IOBU 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Lau na matagu taravadia vada na atu; benaini, hane-ulato rami-hebou na ede baina haḡerea toma?

²Davagu bema dahaka atai Diravana ena amo? Ahugu bema dahaka Siahu-idoinai Diravana atai ai e nohomu ena amo?

³Hahehisi na kara gageva-gageva taudia latadiai bona mase danu kara havara taudia latadiai se kaumu a?

⁴Egu dala na se itadiaimu bona aegu daḡadia iboudiai se duahidiamu a?

⁵Koikoi dalana ai bama raka, aegu na koikoi gabuna bema heau henia;

⁶bena hahetoho ḡauna maoromaorona ai baine hahetohogu, bona Dirava ese egu lalo-maoromaoro baine dibaia.

⁷Aegu na dala amo bema raka oho, lalogu ese matagu bema ḡavadia, imagu na bema mai mirodia;

⁸bena dahaka baina hadoa ta ese baine ania, bona dahaka baine vara egu na baine heraḡa oho.

⁹Lalogu na hahine ta ese bema ania, dekegu tauna ena ruma iduarana badinai bama henari;

¹⁰bena adavagu na idau tauna ta ana uit baine riria, bona idaudia haida ese bae eno henia.

¹¹Badina be una na bema kerere metau-hereana; una na bema kara dikana, hahemaoro taudia ese bema hahemaorolaia;

¹²davana na lahi, e ara e laomu ela bona dobu masemase gabuna; egu ḡaukara anina idoinai bema araia ore.

¹³Egu hesiai tauna eiava hahinena bema maumauraigu negana ai ena hereva bama dadaraia,

¹⁴ede baina kara toma, Dirava baine tore isi negana ai? Baine henanadai negana ai, ede baina haere henia toma?

¹⁵Sinagu bogana ai e karagu Diravana ese ia danu se karaia a? bona ta ese sinamai bogadia ai se karamai a?

¹⁶Ogoḡami tauna ena ura ḡauna ta bama rua, eiava vabu matana bama havalahu-valahua,

¹⁷eiava agu bama ani gunita, ihareha na sina taina basinama henia,

¹⁸(badina be merona negana amo na reḡua, tamana na heto, bona e vara negana amo na hakaua);

¹⁹ta bama itaia, asi dabuana dainai e mase, eiava ogoḡami tauna asi ena hetaru;

²⁰ia ese tau-anina amo basinema hanamogu, bona egu mamoe huidia ese tauna basiema hasiahua;

²¹imagu bama abia isi ihareha ihadikana, ikahagu na hahemaoro gabuna ai na itaia dainai;

²²bena larolarogu turiana na paḡagu amo baine moru oho, bona imagu na paḡagu amo baine heveri oho.

²³Badina be Dirava ena amo bainema hahisina garina na gari; ia hairaina mai siahuna ida basinama haḡerea diba.

²⁴Gold bama abidadama henia, eiava gold ḡoevaḡoevana na egu helaro ḡauna ai bama halaoa;

²⁵bama moale egu taḡa vada e bada dainai, eiava imagu na ḡau momo vada e haboudia dainai;

²⁶dina bama raraia e taramu negana ai, eiava hua hairaina bama raraia e rahumu negana ai,

²⁷unu amo lalogu bema heani hehuni-hehuni, bona udugu ese imagu bema harahua;

²⁸bena ina danu na kara havara, hahemaoro taudia ese davana bae gwaurai; badina be unu kara amo atai Diravana bama koia.

²⁹E inai henigu tauna ihadikana bama moalelaia, eiava dika ese e butua tao negana ai bama heaḡi,

³⁰(udugu asina hakererea, heuduguirai herevana amo, ena mauri iabi-ohona asina gwauraia);

³¹egu kalaga taudia basiema toma “Daika na ena aniani ianina ai bogana do se kunu?”

³²(Laolao tauna na ariara ai se noho, egu iduara vada na kehoa, loaloa tauna ena);

³³egu kara dika na taunimanima edia amo bama hunidia, egu kara havara na lalogu ai bama hunia,

³⁴badina be hutuma igari-henidia bona varavara edia hedadarai igari-henina dainai, bena asi reḡereḡegu na nohova, bona asina raka lasi;

³⁵ta ese baine kamonai henigu be namo; (lau toagu binai: Siahu-idoinai Diravana ese baine haere henigu); inaigu ena hahebade revarevana baina abia be namo.

³⁶Momokani, paḡagu ai bama huaia, bona kwaragu bama ḡeḡelaia, havava ḡauna na heto;

³⁷aegu daḡadia iboudiai sivaraidia bama gwaurai henia, pavapava heḡereḡerena bama raka henia kahi.

³⁸Egu tano ese bema habadelaigu; tano latalatadia bema taitai hebou;

³⁹anina bama ania asi davana, eiava biaguna bama hamasedia;

⁴⁰bena au ginigini bae vara uit gabudia ai, bona ava dikadia bali gabudia ai. Iobu ena hereva na iniseni ai vada e ore.