Hiop 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Eman aramas mi uputiu me ren eman fefin a chök manau lon fansoun mochomoch, nge manauan a uren weires.

²A märitä usun chök epö pön irä, nge a pwal pwasala. Manauan a süla usun eu nür, nge esap nonomola.

³Ifa usun, kopwe nefotofotola won ena sokun aramas o emwenato lon kapwüng pwe kopwe apwüngü?

⁴Iö a tongeni atowu och mettoch mi limöch seni och mettoch mi limengau? Esap wor eman.

⁵Pokiten ränin manauen eman aramas ra aükük, nge en ka silei iteiten maramen manauan, ka pwal aükü müchülan ränin manauan pwe esap tongeni soposopola,

⁶iei mine kopwe nenne seni o likiti pwe epwe tongeni awesala ränin manauan usun eman chon angang mi mö.

⁷A chüen wor ach apilükülük ren efoch irä mi pöküpök pwe epwe fasarsefäl, pwe ilin kewe mi pwüküfö repwe fokun märitä.

⁸Inamwo ika waran ra kirou me fän pwül o popun a pwasala,

⁹nge lupwen koluk a tori, epwe fasar o apwükü palan usun efoch irä mi fö.

¹⁰Nge lupwen eman aramas a mäla, a wes manauan. Lupwen a müchüla an ngasangas, ia a nom ie?

¹¹Usun koluk a pwasatä seni eu nomun koluk, nge eu chanpupu a kisikisila o morola,

¹²iei usun eman aramas a mäla, nge esap chüen pwätäsefäl. Tori ekewe läng repwe morola, esap nennela ika pwök seni an möür.

¹³Amwo kopwe aopaei lon ewe lenien sotup, amwo kopwe aopaei tori om lingeringer epwe wesila. Mürin, kopwe filätä eu fansoun fän itei o chechemeniei.

¹⁴Are eman aramas a mäla, ifa usun, epwe pwal manausefäl? Lon unusen ränin ai angang üpwe witiwit tori fansoun ai ngasala epwe feito.

¹⁵En kopwe köriei, nge ngang üpwe pälüenuk. En kopwe positiei, ngang ätewe poum a föri.

¹⁶Mürin kopwe aleani iteiten ipweipwen pechei, nge kosap nengenifichi ai kewe tipis.

¹⁷Kopwe amusala ai kewe tipis o atoauerela, kopwe pwölüela ai kewe föföringau.

¹⁸Usun ekewe chuk ra sönüla o möküla, eu achau a mwöküt seni lenian,

¹⁹usun ekewe koluk ra akükünala ekewe fau, nge püngümongun üt a apuela pwülün fanü, iei usun ka ataela än aramas apilükülüköch.

²⁰Ka akufu i tori feilfeilachök pwe esap chüen nom. Ka siwili wowon won mesan o tinala.

²¹Nöün kewe mwän ra tolong lon iteüöch, nge i esap silei, ra sapwilitiu, nge i esap küna.

²²A chök mefi püsin metekin inisin, a chök ngüngüres fän iten püsin i.”