1دَوُدَ مَن نَشَ عِسِرَيِلَ سْورِيٍ مَلَن، عٍ كْنتِ نَشَ سِفَ مِشِ وُلُ تٌنفٌ سَشَن.
2عٍ نَشَ سِفَ بَلٍ يُدَ، عَلَ شَ كَنكِرَ تٌنفٌدٍ، عَلَتَلَ شِلِ قَلَمَ نَشَن شُن، عَلَتَلَ سّنبّمَ مَفٌرٌشِ نَشَن مَ مَلٍكّيٍ مَسٌلِشِيٍ تَفِ.
3عٍ نَشَ عَلَ شَ كَنكِرَ دْشْ سَرّتِ نّينّ ندٍ قَرِ، عٍ قَ عٍ حّرّ عَ سّيتِ مَ كٍلِقٍ عَبِنَدَبٌ شْنيِ فٍيَ قَرِ. عَبِنَدَبٌ شَ دِ شّمّيٍ عُسَ نُن عَشِيٌ نَن نُ سَرّتِ نّينّ رَحّرّقٍ.
4عٍ نَشَ عَ رَحّرّ كٍلِقٍ عَبِنَدَبٌ شْنيِ فٍيَ قَرِ. عَشِيٌ نُ حّرّقٍ سَرّتِ يَ رَ، عَلَ شَ كَنكِرَ نُ نَ نَشَن قَرِ.
5دَوُدَ نُن عِسِرَيِلَ حَمَ نُ نَ عَلَتَلَ مَتْشْقٍ مَشَسٍ مْولِ بِرِن نَ. مَشَسٍ وُرِ دَاشِيٍ نُن كْرَ مْولِ ندٍيٍ نُ نَ عٍ يِ رَ.
6عٍ تٌ نَكٌن شَ لْنيِ لِ، نِنفٍيٍ نَشَ وَ بِرَقٍ. نَ كُي عُسَ نَشَ عَ بّلّشّ عِتَلَ، عَ عَلَ شَ كَنكِرَ سُشُ.
7عَلَتَلَ نَشَ شْنْ عَ مَ عَ شَ نَ كَرِنيِ مَ، عَ قَ عَ سْنتْ عَلَتَلَ شَ كَنكِرَ قّ مَ.
8دَوُدَ نَشَ شْنْ عَلَتَلَ عُسَ قَشَقٍ رَ. عٍ نَشَ نَ يِرٍ شِلِ سَ ثٍرٍ سِ عُسَ. نَا شِلِ قَلَمَ نَ كِ نّ هَن تٌ لْشْي.
9دَوُدَ نَشَ فَاشُ عَلَتَلَ يَ رَ نَ لْشْي، عَ عَ قَلَ، «عَلَتَلَ شَ كَنكِرَ قَ سٌمَ ﭑ تَن شْنيِ دِ؟»
10عَ نَشَ نَتّ تٌنفٌ عَ عَ مُ لَنمَ عَ شَ عَ رَ سٌ عَ شَ تَا كُي سِندٍن، عَ شَ عَ شَنِن عٌبٍدٌ عٍدٌن فَتِكَ شْنيِ.
11عَلَتَلَ شَ كَنكِرَ نَشَ لُ مّننِ هَن كِكٍ سَشَن. نَ وَشَتِ بُن مَ، عَلَتَلَ نَشَ بَرَكَ سَ عٌبٍدٌ عٍدٌن نُن عَ شَ مِشِ بِرِن مَ.
12عٍ نَشَ سَ نَ دّنتّفّ مَنفّ دَوُدَ بّ. عٍ نَشّ، «عَلَتَلَ بَرَ دُبَ عٌبٍدٌ عٍدٌن شَ قْشّ بّ عَلَتَلَ شَ كَنكِرَ شَ قٍ رَ.» نَ كُي دَوُدَ نَشَ سِفَ عٌبٍدٌ عٍدٌن شْنيِ، عَ سَ عَلَتَلَ شَ كَنكِرَ تٌنفٌ، عَ عَ شَنِن سّيوّ رَ عَ شَ تَا كُي.
