Jó 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Izo uze'eg putar a'e nehe kury.

²Aze mo apuner hezewyr haw rehe hereko awer pe. Tupàn uzekaiw katu herehe a'e 'ar mehe.

³A'e 'ar rehe Tupàn wexak kar herape ràm ihewe. Nuzawy kwaw tatainy ihewe. A'e rupi apuner ipytun mehe heata haw rehe.

⁴A'e 'ar rehe hekàg hema'eahy 'ym pà. Tupàn wiko hemyrypar romo a'e. Hemyrypar romo heko haw wiko heràpuz rehe uzekaiw katu ma'e romo.

⁵Tupàn upuner wera'u ma'e wiko herehe we a'e. Hera'yr wiko heywyr wà.

⁶Heta tapi'ak kamykwer heràpuz me tuweharupi. Uhyk urewe. Heta ma'e ikawer uri ita wamyter pe hezuz ma'e kwer wi henuhem pyrer no.

⁷Tàmuz wazemono'ogaw pe heho mehe, Apyk tenà'àg wamytepe.

⁸Kwàkwàmo uwàpytymawok heho àwàm herexak mehe wà. Tua'uhez ma'e upu'àm herexak mehe wà no.

⁹Teko ikàg wera'u ma'e upytu'u uze'eg ire wà. Nuze'eg kwaw ta'e akwaw wanuwake ihe xe.

¹⁰Tuwihaw upytu'u uze'eg ire wà no. Numume'u kwaw amo ma'e wà.

¹¹Heze'eg henu arer umume'u heze'eg awer ikatu haw ihewe wà. Herexak arer uze'egatu herehe wà no.

¹²Ta'e apytywà hemetarer 'ym ma'e ihe wà xe, aze wenoz upytywà haw ihewe wà. Azekaiw katu tu 'ym ma'e wanehe no, aze naheta kwaw wanehe uzekaiw ma'e.

¹³Teko ma'e hereko 'ymar umur uze'egatu herehe wà. Kuzà imen umàno ma'e kwer hurywete wà, ta'e apytywà ihe wà xe.

¹⁴Hekatu haw ihe, hemunar 'ymaw ihe no, amunehew kamir ài ihe. Nuzawy kwaw hekamir tuweharupi har ihewe.

¹⁵Aiko teha romo hehàpyhà 'ym ma'e wanupe. Aiko pe romo wata 'ym ma'e wanupe no.

¹⁶Aiko hemetarer 'ym ma'e wanu romo. Aiko amo ywy rehe arer wapyro har romo no.

¹⁷Amumaw imunar ma'e wapuner haw. Apyro wanemipyhyk kwer wà no, wapoàpe wi wà no.

¹⁸Nezewe aze'eg hezeupe. — Amumaw putar kwarahy tetea'u ihe nehe. Àmàno putar heràpuz me katu haw inuromo nehe.

¹⁹Aiko putar ywyra ài ihe nehe, hapo 'y pe uhem ma'e ài nehe. Tuweharupi zuwiri umuàkym ywyra pyhaw. Aiko ywyra zàwe ihe.

²⁰Teko paw uze'egatu herehe wà. Nuexak kwaw katu 'ymaw herehe wà. Tuweharupi hekàg putar nehe. Hepuruapo wer ma'e tetea'u rehe nehe, a'e hezeupe a'e mehe.

²¹Teko paw ume'e herehe wà. Wenu hepureruze'egaw uze'eg 'ym pà wà.

²²— Neremu'em, ni'i kwaw ni pitài teko heze'eg pawire wà. Heze'eg wixe waàkàg pupe. Nuzawy kwaw 'y ywyxiguhu rehe upiripirik ma'e.

²³Teko wàrogatu àmàn kwarahy haku mehe wà. Nezewegatete paw rupi wàrogatu heze'eg wà.

²⁴Àro kar ma'e ma'e hàro 'ymar wanupe ihe. Herurywete ihe, a'e rupi heruwa umukàg kar teko wà.

²⁵Aiko wanuwihaw ài. Aiko tuwihaw teko wanemiapo ràm imume'u har ài. Aiko tuwihawete zauxiapekwer wanenataromo har ài wanupe no. Ma'erahy ipuraraw mehe amurywete kar ihe wà.