Ayup 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Men közüm bilen ehdileshken; Shuning üchün men qandaqmu qizlargha hewes qilip köz tashlap yürey?

²Undaq qilsam üstümdiki Tengridin alidighan nésiwem néme bolar? Hemmige qadirdin alidighan mirasim néme bolar?

³Bu gunahning netijisi heqqaniysizlargha bala-qaza emesmu? Qebihlik qilghanlargha külpet emesmu?

⁴U méning yollirimni körüp turidu emesmu? Herbir qedemlirimni sanap turidu emesmu?

⁵Eger saxtiliqqa hemrah bolup mangghan bolsam idim! Eger putum aldamchiliq bilen bille bolushqa aldirighan bolsa,

⁶(Men adilliq mizanigha qoyulghan bolsamidim! Undaqta Tengri eyibsizlikimdin xewer alalaytti!)

⁷Eger qedimim yoldin chiqqan bolsa, könglüm közümge egiship mangghan bolsa, Eger qolumgha herqandaq dagh chaplashqan bolsa,

⁸Undaqta men térighanni bashqa birsi yésun! Bixlirim yulunup tashliwétilsun!

⁹Eger qelbim melum bir ayaldin azdurulghan bolsa, Shu niyette qoshnamning ishik aldida paylap turghan bolsam,

¹⁰Öz ayalim bashqilarning tügminini tartidighan kün'ge qalsun, Bashqilar uni ayaq asti qilsun.

¹¹Chünki bu esheddiy nomusluq gunahtur; U soraqchilar teripidin jazalinishi kérektur.

¹²Bu gunah bolsa ademni halak qilghuchi ottur; U méning barliq tapqanlirimni yulup alghan bolatti.

¹³Eger qulumning yaki dédikimning manga qarita erzi bolghan bolsa, Ularning dewasini közümge ilmighan bolsam,

¹⁴Undaqta Tengri méni soraqqa tartishqa ornidin turghanda qandaq qilimen? Eger U mendin soal-soraq alimen dep kelse, Men Uninggha qandaq jawab bérimen?

¹⁵Méni baliyatquda apiride qilghuchi ularnimu apiride qilghan emesmu. Men bilen u ikkimizni anilirimizning baliyatqusida töreldürgüchi bir emesmu?

¹⁶Eger miskinlerni öz arzu-ümidliridin tosqan bolsam, Eger tul xotunning köz nurini qarangghulashturghan bolsam,

¹⁷Yaki özümning bir chishlem nénimni yalghuz yégen bolsam, Uni yétim-yésir bilen bille yémigen bolsam

¹⁸(Emeliyette yash waqtimdin tartip oghli ata bilen bille bolghandek umu men bilen bille turghanidi, Apamning qorsiqidin chiqqandin tartipla tul xotunning yölenchüki bolup keldim),

¹⁹Eger kiyim-kéchek kemlikidin halak bolay dégen birige, Yaki chapansiz bir yoqsulgha qarap olturghan bolsam,

²⁰Eger uning belliri kiyimsiz qélip manga bext tilimigen bolsa, Eger u qozilirimning yungida issinmighan bolsa,

²¹Eger sheher derwazisi aldida «Höküm chiqarghanlar arisida méning yölenchüküm bar» dep, Yétim-yésirlargha ziyankeshlik qilishqa qol kötürgen bolsam,

²²Undaqta mürem taghiqidin ajrilip chüshsun! Bilikim ügisidin sunup ketsun!

²³Chünki Tengri chüshürgen balayiapet méni qorqunchqa salmaqta idi, Uning heywitidin undaq ishlarni qet'iy qilalmayttim.

²⁴Eger altun'gha ishinip uni öz tayanchim qilghan bolsam, Yaki sap altun'gha: «Yölenchükümsen!» dégen bolsam,

²⁵Eger bayliqlirim zor bolghanliqidin, Yaki qolum alghan gheniymettin shadlinip ketken bolsam,

²⁶Eger men quyashning julasini chachqanliqini körüp, Yaki ayning aydingda mangghanliqini körüp,

²⁷Könglüm astirtin azdurulghan bolsa, Shundaqla bulargha choqunup aghzim qolumni söygen bolsa,

²⁸Bumu soraqchi aldida gunah dep hésablinatti, Chünki shundaq qilghan bolsam men yuqirida turghuchi Tengrige wapasizliq qilghan bolattim.

²⁹Eger manga nepretlen'gen kishining halakitige qarighinimda shadlinip ketken bolsam, Béshigha külpet chüshkenlikidin xushal bolghan bolsam —

³⁰(Emeliyette u tügeshsun dep qarghap, uning ölümini tilep aghzimni gunah ötküzüshke yol qoymighanmen)

³¹Eger chédirimdikiler men toghruluq: «Xojayinimizning dastixinidin yep toyunmighan qéni kim bar?» démigen bolsa,

³²(Musapirlardin kochida qalghini ezeldin yoqtur; Chünki ishikimni herdaim yoluchilargha échip kelgenmen)

³³Eger Adem-atimizdek itaetsizliklirimni yapqan, Qebihlikimni könglümge yoshurghan bolsam,

³⁴Hemde shuning üchün pütkül xalayiq aldida uning ashkarilinishidin qorqup yürgen bolsam, Jemiyetning kemsitishliri manga wehime qilghan bolsa, Shuning bilen men talagha chiqmay yürgen bolsam,...

³⁵— Ah, manga qulaq salghuchi birsi bolsidi! Mana, imzayimni qoyup bérey; Hemmige Qadir manga jawab bersun! Reqibim méning üstümdin erz yazsun!

³⁶Shu erzni zimmemge artattim emesmu? Choqum tajlardek béshimgha kiyiwalattim.

³⁷Men Uninggha qedemlirimning pütün sanini hésablap bérettim; Shahzadidek men Uning aldigha barattim.

³⁸Eger öz étizlirim manga qarshi guwah bolup chuqan kötürse, Uning chünekliri bilen birge yighlashsa,

³⁹Chünki chiqarghan méwisini heq tölimey yégen bolsam, Höddigerlerni halsizlandurup nepisini toxtatqan bolsam,

⁴⁰Undaqta bughdayning ornida shumbuya össun! Arpining ornida mestek össun. Mana shuning bilen men Ayupning sözliri tamam wessalam!»