Job 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Ilaihu bin kipgon tok, “Job yu lisin langa mi du. Ai garram brabli gudwan wed blanga dalim yu.

²Ebrijing mi dalimbat yu im trubala. Ai nomo trikimbat yu.

⁴Det spirit blanga God bin meigim mi en gibit mi laif.

⁵Yu ensim langa mi, if yu wandim tok enijing.

⁶God bin meigim yunmi mijamet brom graun, en yunmi jidan lebul.

⁷Wal yu nomo bradin langa mi en langa wanim ai mait dum.”

⁸Wal Ilaihu bin kipgon tok, “Wal aibin irrim wanim yubin tok. Yu reken yu nomo bin dum enijing rong, en yu reken yu jidan friwan brom eni nogudbala ting.

¹⁰Bat yubin tok, ‘God bin meigim mi jidan im enami na,

¹¹en imbin taiyimap main dubala fut en im wotjimbat mi na.’

¹²“Bat ai dalim yu na Job, yu rong. God im brabli haibala langa eni men.

¹³Wotfo yu oldei askim God blanga ensimbek yu?

¹⁴God oldei tok langa wi olkainwei en wi nomo sabi olataim.

¹⁵Maitbi God tok langa wi naitaim garram nogudwan drim weya bradinim wi blanga gibit wi woning.

¹⁷God dumbat lagijat blanga meigim wi gibit bekboun langa det nogudbalawei, en det praudbalawei.

¹⁸En im oldei maindimbat wi wulijim wi kaan go langa det pleis weya ola dedbala pipul oldei jidan.

¹⁹“Samtaim wi abum panishim brom God garram brabli nogudwan siknis en wi oldei ardimbat insaid langa wi bodi.

²⁰En wen wi jinggabat det gudwan daga weya wi laigim brabliwei, im meigim wi fil sik,

²¹en wi jidan rili bouniwan en lujim wi bodi.

²²En wi gulijap dai en redi blanga go langa det greib.

²³“Wal maitbi wanbala einjul garra kaman langa wi en lukaftumbat wi, en im tok, ‘Yumob nomo gilti.’

²⁴Det einjul im brabli kainbala, en im dalim det greibyad blanga larramgo wi, en wi kaan go langa det pleis weya ola ded pipul oldei jidan, dumaji sambodi bin pei blanga wi.

²⁵Blanga wi bodi garra go yangwan en brabli strongbala igin,

²⁶en wi askim God blanga welkam wi. Afta tharran wi garra oldei weshipbat God gudbinjiwei, en God garra meigim ebrijing jidan gudwei igin.

²⁷Wen tharran garra hepin, wi garra dalim ebribodi na, ‘Aibin dum nogudbala ting, bat God bin larramgo mi fri,

²⁸en imbin bringimbek mi brom det pleis weya ola dedbala pipul oldei jidan. En ai gin luk gudwei na.’

²⁹“God bin dum dijan igin en igin,

³⁰wen im seibum pipul brom det pleis blanga dedbala en bringimap olabat langa det gudbala pleis blanga jidan laibalawan.

³¹Wal Job, yu irrim mi wanim ai garra dalimbat yu. Yu jidan kwait en larram mi tok na.

³²Bat if yu wandim tok, yu dalim mi. Mi wandim irrim hau yu sabi yu nomo bin dum enijing rong.

³³Bat if yu nomo wandim tok, wal yu jidan kwaitbala en lisin langa mi en ai garra titjimbat yu wulijim yu garra sabi det wei blanga God.”