Jop 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Te bidi Jop agai po ma wadoliyu, e tama wali, “Eno bomo yai po dąų mu olama, e tama wai dao. ‘Eno we sibi gedu me elama, penani ebo homu me egobeo,’ po wai dao.

²Magi baso meni. God Tigidali Bomo Elalubo Bidi aga dagalude bidiyu, tama agai magi sę dabolo elama, dago dwai kolesaga ebo wei ponainu ebo dawe?

³Agai dwai sogo te dwai kolesaga ebo we bidibolo wei ponobo dao. Tama te tibogo augwali mu dolama, tama augwali mu silibo dao.

⁴Tiali goli, Godigo eno kolesaga tigidali mu koneai dao. Tama ena bilibo tigidali agai suai dao,” wali.

⁵“Eno dwai tibo sę dabe elama, tama eno te we bidi dabe ili po me ola mayu yai meni.

⁶Ma, Godigo eno kolesaga dabe dolo dagala suyu da, teda agai bugagia mu koneaiba, eno magi sę me yai sugobeo.

⁷Tiali goli, ma eno gedu olo tagala palama, ena gedugo dwai kolesaga emainu sula tagalama igi sogo da, teda eno dwai kolesaga elama, agai gedude meda mu igi sogo da,

⁸teda Godigo gasa bidi dabego eno gide nai selama, eno gi mu dolomainu sula tagaligi dao.

⁹Ma, eno ena abagigo we tonama, pęsa eyu yai tigi sogo da, tama ena agai be pąba pelama, agai be pąde dualaluama, eno abagi gasaba pabosi, teda ena agai we dali pagela pigi bigi sogo da,

¹⁰teda ena we mu me gasa bidigo sę we gagalama, gasa bidigo wit nai mimibo sę igi dao, tama gasa bidi dabe augwali aga dali piyu igi dao.

¹¹Ma, eno gasa bidigo we dali dwai sę me igi sogo da, teda dwai kolesaga mu dao. Teda augwaligo ena po tų ela menama, ena tigide dene mabo sę genuai mu igi dao.

¹²Te tobage dwai sę da, te posolai isigo bidi ulubo tiwai dao. Ma, eno te tobage kolesaga yai madi tigi sogo da, teda te isigo ena ulama, eno nai dabe tigidali sia sąnama, tagaligi dao. Tama ena isilama, tama ena isai bidi dabego buluba bidigi pigi dao.

¹³Polobadu eno sę ebo we bidi dabego ena dali nai mede po obaso, tama eno augwaligo po odigi menigi sogo da,

¹⁴teda te Godigo eno te dwai kolesaga yalide po tų ela mabo sogo da, teda eno magi po wei ponaibawe?

¹⁵God aga digi ena te ena idago haligade ame nomainu yai dao. Tama aga naga te sę ebo we bidi me augwa ida dabego haligade ame nomainu yai dao. Te God deligo naga da tigidali nigilama, tama da te God aga gedude deli tigi tiwai naga bidibao,” wali.

¹⁶“Tigidali sogo eno nai meni yai bidi dabe tau siyu yai dao, te augwali meni yani nai dabe mawai dao. Tama eno wilawe we dabe subo si, eno augwali sula tagalobeo. Menio. Eno augwali me tau sai dao.

¹⁷Eno ena nai dabe yogo elama, ena nai dabe dąų walama, enaduba tubeo. Menio. Eno me badu te augwa aya isai wai bǫų dabe te tiana wai bǫų dabe te nai mawai dao.

¹⁸Ena gesi bididu gagalasa, megi tamaba, eno te tiana wai dabe tonaluyu, te augwa ayago ebo kolesaga tiwai yai dao. Me, te we dabe augwa bidi isai we dabe me, eno augwali tonaluyu, tau siyu yai dao.

¹⁹Ma, bidi me ugwa meniama, tama kedaugo mu dolobo si da, teda eno te bidi olo bidimainu sula tagalai yali bogo? Meni.

²⁰Eno aga ena kibu sipsip nisigo nigai ugwa mawai dama. Te ugwago agai tigi posolo ilama ebaso, tama aga dwagi yai homu elama, enabolo buba hwi po wai dao.

