Ayóoba 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Maa jaayanteek samay gët. Ana nu may xooleb janq?

²Lu ko moy ana sama cér ca Yàlla ma fa kaw? Lu ma Aji Man jiy sédde fa kawte ya?

³Xanaa du safaan a ñeel ku bon, naqar ñeel ku ñaaw?

⁴Du Yàllaa ngi gis fu ma jaare, di waññ sama bépp jéego?

⁵Ndegam damaa doxe ndëngte, mbaa ma gaawtoo njublaŋ,

⁶na ma Yàlla natte màndaxekaayu dëgg, ba ràññee samag mat!

⁷Ndegam samay tànk a moy yoonu njub, mbaa sama xol topp saay gët, mbaa sama yoxo yii gàkk fenn,

⁸yal naa ji, keneen lekk, ma jëmbat, ñu buddi.

⁹Ndegam jabaru jaambur a ma xañ sago, ba ma di ko yeeroo sama buntu kër moroomu góor,

¹⁰yal na sama jabar bojjal keneen, ñeneen tiim ko.

¹¹Su ma ko defoon, muy jëfu yàqute, di moy gu yeyoo pénc,

¹²te di sawara wu may xoyom ba ca paxum sànkute ma, lu ma meññle, mu buubaale.

¹³Ndegam maa sofental sama àqu jaam, bu ñu may jooytu, diy góor mbaa jigéen,

¹⁴bu ci Yàlla jógee, ana nu may def? Bu ma ko laajee, ana lu ma koy wax?

¹⁵Ki ma sàkk ci sama biiru ndey, xanaa du moo leen sàkk ñoom itam? Du kenn kee nu sos ci njurukaay?

¹⁶Damaa masa xañ néew-ji-doole lu muy sàkku, mbaa ab jëtun wékk ma bët, ma tas yaakaaram?

¹⁷Am damaa masa wéetoo ab dog, te sédduma ca jirim?

¹⁸Ba may ndaw laa dala yor ab jirim ni baayam; te ba ma juddoo ci sama ndey laa dala gindi ab jëtun.

¹⁹Ndegam maa seetaan ku rafle nara sànku, seetaan néew-ji-doole ju amul malaan,

²⁰te sànguma céram, mu sante ma ko, di nugloo ndimo lu ñu ràbbe sama kawari gàtt,

²¹ndegam maa xàccil sama loxo ab jirim, ndax yaakaar kiirlaay ca pénc ma,

²²yal na sama loxo teqlikook sama mbagg, sama përëg fàqe ci conc li.

²³Mbugalu Yàlla kat laa ciy ragal, te màggaayam xajul ci man.

²⁴Ndegam damaa def wurus sama yaakaar, bay tudde ngën-gi-wurus sama cëslaay;

²⁵ndegam maa bége sama alal ju bare, bége koom gu ma sama doole may;

²⁶ndegam maa masa niir jant beek leeraayam, mbaa weer wiy daagoo yànjaayam,

²⁷ba namma làqu, di ci jaamu lenn, bay fóon sama loxo, wormaale leen;

²⁸konoon it muy ñaawtéef gu yeyoo àtte, nde kon ma weddi Yàlla ma fa kaw.

²⁹Ndegam maa bége musibay bañ, mbaa ma bellaxndikoo loraange ju ko dab,

³⁰te bàkkaarewuma sama làmmiñ sax, ba di ci ñaanal noon alkànde,

³¹ndegam du samay bokk a ma seedeel ne: «Ana ku mu leelul ndawal ba mu regg?»

³²te biti, masumaa wacc doxandéem di fa fanaan, sama bunt laay ubbil ku nekk ciw yoon,

³³ndegam maa roy nit ñi, di nëbb samay tooñ, di nëpp-nëppal sama sikkaange,

³⁴ragaluma jëwu àddina de, tiituma mbooloo mu ma nawloodi it, ba ne cell baña génn sama buntu kër.

³⁵Ma ne éy ku may may nopp? Sama torloo ngoog, na ma Aji Man ji tontu! Su dee téereb tuuma bu ma ku may layool bindal,

³⁶maa koy gàddu, kaalawoo.

³⁷Maay limal Yàlla jéego bu ma séqi, di taxawi fa kanamam taxawaayu garmi.

³⁸Ndegam sama tool a ma tuumaale ay jooy, rongooñi toobo yay bas-baseendoo,

³⁹ndegam maa lekk lu ca ñor, te dikkewuma dara, ba xañ bakkan ña ma ko beyaloon,

⁴⁰kon yal na ay dég wuutu bele ba, ñax mu bon wuutu lors ba. Fii la kàdduy Ayóoba yem.