Job 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Job-e-aimar-warbaagwadi magar-itosmargua, Job na ibmar-oakalodisurye-sognaidi, bar abin-imaksasurmalad.

²Degine, sapin-gwensak Eliúʼye-nugadi, Job-sunmaked-itosgua, Jobʼde inniki-gudiiye, degine, Bab-Dummad egi ichakwa-binsamaye sogsad-itosgua, Jobʼse sabsur-uluded. Eliúʼde Baraquel-machid, Buz-e-wagwad, dad-dummad-Ramʼgi danikidid.

³Deginbali, Eliú, Job-e-aimar-warbaagwad nue-Job-abin-imaksasurmaladba, degi, Jobʼgi-ataknaigusmaladba amargi uludbalid.

⁴Eliú iduar sunmakbigusanad. Ar Eliúʼdi bur sapingwasoggu, e-aimar-eba-selegan-inse Jobʼga sunmaked edarbisgweled, adi, a-sorba sunmakegar.

⁵Ar Eliú dakdegua, e-warbaagwadi, gwen bar sunmaksurmala, degidbali, na san bargassuli, nue-ulude gusad.

⁶Geb Buz-e-wagwa Baraquel-machi-Eliú sunmakded. Weyob sogded: “Andi amba bemar-imbagi sapingwagwad, bemardi bato uka-sele-selebagusad. A-ulale, an bemar-abin-sunmakegala, dobe sunmakdaed.

⁷‘Bur ibmar-wismalad-inse sunmakmaloye, an binsasad. Uka-selebamalad-binsaed-nikamalad-inse, neg-dakdiidba sunmakmaloye an sogsad.’

⁸Bab-Dummad-Bela-Gangued-Nikad-e-burba, dulegi-maidi magar neg-ito emar-imaked.

⁹Dule-serganbi binsaed-ibegan gusulid, dule-birga-seleganbi magar-ibmar-ito gusulid.

¹⁰”Degisoggu, bemar, nue be an-itomalo, an ibmar-soggwen-soged nikamogad.

¹¹Bemar sunmaknaigua, boo an bemar-itosad. Bemar-binsamalad, degine, bemar binsaed-akar-akar-sognanaigusmalad, an nue itosad.

¹²Nue an bemar-itosii gusad, bemar gwen oyossulid, Jobʼde nue-nodii gusye. Deginbali, Job-sunmaksad bemar nue-abin-imaksasurbalid.

¹³Mer be anga sogmalo: ‘Anmar binsaed-nikaa gumarye. Bab-Dummadbi Job-abin-imakye, dulemardi Job-abin-imaksurye.’

¹⁴Job anga sunmaksasursoggua, an bemaryob Jobʼga ibmar sogosulid.

¹⁵”Job, wemar-warbaagwadi gege bar be-abin-imakmalad, ar aku itonanaid, e-binsaed galakudmalad.

¹⁶Wemarde bar sunmaksurmarsoggua, ¿geg an bar sunmakmosunde? Suli. Andi sunmakoe.

¹⁷An ibmar-soged nikamogad, an-binsaed an bega sogmogoed.

¹⁸An ibmar sogebier-itosoggua, burba-angi-maidi sunmakebier an-imaksoggua, an ibmar sogmogoed.

¹⁹An-gwage-itolegedi, vino-e-bugluyaba-mus-musmaksiiyob an itoged. Vino e-buglu-binidgi-siidyob-marebieyob an itoged.

²⁰An sunmakergebed, adi, an nabir ollorgudoed. An bega ibmar sogergebed.

²¹Emarba-nai an sunmakosulid, emar-nabir-obinsaega an sunmakosurbalid.

²²Yogasaar-gakansaale an emargi nued sunmakosulid. An deyob imakdele, Bab-Dummad-we-napnegse-an-odenonikid, sabsur-an-odurdako itole.”