ikwaw paw rehe ne. Ta'e netua'uhez ne xe. Ywy iapo 'ym mehe we erezexak kar.

²²Amonokatu àmàn huwixàg ma'e amo me ihe. Amonokatu àmàntàtà a'e pe no. Aipo amo 'ar mehe ereho wamonokatu awer pe.

²³Amonokatu a'e àmàn ihe. Ma'erahy ipuraraw paw 'ar mehe amugyr kar a'e àmàn. Amugyr kar zeàmàtyry'ymaw 'ar mehe, zeàmàtyry'ymawhu 'ar mehe no.

²⁴Aipo amo 'ar mehe ereho kwarahy ihemaw pe. Aipo ereho ywytu kwarahy ihemaw wi ur ma'e ihemaw pe.

²⁵Mo uwàpytymawok ikyr haw àmànuhu pe. Mo wexak kar ywytu àmànuhu inuromo har iho àwàm izupe.

²⁶Mo umugyr kar àmàn ywyxiguhu rehe, Teko heta haw 'ym rehe.

²⁷Mo omono 'y ywy uxinig ma'e rehe, teko heta haw 'ym rehe, Ka'api'i imuezuz kar pà hehe.

²⁸Aipo heta tu àmàn pe. Aipo heta tu zuwiri pe.

²⁹Mo wiko 'y tàtà ihy romo. Mo wiko zuwiri tàtà ihy romo.

³⁰Mo uzapo 'y ita romo. Mo upyk yryhu 'y tàtà pupe.

³¹Aipo erepuner zahytata 7 àràpuhàràna'i her ma'e waàpixipixi haw rehe. Aipo erepuner kyhàhàm tàtà na'iruz zahytata uzeake ma'e waàpixi haw ikwaraw paw rehe.

³²Aipo erepuner zahytata xigatu ma'e hexak kar haw rehe. Aipo erepuner zahytata zàwàruhu uxu uhua'u ma'e her ma'e rehe har wamono kar haw wanape rupi. Aipo erepuner zahytata zàwàruhu uxu pixika'i ma'e her ma'e rehe har wamono kar haw wanape rupi.

³³Aipo erekwaw Tupàn ze'eg ywak rehe har waneruze'egar. Aipo erekwaw a'e Tupàn ze'eg heruzar kar haw rehe ywy rehe har wanupe.

³⁴Aipo neze'eg upuner ywàkun pe uhemaw rehe. Aipo upuner àmàn tetea'u imugyr kar haw rehe nezepyk kar pà typy haw pupe.

³⁵Aipo erepuner iweraw haw hexak kar haw rehe. — Uruiko neremiruze'eg romo, aipo i'i a'e iweraw haw newe.

³⁶Mo omono ma'e kwaw paw wiràmiri wanupe. Mo omono ma'e kwaw paw wiràmiri iwi her ma'e pe. Umume'u Niru yrykawhu tyhu àwàm purupe a'e. Zapukaz uze'eg àmàn ikyr 'ym mehe a'e.

³⁷Mo upuner ywàkun wapapar haw rehe. Mo upuner izi'y izakookaw rehe àmàn romo.

³⁸A'e 'y uzapo ywyku'i to'om romo. Omono'og to'om imuàkym pyrer hehe we.

³⁹Zàwàruhu iriàw kuzà uzeàmim weko haw pupe wà. Uzeàmim ka'a pupe wemiar ràm hàro pà wà. Aipo eremono temi'u wanupe. Aipo eremono wanemi'u ràm zàwàruhua'yr wanupe.

⁴¹Zàpuun wata ko rupi kwe rupi uma'uhez pà wà. Wamemyr uze'eg wemi'u ràm henoz pà wà. Mo opoz wama'uhez mehe wà.