Hiop 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Iwe, Hiop a sopwela an pworaus o apasa,

²“Mwo manauen Kot ewe mi Unusen Manaman mi angei seniei ai pwüng o atatakisi letipei,

³ükükün fansoun ngasangasei epwe nom leuti o ngasangasen Kot a nom lon pwöti,

⁴tinawei esap apasawu kapas chofana, nge chönawei esap atowu kapas atuputup.

⁵Esap fokun tufich ai üpwe apasa pwe oua pwüng. Tori üpwe mäla, üsap ükütiu le apasa pwe üa wenechar.

⁶Üpwe kamwöchünük won ai pwüng, nge üsap mwüt ngeni pwe epwe feil seniei. Esap wor mengiringirin lelukei pokiten och föförün lon manauei.

⁷Amwo ewe chon oputaei epwe wewe ngeni eman aramasangau, nge ätewe mi ü ngeniei epwe wewe ngeni eman chon pwüngingau.

⁸Pun ifan än ätewe esap aleasochisi Kot apilükülük, lupwen Kot a angei manauan?

⁹Ifa usun, Kot epwe aüselinga an siö, lupwen osukosuk epwe tori?

¹⁰Ifa usun, epwe pwawaiti Ewe mi Unusen Manaman o kökköri Kot fansoun meinisin?

¹¹Üpwe aiti ngenikemi usun manamanen Kot, üsap opala mine Ewe mi Unusen Manaman a akota.

¹²Nge nengeni, ämi meinisin oua püsin küna ekei mettoch. Pwota chök oua eäni ena sokun fos esap wor lomotan?

¹³Iei usun mine Kot epwe föri ngeni eman aramasangau, iei liwinin ätewe mi ariaföüü aramas me ren Ewe mi Unusen Manaman.

¹⁴Ikamwo a wor chomong nöün, repwe chök mäla lon maun, nge mwirimwirin kana esap naf ener mongö.

¹⁵Chokewe mi manau me mürin repwe mäla ren mätter, nge pwülüer kewe mi lipichsefäl esap wor ar kölün kechü fän iter.

¹⁶Inamwo ika a achukuchukätä silifer usun chukuchukutän pwül moromor, ika a aioiätä üf usun ioien pwülüpar,

¹⁷ewe chon pwüng epwe üfeni ekewe üf, nge ätewe mi wenechar epwe angei ewe silifer.

¹⁸Ewe imw ewe aramasangau a aüetä a usun chök eu türün ninnä, usun eu likachoch eman chon mas a aüetä.

¹⁹A kon won kian o annut lon an pisekisek, nge esap chüen tongeni föri iei usun. Lupwen a nennela, wöün esap chüen nom.

²⁰Eniweniw a feito won usun chök eu noter, eu mölümöl a uweala lepwin.

²¹Ewe asepwälin ötiu a uweatä o pirumweela seni lon lenian pwe esap chüen nom.

²²Än Kot asepwäl a fokun eniti, nge esap wor tong lon, iei mine ätewe a müttir süla ren pöchökülan.

²³Aramas ra alopwa fän ämängau, ra ngääri pwe a towu seni lon lenian.”