1Tavetia rau si keke vinariva egoi koe Tamasa, pude lopu doṉo roro la koa sa keke vineki.
2Nasa sa hinia tana tie koa sa Tamasa panaulu? Sa sa nana tinago koe Tamasa pu tagoi sari doduru ṉiniraṉira?
3Na tinahuara si tadi na tie kaleadi tu, meke sa tinasuna si tadi pu tavete va sea.
4Gilani Tamasa sari doduru pu taveti rau; dogori Nana sari doduru qua rinizu.
5Be ele ene si rau pa kinohakoha, babe hoke bebeno sa nenequ pude la sekesekei,
6si mani pada au Tamasa pa Nana padapadana mamata, mani gilania sapu arau si loke tinazutuqu.
7Be sari qua inene si ele taluarae koa sa Mua siraṉa, meke okoro nia rau gua sapu dogoria rau pa mataqu, babe sa limaqu si ele boni pa sinea,
8si madi henai ri na votiki tie sari ginani pu letei rau, meke madi ta rabutu palae sari doduru qua linetelete.
9Be sa buloqu si roro karovo pa keke barikaleqe, ba be ogolo si rau koasa barikaleqe pa kali vetu,
10si mani la raro ginani sa qua barikaleqe koasa vetu raro tana votiki tie, mani la puta pa teqe tana votiki tie.
11Ura sa sinea asa si variva kurekurena hola, na kinaleana sapu kaqu ta pitu nia.
12Guana nika si asa sapu sulu va inete, meke kote vagi pani sa doduru pu tagoi arau.
13Be guana koroqu poni lolomo pude ta avoso sari qua nabulu, totoso sea la koa rini sari kaiqa qua hahanana,
14sa kote gua si arau be kamo mae au sa Tamasa? Sa kote gua sa qua inolaṉa pana ta nanasa si rau?
15Ura sa keke Tamasa mo asa tavete au si rau meke sari qua nabulu, tavete au Sa pa tiana sa tinaqu, arini pa tinadia.
16Be koroqu va tana ia rau sa hiniva tanisa tie malaṉa; babe lopu va egoa rau sa tinepa tanisa barikaleqe naboko,
17babe heki nia rau sa bereti pude gequ eke mo, meke lopu hia poni ia rau sa koburu loke tamana, si mani ta daku palae pa avaraqu sari limaqu.
18Sa koburu asa si pausu ia rau podalae hitekena guana tamana soti, meke sari barikaleqe nabokodi ba hoke kopu ni rau.
19Ba be dogoria rau si keke tie sapu malaṉa meke loke nana poko, sapu hiva tinokae meke loke nana nobi,
20be guana lopu qetu sa bulona meke mana nau sa sina ponia poko vulu rau si asa, vulu sipi sapu vagi rau koari na qua rovana sipi,
21be ṉoṉovali rau sari na koburu loke tamadia, totoso habotu turaṉi rau sari na palabatu pa vinari pitui, gua,
22si madi ta daku palae pa avaraqu sari limaqu, madi ta dopasa pa vinari hodae si arini.
23Ura, na matagutu nia rau sa tinahuara mae guana koe Tamasa, na pamaṉa nia rau ke lopu boka taveti rau saripu gua hire.
24Be guana vekoa rau sa qua rinaṉeraṉe koasa qolo, babe zama si rau koasa qolo, ‘Koa goi si kalavarae si rau,’ gua,
25babe qetuqetu hola ni rau sari qua tinagotago, sari tinago pu va gavori telequ pa limaqu,
26ba be doṉo la ia sa kalalasana sa rimata, babe sa tinolava tanisa sidara,
27meke pa buloqu si vahesi golomi rau, meke va sage la i rau limaqu koa rini pa vinahesi,
28si kote arini tugo si kaiqa sinea pude ta pitu ni; sina lopu luli valeania rau sa Tamasa panaulu pa Maṉauru.
29Lopu hoke qetu si rau koari na kinaleana pu ta evaṉa koasa qua kana, ba be komolo sina kamoa tinasuna si asa.
30Lopu va malumia rau sa ṉuzuqu pude leve nia si asa, babe pahukia sa kinaleana pu tavete mae nia sa.
31Doduru rina tie pu tavetavete poni au si gilania, sapu hoke va kamoi rau sari doduru tie pude henahena turaṉa au.
32Loke tie karovodi mae si pada puta pa sisiraṉa, sina sa sasada vetu taqarau si tukelena eko mo koa rini.
33Lopu tomei rau sari qua sinea gua ri kaiqa tie; lopu tomei rau pa buloqu,
34sina matagutu ni rau sari na tie; lopu koa noso si rau, lopu vura pa sada, koa gua sari na zinamazama tadi na puku butubutu,
35Kei, be keke tie mo mae va avoso au! Tokotokoro si rau sapu doduru qua zinama si hinokaradi. Mani olaṉau sa Tamasa pu tagoi sari doduru ṉiniraṉira; meke Asa pu zutu au si mani kubere gore ni sari qua sinea pude maqu dogori.
36Maqu va sagei si arini pa avaraqu, meke va hakei pa batuqu guana toropae baṉara, pude dogori na tie.
37Maqu tozi la ni koa Sa sari doduru ginugua pu taveti rau, kaqu kamo la si rau koa Sa guana koburu tavia.
38Be ta zutu totoso pakepakete si rau koari na vuvua ba lopu tabari rau sari na tie tavetavete, babe ṉovali rau maqomaqodi sari na tie pu tavetavete, meke be guana boboso sa pepeso koari na kolomata tadi na qua nabulu pu ta ṉoṉovala pa qua sinea, meke totoso kabo nia rini sa qua sinea,
40si mani toqolo vura sari na hiqohiqo rakirakihi meke lopu na huiti, na duduli meke lopu na bale.” Hokoto sari zinama te Zobi.
