1Dauda ɛ̀ra à Isaraila kũ à ń sɛ́tɛnↄ kàkara gbɛ̃nↄn dúbu baraakuri.
2Akũ à fùtɛ à dà kũńwo zɛ́n, ò gɛ̀ɛ Baala kũ à kú Yudanↄ bùsun, de ò Luda àkpati sɛ́ ò suo. Dikiri Zĩ̀karide dìgↄ̃ vutɛna kín àkpatii pì malaika dɛ̀mbɛrɛdenↄ dagura, abire yãin òdi pi a tↄ́ kúa.
3Ò àkpatii pìi dà zùgo dufu gũn Abinadabu bɛ sĩ̀sĩi musu, akũ ò dào zɛ́n. Abinadabu nɛ́nↄ Uza kũ Ahioo mɛ́ òtɛn do zùgo pìii,
4Luda àkpati kún. Ahio mɛ́ à tɛ́ arɛ,
5akũ Dauda kũ Isarailanↄ tɛn ũ wã ń pínki Dikiri arɛ ń gbãna zaka lɛ́n kũ lɛ̀sinaao. Òtɛn mↄrↄ lɛ́ kũ gidigboo kũ sɛ̃gɛ̃sɛ̃gɛ̃o kũ fakao kũ sɛ̃̀gɛ̃ɛo.
6Kũ ò kà Nakↄ̃ ésegbɛ̃kia, zùnↄ gɛ̃̀ɛ sì, akũ Uza ↄ bò à nà Luda àkpatiia.
7Akũ Dikiri pↄ fɛ̃̀i, à a lɛ̀ a dɛ̀ àkpatii sarɛ gwe dà kũ à kɛ̀ yãi.
8Dauda nɛ̀sɛɛ yàka, kũ Dikiri pↄ fɛ̃̀ Uzai yãi, akũ òdi gu pì sísi Pↄfɛ̃'uzai ari kũ a gbãrao.
9Zĩ birea vĩna Dauda kũ̀ Dikiri yã musu à pì: Deran mani kɛ nà mà Dikiri àkpati sɛ́ mà táoo?
10Akũ adi we à táo a wɛ̃tɛ gũn doro, à lìtɛ à tào Gata gbɛ̃ Ɔbɛdi Ɛdↄmu bɛa.
11Dikiri àkpati kú a bɛa ari mↄ aakↄ̃, akũ Dikiri arubarikaa dàn kũ a bedenↄ ń pínki.
12Ò pì kína Daudanɛ: Dikiri arubarikaa dà Ɔbɛdi Ɛdↄmu bedenↄgu kũ pↄ́ kũ à vĩnↄ pínki a àkpati yãi. Akũ Dauda gɛ̀ɛ gwe, à Luda àkpatii sɛ̀ àtɛn suo a wɛ̃tɛ gũn kũ pↄnnao.
13Kũ gbɛ̃ kũ ò Dikiri àkpati sɛnanↄ gbá sɛ̀ gɛ̃̀n suddo, akũ Dauda sa ò kũ zùsaao kũ zùnɛ bↄ̀rↄ mɛ̀kpanaao.
14Dauda sa'o'uta dana, àtɛn ũ wã Dikiri arɛ a gbãna zaka lɛ́n.
15Àpii kũ Isarailanↄ pínki òtɛn su kũ Dikiri àkpatiio, òtɛn pↄnna wiki lɛ́ òtɛn kuru pɛ́.
16Kũ Dikiri àkpati tɛn gɛ̃ Dauda wɛ̃tɛ gũn, akũ Solu nɛ́ Mikala tɛn zĩtɛ gwa wondoo gũn. Kũ à è kína Dauda tɛn vĩvĩ àtɛn ũ wã Dikiri arɛ, à a gya bò a swɛ̃̀ɛ gũn.
17Kũ ò sù kũ Dikiri àkpatiio, ò dìtɛ a gbɛ̀n bizakuta kũ Dauda dↄ̀nɛɛ gũn. Akũ à sa'opↄ kũ òdi ká tɛ́n à tɛ́ kũ ò Dikiri arɛ kũ kɛnnakũkↄ̃o sa'opↄo.
18Kũ à sa ò à làka, à sa mana ò gbɛ̃nↄnɛ kũ Dikiri Zĩ̀karide tↄ́o.
19Akũ à burodii kpàatɛtɛ Isaraila kũ ò kakarana gwenↄnɛ kↄ̃̀nↄ dodo gↄ̃gbɛ̃nↄ kũ nↄgbɛ̃nↄ ń pínki kũ domina kàraao mɛ̀n dodo kũ geepi kàraao mɛ̀n dodo.
20Kũ Dauda tɛn su bɛ de à sa mana o a bedenↄnɛ, akũ Solu nɛ́ Mikala bò à gɛ̀ɛ à dàalɛ à pì: Mↄkↄ̃n Isarailanↄ kína, gbɛ̃ bɛ̀ɛrɛde yãn n kɛ̀ gwe gbãra yá? N n zĩda mɛ̀ɛ mↄ̀ n ìba nↄgbɛ̃ zĩkɛrinↄnɛ, lán wé'isaride dì a zĩda mɛ̀ɛ mↄńnɛ nà.
21Akũ Dauda pì Mikalanɛ: Dikirin ma ũ wã̀nɛ. Dikiri mɛ́ à ma sɛ n de kũ a bedenↄ gɛ̃nɛ ũ, à ma kɛ a gbɛ̃ Isarailanↄ don'arɛde ũ.
22Mani futa kũ de abirela, mani ma zĩda kĩa n enaa gũn, ama nↄgbɛ̃ zĩkɛri kũ ń tɛ́ḿma pìnↄ mɛ́ oni ma bɛ̀ɛrɛ dↄ̃.
23Akũ Solu nɛ́ Mikala dí nɛ́ iro ari à gɛ̀ɛ à gào.