13كَنكِرَ شَنِنيِيٍ تٌ سَنتٌنفٌ سٍننِ رَبَ، دَوُدَ نَشَ تُورَ نُن نِنفٍ بْرْفّشِ بَ سّرّشّ رَ.
14دَوُدَ نُ نَ قَرٍ بٌرٌنقٍ عَ سّنبّ بِرِن نَ عَلَتَلَ يَ عِ، دُفِ قِيشّ رَفٌرٌشِ عَ مَ.
15دَوُدَ نُن عِسِرَيِلَ حَمَ نَشَ نَ كَنكِرَ رَ سِفَ دَرِ سَلَمُ، عٍ نُ عَلَتَلَ مَتْشْ سَرَيٍ قٍ شُي رَ.
16عٍ نُ كَنكِرَ رَ سٌمَ دَوُدَ شَ تَا كُي تّمُي نَشّ، سْلُ شَ دِ فِنّ مِكَلِ نُ تِشِ وُندّرِ رَ. عَ تٌ دَوُدَ تٌ قَرٍ بٌرٌن نَ، عَلَ شَ كَنكِرَ يَ رَ، عَ بْحّ نَشَ رَحَاشُ عَ مَ.
17عٍ نَشَ عَلَتَلَ شَ كَنكِرَ دْشْ كِرِ بَنشِ بُن مَ دَوُدَ نُ نَشَن تِشِ عَ بّ. نَ تّمُي دَوُدَ نَشَ سّرّشّ فَن دَاشِيٍ نُن شَنُنتٍيَ سّرّشّيٍ بَ.
18عَ تٌ فّ نَ سّرّشّيٍ بَدٍ، عَ نَشَ دُبَ حَمَ بّ عَلَتَلَ سّنبّمَ شِلِ رَ.
19عَ نَشَ تَامِ كٍرٍن، تَمَرٍيٍ، نُن شْرّ مَنِيّيٍ قِ فِنّ نُن شّمّ بِرِن مَ، عٍ قَ فبِلٍن عٍ شْنيِ.
20دَوُدَ تٌ فبِلٍن عَ شْنيِ، عَ شَ سَ دُبَ عَ شَ دٍنبَيَ بّ، مِكَلِ نَشَ عَ رَلَن، عَ عَ قَلَ عَ بّ، «عِ تَن، عِسِرَيِلَ مَنفّ، عِ تَن نَن قَرٍ بٌرٌنقٍ عِ مَفٍلِ رَ عِ شَ كٌنيِيٍ نُن عٍ شَ فِنّيٍ يَ عِ يِ كِ، عَلْ سّفّتَلَ شُرُتَرٍ ندٍ، عِ مُ يَافِ؟»
21دَوُدَ نَشَ عَ يَابِ، عَ نَشّ، «ﭑ عَ رَبَشِ عَلَتَلَ نَن بّ، نَشَن ﭑ سُفَندِ، عَ ﭑ نَقِسَ عِ بَبَ نُن عَ بْنسْي بِرِن بّ، عَ ﭑ قِندِ عَ شَ حَمَ عِسِرَيِلَ مَنفّ رَ. ﭑ مَتْشْي نَن تِقٍ عَلَتَلَ بّ.
22ﭑ بَرَ تِن ندٍ شَ سَ نَ قَرِ، ﭑ مَن شَ ﭑ يّتّ مَفٌرٌ عَ بّ. نَ كٌنيِ فِنّيٍ عِ نَشٍيٍ شَ قٍ قَلَ، نٍيٍ قَن ﭑ بِنيَمَ نّ.»
23نَ نَ عَ رَ، سْلُ شَ دِ فِنّ مِكَلِ مُ دِ يٌ بَرِ عَ شَ سِمَيَ كُي.
