1Mürin Hiop a pälüeni,
2“Üa rongorong fän chomong ekei sokun kapas. Ämi meinisin oua chon aururu mi lipwäkingau.
3Ifa usun, ekewe kapas mi pöön chök resap müchüla? Ika met a achouukemi pwe oua eäni ei sokun kapas?
4Ngang üpwe pwal tongeni eäni kapas usun chök ämi, are ämi oupwe nom lon ei sokun riaföü üa nom lon. Üpwe tongeni eäni chomong kapas ngenikemi o wichiki mökürei ngenikemi.
5Üpwe tongeni apöchökülakemi ren kapasen awei o alisikemi ren kapasen achipachip.
6Are üa fos, ai metek esap kisikisila, nge are üa fanafanala, ewe metek esap sü seniei.
7Ellet, iei Kot a apwangapwangaeila, a amochala chon leimwei meinisin.
8A föri pwe a pwach inisi. Ei a pwärätä an afeiengauaei. Üa kichüchü, nge aramas ra ekieki pwe ei liwinin ai tipis.
9Kot a atatakisi inisi ren an lingeringer. A asüngürü ngin ngeniei o ettina mesan ngeniei ren an oputaei.
10Aramas ra ämängauaei o pösapeei, ra achufengeniir o ü ngeniei.
11Kot a asechieilong lepöün chokewe mi föri föför mi ngau, a aturueilong lepöün ekewe aramasangau.
12Üa nom lon kinamwe. Nge Kot a turufi üei, a kupifeseniei o atatakisiei. A anomuei pwe an lenien ännen
13o likapichi ngeniei wokun föün esefich seni ekis meinisin. A posu ekewe föün lepeki, a ninätiu marasei won pwül, nge esap tongeei.
14A akinasafocheei. A sä ngeniei usun eman sounfiu mi afochongau.
15Üa üföüf üf seni tuk o soretiu chamwei lon pwül moromor.
16Won mesei a woparapar ren ai kechü, nge won apwölün mesei a cholokich.
17Iei mwo met a fis, nge üsap föri och föförün mwäneson, ai iotek a limöch.
18En fanüfan, kosap aopala ekewe föför mi mwäl ra fis ngeniei. Amwo ai tüngor pwe epwe fis pwüng esap ükütiu.
19Nengeni, mi wor nei chon pwärätä a nom läng, ewe chon peniei a nom pekitä.
20Chiechiei kewe ra turunufaseei, nge chönün mesei ra suputiu lon ai kechü ngeni Kot.
21Üa mochen pwe eman epwe tüngormau ngeni Kot fän itei, usun eman aramas a tüngormau fän iten chiechian.
22Pun mürin ekoch chök ier üpwe feila won ewe al, nge üsap chüen liwinsefäl seni.
