1“Aê kamoatiŋ poac gêdêŋ matocanô, gebe matoc katu awêtakiŋ teŋ atomanô.
2Embe jaŋgôm, go Anôtô êkêŋ asageŋ êndêŋ aê, ma jawê kaiŋ Lôlôc Ŋatau nê gêŋlênsêm amboac ondoc.
3Ŋac-alôb-alôbwaga oc ênaŋa ma kêjaŋgowaga oc êtap gêŋwapac sa atom me.
4Anôtô gêlic ŋoc intêna samob ma kêsa ŋoc lêŋ samob sa atom me.
5“Aê kasêlêŋ kasa lêŋ keso ma ockaiŋ kasêlêŋ kepeŋ biŋdansaŋ me.
6Anôtô ênam dôŋ aê naêndêŋgeŋ e êtap sa, gebe aêŋoc biŋ teŋ gêc atom.
7Aê embe jao sic ma ŋoc ŋalêlôm embe êkêŋ êwiŋ matocanô to sec ŋajec teŋ embe êsap lemoc tôŋ,
8go ŋac teŋ êniŋ gêŋ ŋanô, taŋ aê kasê naŋ, ma êmbuc ŋoc gêŋ, taŋ kêpi naŋ sa.
9“Ŋoc ŋalêlôm embe êtu palê êndêŋ awê teŋ ma aê embe jandib jamoa ŋoc ŋac sackapoagêdô gêdêŋ tauŋa nê katam,
10go ŋoc awê eno ŋac teŋ nê gêŋ ma lau teŋ sênac sêwiŋ eŋ.
11Gebe biŋ amboac tonaŋ oc êtu sec alôb-alôb, ma mêtôcwaga oc sêmêtôc sec kapôêŋ tonaŋ.
12Biŋ amboac tonaŋ oc êtôm ja, taŋ êniŋ gêŋ e naêndêŋ lamboam naŋ, ma êndaŋgac ŋoc kôm ŋanô samob su.
13“Gêdêŋ taŋ ŋoc sakiŋwagao to ŋac sêmêŋ, gebe sêsôm ŋoc keso êpi aê ma aê embe jatiŋ êsêac su,
14go jaŋgôm asageŋ êndêŋ noc Anôtô êndi saŋa ma jajô eŋ awa amboac ondoc êndêŋ noc êtu kênac aêŋa.
15Ŋac taŋ kêmasaŋ aê aŋga tinoc têtaclêlôm naŋ, kêmasaŋ ŋoc sakiŋwaga gêwiŋ atom me. Ŋac tageŋ tonaŋ kêmasaŋ aêagêc lulu atom me.
16“Aê kagamiŋ gêŋ, taŋ lau ŋalêlôm sawa teteŋ naŋ, ma gagôm awêtuc mata kêlic-kêlic me.
17Aê taucgeŋ gaeŋ ŋoc mo ŋapopoc ma kakêŋ gêdêŋ mosêbu geŋ gêwiŋ atom me.
18Eŋ ŋapalêgeŋ, tec gajob eŋ amboac tama ma aê gawê awêtuc amboac luŋac.
19Aê galic ŋac teŋ malo gêjam eŋ, gebe nê ŋakwê masi, tec kakêŋ ŋakwê ma ênê ŋalêlôm kêlambiŋ aê atom me. Aê galic ŋac ŋalêlôm sawa tonê gadê masigeŋ, tec ŋoc domba ŋaôlilu kêjandaŋ eŋ atom me.
21Aê gaôc lemoc sa, gebe jatap mosêbu ma taêc kêka, gebe mêtôcwaga sênam aê sa aŋga mêtôc ŋamala me.
22Aê embe jaŋgôm gêŋ tonaŋ, go magiclauŋ êsa ma lemoc tulu e ênsêlô.
23Gebe aê katêc Anôtônê têtac ŋandaŋ, ma aê oc jakô ênê ŋawasi laŋônêm amboac ondoc.
24“Aê embe taêc êka gold ma jaê lamu awa goldŋa,
25aê embe têtac ŋajam êsa êtu ŋoc awamata taêsamŋa me êtu lemoc ŋakôm ŋanô taêsamŋa,
26aê embe matoc ê oc êndêŋ ocsalô me ajôŋ, taŋ kêsa nê lêŋ toŋawasi naŋ,
27ma ŋoc ŋalêlôm embe êkac aê e jawec êndêŋ gêŋ samob tonaŋ ŋai,
28go jawê kaiŋ biŋ alôb-alôb amboac tonaŋ ma mêtôcwaga oc sêmêtôc aê, gebe oc jansa Anôtô Lôlôcŋa auc.
29“Aê têtac ŋajam kêsa gêdêŋ taŋ ŋac têtac gedec aêŋa gêjaŋa naŋ ma katu samuc gêdêŋ taŋ gêŋwapac kêtap eŋ sa naŋ, me masi.
30Aê gajob aocsuŋ, gebe êŋgôm sec atom ma apuc boa ŋac tau gebe ênaŋa atom amboac tonaŋgeŋ.
31Lau taŋ sêŋgôŋ ŋoc bec sêwiŋ aê naŋ, sêsôm biŋ tonec me masi gebe ‘Asa gêmoa, taŋ ênê gwada gêôc eŋ tôŋ atom naŋ.’
32Lau jaba sêc intêna atom, aê galêc ŋoc andu ŋakatam su gêdêŋ êsêac.
33“Aê gasaŋ ŋoc sec auc gêdêŋ lau sêlic atom ma kasiŋ ŋoc keso ôkwi gêc ŋoc ŋalêlôm me.
34Aê katêc lau, tec gagôm gêŋ tonaŋ me. Aê katêc tauc gebe ŋoc tawaŋ sêlic aê sec, tec gajam tauc tôŋ ma kasa aŋga ŋoc andu gaja atom me.
35“Ojae, ŋoc ŋac tageŋ êmoa, gebe êŋô aêmaŋ. Aê gawa ŋoc biŋ samob sa tomalageŋ sugac. Galoc Ŋaniniŋ Ŋatau êjô aê aocmaŋ. Ojae, aê jatap papia tobiŋ, taŋ ŋoc ŋacjo sêgôliŋ kêpi aê naŋ samaŋ.
36Aê oc jaôc papia tau ênsac aê magicm, aê oc jambec êtôm naŋeŋeŋ.
37Aê oc jawa ŋoc lêŋ samob sa êndêŋ eŋ ma jandambiŋ eŋ amboac aê kasêga teŋ.
38“Ŋoc kôm embe êtaŋ êtu gagôm kesoŋa, ma kôm ŋalôcawa embe êtaŋ taŋiboa,
39aê embe janiŋ kôm ŋanô, mago jakêŋ ŋaôli atom ma jalênsu kômwaga,
40go gêŋ têkwa-têkwa êpi êjô polom ma waôŋ sec êpoa êjô Jaŋgom.” Jobnê biŋ tau gêbacnê gêdêŋ tonec.
