Hiop 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Nge iei, Hiop, kopwe aüselingaei, kopwe rongorong ngeni ai kewe kapas meinisin.

²Iei üa molotä pwe üpwe apasawu mine a nom lon lelukei.

³Ai kei kapas ra towu seni wenecharen mefien letipei, üa apasa elletin mine üa silei.

⁴Ngünün Kot a föriei, nge ngasangasen Ewe mi Unusen Manaman a fang ngeniei manau.

⁵Kopwe pälüeniei are ka tongeni. Kopwe amolokotä o apälüaei.

⁶Nengeni, ngang üa usun chök en me fän mesen Kot. Pwal ngang üa för seni pwül.

⁷Esap wor och popun om kopwe niuokusitiei, üsap mochen pwe kopwe mefi weires rei.

⁸Ewer, en ka fosolong lon selingei, üa rongorong ngingin om kapas.

⁹Ka apasa, ‘Üa limöch, esap wor ai pupungau. Üa wesewesen limöch, esap wor ai tipis.

¹⁰Nge Kot a chök kütta och popun mine epwe ü ngeniei ren, a atolongaei lon tettelin chon oputan.

¹¹A anüküchara pechei lefilen irä o mamasafichi mwökütüküti meinisin.’

¹²Nge üpwe kapas ngonuk, Hiop, pwe lon ei ka mwäl. Kot a tekia seni aramas meinisin.

¹³Pwota ka anini ngeni Kot o üra pwe esap fokun pälüeni än aramas kapasen lalangau?

¹⁴Pun Kot a kapas lon sokopaten lapalap. Are aramas resap rongorong lon eu, a filätä pwal eu, nge aramas resap afäli.

¹⁵Lepwin, lupwen aramas ra möürüchou, Kot a kapas ngeniir lon ar tan me künaer.

¹⁶Mürin a suki selingen aramas o eniweer ren an kapasen amirit,

¹⁷pwe epwe akulu aramas seni ar föför mi ngau o pinei ar resap lamalamtekia.

¹⁸A amwöchü manauer seni peias o tümwünüür seni feiengauen ketilas.

¹⁹Kot a pwal amiriti eman aramas ren an atolonga lon samau o aura inisin ren metek,

²⁰pwe a now anan, esap mwo nge mwon mongö mi fokun anö.

²¹A üttüla fitukan pwe sise chüen küna, nge chün sise küna me mwan ra pwäwu.

²²Iwe, manauan a kan ngeni peias, pwal ngeni ekewe chon künö mi awarato mäla.

²³Nge are epwe wor eman chon afför ren seni lein nöün Kot kewe ngeröün chon läng, epwe pwäri ngeni ewe aramas mine a pwüng fän itan,

²⁴epwe ümöümöch ngeni o üreni, ‘Kopwe angasa ätei seni an tolong lon peias. Üa küna och penmanauan.

²⁵Mürin inisin epwe wiliti inisin eman alüal, epwe liwiniti pöchökülan lealüalün.’

²⁶Mürin, ewe aramas epwe iotek ngeni Kot, nge i epwe etiwa. Epwe feito fän mesen Kot fän pwapwa, nge Kot epwe ngenisefäli an pwüng.

²⁷Iwe, epwe feito fän mesen aramas o pwärätä, ‘Üa tipis o tok seni mine a pwüng, nge Kot esap liwini ngeniei.

²⁸A angasa manauei seni ai tolong lon peias, üa künasefäli saram.’

²⁹Nengeni, Kot a föri ekei föför ngeni eman aramas fän ruu ika fän ülüngat,

³⁰pwe epwe aliwinisefäli manauan seni peias o küna ewe saramen manau.

³¹Hiop, kopwe fokun aüselingaei. Kopwe mosonoson, nge ngang üpwe kapas.

³²Are mi wor mine ka mochen apasa, kopwe pälüeniei. Kopwe kapas, pun üa fokun mochen pwe epwe pwä om pwüng.

³³Nge are esap wor och, kopwe aüselingaei. Kopwe mosonoson, nge ngang üpwe aiti ngonuk tipachem.”