1Tomuren e biney me fek Absalom ba chariot nge boch e os ngak, nge wugem e pumo’on ni ngu u ranod ni yad be m’on rok ma be lay.
2Bayi n’en me od nri kadbul nge yan i sak’iy nga to’oben e kanawo’ u langan e garog ko binaw. Ma nap’an nra yib be’ ngaram ni bay ban’en nike buch rorow be’ ni ba’adag ni nge duwgiliy e en ni pilung e n’en ni ngan rin’ ngay, me pining Absalom fa’anem nge fith ngak e gin ni be’ riy. Ma nap’an e ra yog fare mo’on ngak e kun ganong e yib riy,
3me ga’ar Absalom ngak, “Mu sap, rogon ko motochiyel e gur e bfel’ e rom, machane dariy be’ nike duwgiliy e en pilung ni nge par ni ir e owchen ni nge rung’ag e tin ni ngamog.”
4Me ul ul Absalom ngay nge ga’ar, “Ke ma’adab ni ngan teg ni gag e en ntapuf oloboch! Ma aram e en ni bay ban’en nib kireb u thilrow be’ ara ba pa’ i oloboch ni nga ni pithig mra yib ngog ma ri gu ra ayuweg ngan rin’ ngak e tin nib mat’aw.”
5Ma nap’an nra yan fa’anem ni nge siro’ ngak Absalom, me k’iyag Absalom pa’, nge kol fa’anem nge faray owchen.
6Ara’ e n’en ni i rin’ Absalom ngak gubin e girdi’ nu Israel ni urbad ni ngar guyed David ni Pilung ni nge pithig e oloboch rorad, ma aram me fel’ Absalom u wan’ e girdi’.
7Aningeg e duw nga tomuren me ga’ar Absalom ngak David ni Pilung, “Gu ba’adag ni nggu wan nga Hebron nggu rin’ bbugithin ni kug micheg ngak SOMOL.
8Nap’an ni ug par u Geshur, u lan yu Syria, mu gu micheg ngak SOMOL ni fa’anra fulwegeg nga Jerusalem, mra gu wan nga Hebron nggu meybil ngak u rom.”
9Me ga’ar David ni Pilung, “Mman u fithik’ e gapas.” Me yan Absalom nga Hebron.
10Me l’oeg Absalom e pi mal’og nranod nga urngin e ganong nu Israel nib mith nge lungrad ngorad, “Nap’an ni gimed ra rung’ag laman e rappa nike thow, ma nge lungumed. I Absalom e ka ni pilungnag u Hebron!”
11Ma 200 e pumo’on ni un ngak Absalom u Jerusalem ngranod, ni Absalom e piningrad; ma dar nanged murung’agen e makath nike tay Absalom, miyad yan ndarir nanged ni bay e kireb u but’.
12Ma nap’an ni be pi’ Absalom e gamanman ni maligach, miki pi’ e thin nge yan ngak Ahithofel ni bay ko binaw nu Gilo, ni ir reb fapi girdi’ ni yad ma puruy’ David ni Pilung. Re makath nem ni ngongliy Absalom nib togopluw ngak David ni Pilung e i yan ni bfel’ rogon, mi i yo’or e tirok Absalom e girdi’.
13Me yib be’ i yog ngak David ni Pilung ni ga’ar, “Ke fol e girdi’ nu Israel ngak Absalom.”
14Me ga’ar David ngak urngin e pi tolang ni yad bay rok u Jerusalem, “Thingar da milgad e chiney ni fa’anra gadad ba’adag ni ngad thaygad u pa’ Absalom! Mu gurgad, ya ri da ginigad ma ke taw nge gel ngodad, me li’ urngin e girdi’ u lan e re binaw ney!”
15Miyad fulweg ngak ni lungurad, “Tin ni ngamog e ngad rin’ed.”
16Me un e girdi’ nu tabinaw rok David ni Pilung ngak, nge pi tolang rok ngranod, kemus ni ragag e ppin rok e pag u tabinaw rok ni tafen e pilung ni ngu’ur ayuweged e naun.
17Ma nap’an ni yib David ni Pilung nge urngin e tin ke un ngak e girdi’ ni ngar chuwgad u lan fare binaw, marbad ra talgad ko bin th’abi tomur e naun.
