1A arap ngeni ai üpwe mäla, üa weires le ngasangas, ewe peias a molotä fän itei.
2Ellet, mi wor chon turunufas ünüki, üa chök nenengeni ar ämängauaei.
3Ai Kot, kopwe püsin awora ewe pisekin pwärätä ka mochen angei seniei. Pun io chök a tongeni pwon fän itei?
4Ka pineela ar ekiek pwe resap wewe, iei mine kosap mwüt ngeniir pwe repwe pwapwa ren ar win.
5Are eman a afangamä chiechian fän iten an epwe angei liwinin, nöün kana repwe män echik.
6Kot a föri pwe aramas ra leaweniei lon ar kapasen turunufas, ra atufetä won mesei.
7Mesei a toputopula pokiten ai lolilen, nge pei me pechei kewe ra kichüchü usun ngünüwen mettoch.
8Aramas mi wenechar ra weitifengeniir ren ei, nge chokewe esap wor ar tipis ra palüeni chokewe resap aleasochisi Kot.
9Iei mwo nge ekewe chon pwüng ra chök föföri mine a pwüng, nge chokewe mi limöch pöür ra chök pöpöchökülela.
10Nge ämi meinisin, oupwe feito o kapassefäl, üsap küna mwo eman mi tipachem me leimi.
11Ränin manauei ra feil seniei, ai akot me mochenin letipei ra tala.
12Nge chiechiei ra apasa pwe a rän lupwen a pwin, ra pwal apasa pwe saram a arapoto, nge ngang üa silei pwe üpwe chök nom lon rochopwak.
13Are üa apilükülükü pwe ewe lenien sotup imwei, are üa anomu kiei lon rochopwak,
14are üa üreni ewe peias, ‘En semei,’ nge ngeni ewe moso, ‘En inei,’ ika ‘En fefinei,’
15ia a nom ie ai apilükülük? Iö epwe tongeni küna och apilükülük fän itei?
16Ai apilükülük epwe feitiu ren ewe lenien sotup. Sipwe feitiupök lon ewe pwül moromor.”
