Job 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Inge, Job, lohng akwoya Ma nukewa nga ac fahk nu sum uh.

²Nga akola in fahk ma oan in nunak luk uh.

³Kas luk inge nukewa ma ke nunak na pwaye luk, Ac nga ac kaskas na pwaye nu sum.

⁴Ngun lun God pa oreyula, ac ase nu sik moul.

⁵“Topukyu kom fin ku. Akoela kas in alein lom an.

⁶Nga kom oana sie ye mutun God, Kut kewa orekla ke fohk kle.

⁷Ke ma inge wangin sripa kom in sangeng sik; Nga ac tia funmweti kom.

⁸“Pa inge ma nga lohng kom fahk ah:

⁹Kom fahk mu, ‘Wangin ma koluk luk; wangin ma sufal nga orala. Nga nasnas ac wangin mwetik.

¹⁰A God El sifacna sokak sripa lal in akkeokyeyu, Ac oreyu oana sie mwet lokoalok lal.

¹¹El kapriya niuk ke mwe kapir, Ac tawi mukuikui nukewa luk.’

¹²“Tuh nga fahk nu sum Job, kom tafongla. God El fulat liki kutena mwet.

¹³Efu ku kom akkolukye God Ac fahk mu El tiana topuk tukak lun mwet uh?

¹⁴God El ne kaskas na kaskas, A wanginna mwet lohang nu ke ma El fahk uh.

¹⁵Ke mwet uh ac motul ke fong uh, God El ac sramsram nu selos ke mweme ac oayapa ke aruruma.

¹⁶El oru elos in lohng ma El fahk, Ac elos sangeng ke kas in sensenkakin lal nu selos uh.

¹⁷God El kaskas in tuh kutongya orekma koluk lalos Ac in molelosla elos in tia inse fulat.

¹⁸El ac fah tia lela in kunausyukla elos; El molelos liki misa.

¹⁹God El aksuwosye sie mwet ke El sang mas nu sel Ac nwakla manol ke waiok.

²⁰Sie mwet mas ac srungala mongo, Finne mongo ma arulana yu, a ac akkolukye ikwal.

²¹Manol ac srila nwe Kom ac ku in liye sri nukewa kacl uh;

²²Ac tia paht el ac som nu in facl sin mwet misa.

²³“Sahp ac oasr lipufan tuku kasrel — Sie sin lipufan tausin lun God, Su akesmakinye mwet uh ke ma kunalos.

²⁴Ke sripen pakomuta lal, lipufan sac ac fahk, ‘Fuhlella, El ac tia som nu in facl sin mwet misa. Pa inge molin aksukosokyal uh.’

²⁵Manol ac fah sifil fusri, ac kui;

²⁶Ke el pre, God El ac fah topkol; El ac fah alu nu sin God ke engan; God El ac fah oru tuh ma nukewa in sifil wola nu sel.

²⁷El ac fahk ye mutun mwet uh, ‘Nga orekma koluk. Nga tia oru ma wo, tusruktu God El sruokyuwi na ac tia sisyula.

²⁸El sruokyuwi tuh nga in tia som nu in facl sin mwet misa, Ac inge nga srakna moul.’

²⁹“God El nuna oru na ouinge pacl nukewa;

³⁰El ac molela moul lun sie mwet Ac sang nu sel tuh elan arulana engan lah el moul.

³¹“Inge, Job, porongo ma nga fahk uh; Misla ac lela ngan kaskas.

³²Tuh fin oasr ma kom lungse fahk, kom fahk nga in lohng; Fin tuh pwaye ma kom fahk an, nga fah insewowo in fahk mu pwaye sum.

³³A fin wangin ma kom ac fahk, kom misla ac porongeyu, Ac nga ac fah luti nu sum in lalmwetmet.”