²¹Ma, eno homugo gasa tobolu bidi dabe eno po mu dao omainu elama, tama ena po tų ebode dolama tibo po olama, te augwa aya isai wai dabego nai sainu ebeo.

²²Teda eno te tama tiyu da, eno homugo eno nogo si guda pelama, tǫba tulalumainao.

²³Magi baso meni. Eno Godigo moni bomo eno koneama, tama me agai dwai nai dabe tagala palama, bidi dolobo me, eno koneai dao. Tama ena wi genuai mu yai dao. Tama tidali weyu, eno dwagi yai kolesaga naga yai dao,” Jopgo te po wai.

²⁴“Mu tama. Eno ena bomai sę elama, mone dabe hauwa mu sai dao. Tiali goli, eno tobolu gagea pelama, tama ena nogi ugwaba sai meni. Tama eno homugo e tama tiai meni, eno te dwagi dwagi yai gol dabe, mone dali sigo naga ena bugagia bidibo tau sabo usu yaibao, eno te homu me ebe.

²⁶Giliga ula genuai mu elama, tama te polua me ula dwagi yai ebo dao. Tiali goli, eno homugo te nai siba lotu po wabo homu yai menio. Tama eno nogode nono nenama, te nai si genuai nogi mawainu yai menio.

²⁸Ma, eno te tobage kolesaga dabe igi sogo da, teda eno God dagalude bidibo bidi tudi ola mayu, te agaba homugo kęą pabo kolesaga togoyu tigi dao. Tama te pagede agai ena po tų ela menama, ena sęgę genuai mu magi dao,” wali.

²⁹“Ma, eno ena boi bidi dabe dwai dene sabo sogo me, teda eno augwali dene sobaso, usu da homu me yai menio.

³⁰Tama eno Godibolo eno boi bidi dabe dolama isilimainu me hanalu wai meni. Ma, eno tama tigi sogo da, teda eno dwai sęgę sabo sę igi dao.

³¹Eno sę bidi dabego e tama wabo dao, ‘Agai tigidali bidi nai mawai dao. Bidi me nai meni yai bidai menio,’ augwaligo te po wabo dao.

³²Mu tama. Te gasa bulu bidi dabe augwali piabo be meni ebo eno sulama, augwali te hanu sunumide olo bidimainu sula tagalobeo. Mu meni. Eno augwali ena beba oda sai dao.

³³Te bidi mebago augwa dwai sę elama, augwa ma dualobo dao. Tama eno me ena dwai sę elama, ena yali dwai sę dualai tigi sogo da, teda ena bede ena geme dulaluama, tama ena abagibolo po wagi menio. Te tama tibogo, ena bulude we bidide wi ebo ąǫ igi dao. Tiyu, augwaligo eno yali dwai sę sulama, ena posobo po olama, ena doligi dao. Tiali goli, eno dwai sę me ebe. Eno dualabo dwai sę menio.” Jopgo te po wai.

³⁵“Hobede ya, bidi me deli bidibaso, eno po waboba olo sagana munama, odigi sogo da, te usu igi dao. Eno e tama po wali, ‘Eno magi sę me elama, te po dąį ilama, te po bomo elama obao. Tama megi da, God Tigidali Bomo Elalubo Bidigo eno tigidali po wei ponomai yaiba. Te aga eno te po tų ebo odabo bidi da weyu, agai eno yali dwai sę kisilibo po pepade asęmainao.

³⁶Tama eno dwagi yai homu elama, te pepa selama, eno nagede tolaibao, tama te pepa eno tobolude te king tuni bidigo madi tobolude mubo ąǫ yaibao.

³⁷Tama ena Godigo gesabidiba kingo wai doligi pabo ąǫ elama, tama agabolo eno yali sę dabe tigidali po pusa magi dao.’ Eno te po wagi da,” Jopgo te po wali.

³⁸“Ma, eno gasa bidi dali dwai kolesaga elama, tama agai tǫ wi selama, tama te tǫ eno abelesiąbadi nai wai bulama, tama te tǫ aga digi gela genuai mu olama, wado genuai mu eyu da,

⁴⁰tama teda eno te wit nai dali, bali wai dali si te tǫde bulubo si, teda te dwai gąų yai bono dali, olo nosai si naga te tǫde holomainao,” wali. Jopgo po tama silali.