18Me sak’iy e pi tolang rok u to’oben, me yib e pi matanagen David, ra th’abed p’eowcherad ngranod ni yad ba chugur ngorad. Ma 600 e salthaw nra uned ngak David u Gath e kurbad ra th’abed p’eowcherad ngranod ni ku aram rogon,
19me ga’ar David ni Pilung ngak Ittai ni ir e ga’ rorad ko salthaw, “Mang ni ngam un ngomad? Mu sul ngam par rok fa’anem ni ka fini pilung. Ya gur be’ u bang, ni kan chuwegem ko nam rom.
20Dawori n’uw nap’an ni ka mub ngaray, ere mang ni ngam un ngog ngu’ud milgow i yan? Ya da gu nang e gin ni gu be sor ngay. Mu fek e girdi’ ko nam rom ngam sulod, ma SOMOL e ngi i gol ngom ma be yul’yul’ ngom.”
21Me fulweg Ittai ni ga’ar, “Gu be micheg ngom u daken fithingan SOMOL ni gubin ngiyal’ ni bay ug un ngom ndemturug e gin ni ga be yan riy i yan, ni mus ni fa’anra ngad m’ow.”
22Me ga’ar David, “Kefel’. Mman!” Ma aram me yan Ittai nike un urngin e tirok e girdi’ ngak nge girdi’en e tabinaw rorad.
23Ma nap’an ni yan e tirok David e girdi’ me pag e girdi’ lamrad ngalang ngar yorgad. Me yan David ni Pilung i th’ab e lul’ ni Kidron nge yan ni be sor nga daken e ted, miki rin’ e pi’in yad be un ngak ni aram rogon.
24Ma bay Zadok ni prist rorad, ma bay e pi Levite ni kar uned ngak yad be fek fare Kahol Ko M’ag, miyad tay nga but’ nge yan i mada’ ko ngiyal’ nike chuw urngin fapi girdi’ u lan fare binaw. Ma ku bay Abiathar ni prist rorad.
25Me ga’ar David ni Pilung ngak Zadok, “Mfek fare Kahol Ko M’ag ngam sul ngalan binaw. Ya fa’anra ba felan’ SOMOL ngog, mra gagiyegnag nggu sul reb e rran ngug guy, mu gguy e gin ni bay riy.
26Machane fa’anra de felan’ ngog, me ere nge rin’ ngog e tin ba’adag.”
27Me ul ul ngay nge ga’ar ngak Zadok, “Mu sap, mu fek fare pagel ni fakam i Ahimaaz nge Jonathan ni fare pagel ni fak Abiathar ngam sulod ngalan binaw u fithik’ e gapas.
28Bay gu son u lan e loway ko gin ni yima th’ab e lul’ riy nga baraba’ nge yan i mada’ ko ngiyal’ ni bayi taw e thin romed ngog.”
29Ma aram me fek Zadok nge Abiathar fare Kahol Ko M’ag ngar fulwegew nga Jerusalem miyow par u rom.
30Me forthog David i yan ko Burey nu Olives ni be yor, ndariy e sus u ay ma ke upunguy lolugen ni bochan e kari kireban’. Ma urngin e girdi’ ni yad be un ngak e ra upunguyed lolugrad ni ku yad be yor.
31Nap’an nnog ngak David nike un Ahithofel ko ba’ rok Absalom e girdi’ ni ngar togopluwgad ngak, me ga’ar David, “SOMOL, wenig ngom, mu pingeg e fonow rok Ahithofel nge par ni thin ko balyang!”
32Fa’ani taw David nga p’ebugul e burey nga bangi n’en ni yima meybil riy ngak SOMOL, me mada’nag Hushai ni ba Arkite ni tafager rok ni be’ nib pagan’ ngak, ma ke guchthuy e mad rok ma ke tay e fiyath nga fithik’ i lolugen.
33Me ga’ar David ngak, “Ga ra mu’un ngog, ma dabiyag ni ga ra ayuwegneg.
34Machane ra mu sul ngalan binaw nge lungum ngak Absalom, ngu’ug pigpig ngom ni bod rogon ni ug pigpig ngak e chitamam, ma aram e rayag ni ngam ayuwegneg, ya ra um togopluw ko fonow ni be tay Ahithofel ngak Absalom.
35Ma fa gal prist ni Zadok nge Abiathar e yow bay u rom, mra um weliy ngorow urngin e tin ni ga be rung’ag u tafen e pilung.
36Mra bagayow ma bay e bin ni fak e pagel rok, ni aram Ahimaaz nge Jonathan, nrayag ni nga mogned ngorow e tin ni kam rung’aged ngarbow rognew ngog.”
37Ma aram me sul Hushai, ni fager rok David, ngalan binaw ko fa ngiyal’ ni ka fini taw Absalom ngaram.
