Job 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal afta na det thribala men bin stap agaminbat langa Job na, dumaji im nomo bin wandim tok im gilti.

²En Ilaihu det san blanga Barakel, brom det femili gulum Rem brom det taun gulum Bus bin deya du, en imbin brabli nogudbinji langa Job, dumaji Job bin pudum bleim langa God en im nomo bin pudum bleim langa im ronselp. Najing.

³En imbin brabli wail langa det thribala fren blanga Job du, dumaji dei nomo bin abum eni wed blanga ensimbek Job, bat deibin kipgon toktok im gilti.

⁴Dumaji Ilaihu bin mowa yangbala langa det thribala men, imbin weidabat deya raidap ebribodi bin stap toktokbat.

⁵Wen imbin luk det thribala men nomo bin abum eni wed blanga tok langa Job, imbin brabli wail langa olabat.

⁶En imbin tok langa olabat, “Yumob thribala, yumob olmen, en mi oni yangmen. Wal aibin shoum rispek langa yumob, en aibin jidanbat iya kwaitbala.

⁷Aibin reken yumob thribala olmen yumob sabi det wei blanga God.

⁸Bat ai sabi na det wei im rili kaman brom det boswan God.

⁹Maitbi yumob olmen nomo sabi det trubalawei blanga God.

¹⁰Wal ai reken yumob lafta irrim langa mi na wanim ai garra dalim yumob.”

¹¹Wal Ilaihu bin kipgon tok, “Wal aibin jidanbat iya en irrimbat langa yumob bin agaminbat gija en aibin weidabat na, dumaji yumob nomo bin shoum Job im giltiwan.

¹³Yumob nomo rait wen yumob bin tok, ‘Melabat sabi det wei blanga God. Larram God panishim im.’

¹⁴Job nomo bin tok langa mi wulijim ai kaan ensimbek langa im garram yumob agamin.

¹⁵“Holot yumob bin gedim shok, dumaji yumob nomo bin abum eni wed blanga tok na.

¹⁶Bat ai kaan jidan kwaitbala, dumaji yumob bin stap toktokbat na. Nomo.

¹⁷Ai garra dalim yumob wanim mi reken na,

¹⁸dumaji ai lafta kipgon tok. Ai kaan jidan kwait.

¹⁹Mi jidan garram loda wed wulijim det wain skin wen im brabli bulap en im gulijap bas.

²⁰Larram mi tok na, dumaji ai garram samting blanga dalim yumob en ai kaan holdimbek miselp.

²¹Ai garra gibit ebribodi feyago, en nomo meigim enibodi reken olabat haibala. If ai nomo dum lagijat, wal God det wanbala hubin meigim mi, im mait panishim mi en binijimap mi kwikbala.”