Jó 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Izo uze'eg putar a'e nehe kury.

²— Aze pezeapyaka katu heze'eg rehe nehe, Hemurywete kar putar pe azeharomoete nehe.

³Heze'eg mehe peàro nehe. Imumaw mehe pepuner herehe peze'eg urywahyahy haw rehe nehe.

⁴Naze'eg zemueteahy kwaw teko wanehe. A'e rupi naàrogatu kwaw ma'e.

⁵Aze peme'e herehe nehe, Pemono putar pepo pezuru pupe pepytuhegatu pà nehe.

⁶Uzeapo ma'e kwer rehe hema'enukwaw mehe, Akyze katu ihe. Heretekwer uryryryryz paw rupi.

⁷Màràzàwe tuwe ikatu 'ym ma'e wikuwe wiwi wà. Màràzàwe tuwe hemetarer ma'e uhem utua'uhez haw pe wà.

⁸Heta wana'yr wanupe wà. Heta wanemimino wanupe wà no. Wiko izywyr watua'u mehe wà. Wexak waneko katu haw.

⁹Nuzeapo kwaw ikatu 'ym ma'e wanàpuz me waànàm wanupe. Tupàn nuzepyk kwaw wanehe.

¹⁰Waneimaw tapi'ak imemyr katu tetea'u wà. Wamemyr numàno kwaw uzexak kar mehe wà.

¹¹Wana'yr uzàn àràpuhàràna'yr ài wà. Opoopor urywete haw rehe wà.

¹²Uzegar uzemaraz pà wà. Umupu imupu pyr wà: iapu'a ma'e, wioràwiràn, xi'àm.

¹³Ikatu 'ym ma'e umumaw ukwarahy temetarer tetea'u inuromo wà. Umàno zeàmàtyry'ym 'ymaw rehe ma'erahy ipuraraw 'ym pà wà.

¹⁴Uze'eg nezewe Tupàn pe wà. — Etyryk urewi nehe. Na'urepurukwaw wer kwaw neze'eg rehe.

¹⁵— Tupàn upuner wera'u ma'e, peze izupe. Mo romo hekon a'e. Màràzàwe tuwe urumuawate putar nehe. Aze uruze'eg izupe nehe, ma'e uzapo putar urewe nehe, i'i wà.

¹⁶Ikatu 'ym ma'e uze'eg nezewe wà. — Uruma'ereko tetea'u ure. A'e rupi urereko haw ikatu, i'i wà. Wama'enukwaw paw na'ikatu kwaw ihewe.

¹⁷Aze naxiputar kwaw tatainy, ximuwew. Màràn mehe Tupàn umuwew putar iaiw ma'e waneko haw wanuwi nehe. Màràn haw amo u'ar iaiw haw pupe. Aipo amo 'ar mehe Tupàn wikwahy ma'erahy ipuraraw kar pà wanupe.

¹⁸Ma'e 'ar mehe umuhàmuhàz ka'akyr ài wà. Ma'e 'ar mehe ywytu weraha ywyku'i kwer ài a'e. Ma'e 'ar mehe Tupàn weraha ikatu 'ym ma'e nezewe a'e wà.

¹⁹Tupàn uzepyk ikatu 'ym ma'e ta'yr wanehe a'e, Tu hemiapo kwer ikatu 'ym ma'e hekuzaromo a'e, peze. Aze mo uzepyk tu rehe, ikatu wera'u mo. Nezewe mehe mo nuzapo wi kwaw a'e ma'e.

²⁰Tuwe Tupàn uzepyk ikatu 'ym ma'e iapo har rehe nehe. Tuwe nuzepyk kwaw amo rehe nehe. Tuwe a'e ae upuraraw Tupàn upuner wera'u ma'e ikwahy haw nehe.

²¹Aze wiko umàno ma'e kwer romo, aze wiko umàno ma'e kwer wapyta haw pe oho ma'e kwer romo, Aze iànàm wikuwe ma'e upuraraw ma'erahy hekuzaromo wà nehe, Nuzekaiw kwaw wanehe nehe.

²²Aipo amo upuner Tupàn upuner wera'u ma'e imu'e haw rehe amo ma'e rehe wà. Te ywak rehe har wanemiapo kwer umume'u a'e. Uzepyk ikatu 'ym ma'e wanehe.

²³Amo awa wiko urywete pà wà. Ikatu 'ym ma'e nuzeapo kwaw wanupe. Hemetarer katu umàno mehe wà.

²⁴Na'ima'eahy pixik kwaw wà. Tynehem ukàgaw pupe wà no.

²⁵Amo awa nuiko kwaw wazàwe wà. Ni pitài haw nahurywete kwaw wà. Wapy'a tynehem iro haw pupe wamàno mehe wà.

²⁶Màràmàràn umàno wà. Waànàm uzutym wanetekwer wà. Merua'yr upyupyk wanetekwer wà.

²⁷Akwaw pema'enukwaw paw ihe. — Ikatu 'ym ma'e iapo har, peze peiko ihewe.

²⁸Pepuranu pezehezehe. — Ma'e pe oho a'e awa upuner ma'e hàpuz. Wiko ikatu 'ym ma'e iapoapo pà a'e, peze peiko.

²⁹Aipo napeze'eg pixik kwaw teko wata ma'e wanupe. Aipo napeinu pixik kwaw wama'emume'u haw.

³⁰Nezewe i'i a'e teko wà. — Tupàn ikwahy mehe teko wanehe izepyk mehe, Awa ikatu 'ym ma'e uzepyro izuwi wà.

³¹Ni amo numume'u kwaw wanemiapo kwer ikatu 'ym ma'e wà. Ni amo numekuzar kar kwaw wanemiapo kwer wanupe wà.

³²Iànàm weraha hetekwer tewypaw pe wà. Omonokatu hetekwer itymaw ikatu ma'e pupe wà.

³³Teko tetea'u oho tywypaw pe hetekwer heraha har wanupi wà. Te ywy hetekwer imimaw ipiruahy a'e.

³⁴Hemyrypar wà, peze'eg nahemurywete kar kwaw. Penemu'em peze'eg mehe.