SOHP 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eri, Sohp, komw karonge kanahieng mehkoaros me I pahn patohwan.

²I onopadahr I en patohwanda ei tungoal lamalam.

³Ei pato kan koaros me mehlel, oh I koasoakoasoia dahme mehlel.

⁴Ngenen Koht me wiaiehda oh ketikihong ie mour.

⁵Sapeng ie ma komw kak. Kaunopada omwi akupwung kan.

⁶Kita duwepenehte mwohn silangin Koht, kita koaros wiawihda sang pwehl.

⁷Eri, sohte kahrepen omwi pahn masak ie; I sohte pahn poweikomwihdi.

⁸Eri, iet dahme I rongehr sang komwi:

⁹“I sohte wiahda dihp; I sohte wiahda mehkot sapwung. I me mwakelekel oh sohte dipei.

¹⁰Ahpw Koht ketin rapahki dahme e pahn ketin uhkihong ie oh wiahkin ie sapwellime imwintihti.

¹¹E ketin salihkidier nehi kan sel mete; oh e kin ketin mwasamwasahn kahk koaros me I kin wia.”

¹²Ahpw I pahn patohwanohng komwi, Sohp, me komwi sapwung. Koht ketin lapalapasang aramas koaros.

¹³Dahme komwi kapwukohnekihki Koht me dene e sohte kin ketin sapeng en aramas kaulim kan?

¹⁴Mehnda ma Koht kin ketin mahsen ahnsou koaros, ahpw sohte me kin tehk dahme e kin mahsanih.

¹⁵Ni aramas ar kin meir nipwong, Koht kin ketin mahsen nan ouraman oh kaudiahl kan.

¹⁶E kin ketin kupwurehda pwe re en rong dahme e mahsanih, oh re kin masakada sapwellime mahsen kan.

¹⁷E kin ketin mahsen pwehn katokihedi diparail kan oh en ketin doareirailla pwe re dehr aklapalapala.

¹⁸E sohte kak ketin mweidohng re en mwomwla; e kin ketin kapitirailsang mehla.

¹⁹Koht kin ketin kapwungala aramas ni eh kin ketikihdo soumwahu, oh kadirehkihla paliwere medek.

²⁰Aramas soumwahu men kin sohla men tungoale mehkot, oh pil sohla kin men tungoale kisin tungoal me keieu mwahu.

²¹Paliwere kin tihtihla; komwi kak kilang tih koaros;

²²e nektehn kolahng nan sapwen me melahr akan.

²³Mweinele tohnleng men pahn ketido sewesehda— emen sapwellimen Koht tohnleng ngeder kan, me kin katamanki aramas arail pwukoa.

²⁴Sang ni sapwellime kalahngan e ahpw pahn mahsanih, “Pweisang! E sohte pahn kolahng nan sapwen me melahr akan. Iet pweinen eh pahn kasaledekla.”

²⁵Paliwere pahn pwurehng pwulopwula oh kehlailda;

²⁶Ni eh pahn kapakap, Koht pahn ketin sapeng; e pahn pwongih Koht ni peren; Koht pahn ketin pwurehng kapwungala mehkoaros reh.

²⁷E ahpw pahn patohwanda nan pokon sansal, “I dipadahr. I wiadahr me sapwung, ahpw Koht ketin doareiehla.

²⁸E ketin nekinekid ie pwe I en dehr kolahng nan sapwen me melahr akan, eri, iet I momourte.”

²⁹Koht kin ketin pwurupwurehng wiewia mepwukat;

³⁰e kin ketin doarehla mour en aramas emen, oh ketikihong en kin perenki eh momour.

³¹Eri, Sohp komwi karonge dahme I koasoakoasoia; nennenla oh mweidohng ie I en pato.

³²Ahpw ma mie mehkot me komwi men koasoia, eri, I pahn rong; I pahn perenki koasoia me komwi me pwung.

³³Ahpw ma soh, nennenlahte oh karonge ie, I ahpw pahn padahkihong komwi duwen kupwurokong.