Hiop 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Iwe, Elihu a sopwela le kapas,

²“Kopwe mwo witiwit ekis, mi chüen wor mine üpwe aiti ngonuk, pun mi chüen wor mine üpwe apasa fän iten Kot.

³Ai silelap a watte, üpwe aea le pwärätä pwe ewe Chon Föriei a pwüng.

⁴Pun ellet, ai kewe kapas resap mwäl. Eman mi fokun silelap a nom reöm.

⁵Nengeni, Kot a manaman, nge esap oput eman. Esap wor och i esap tongeni weweiti.

⁶Esap amwöchü manauen eman aramasangau, nge a ngeni ekewe mi mwelele ar pwüüng.

⁷A tümwünü ekewe chon pwüng seni feiengau, a mwüt ngeniir pwe repwe nemenem usun ekewe king o atekiaretä tori feilfeilachök.

⁸Nge are aramas ra fötek ngeni selimächä o nom lon riaföü,

⁹mürin, Kot a pwäri ngeniir ar föför me ar tipis pwe ra lamalamtekia.

¹⁰A suki selinger ngeni kapasen amirit o allük ngeniir pwe repwe kul seni ar föföringau.

¹¹Are repwe aleasochisi Kot o angang ngeni, repwe aunusa ierin manauer fän pisekisek me feiöch.

¹²Nge are resap mochen aüselinga, repwe feiengau ren ketilas o mäla lon ar miritimang.

¹³Iwe, chokewe resap aleasochisi Kot ra chök sossong. Nge lupwen Kot a apwüngüür, resap siö ngeni pwe epwe alisiir.

¹⁴Ra mäla lealüalür, manauer a müchüla ren ar föri föför mi äsäw.

¹⁵Nge Kot a angasa chokewe mi riaföü seni ar riaföü o kapas ngeniir lon ar weires.

¹⁶A pwal panukowu seni lon riaföü o anomuk lon eu leni mi chölap ia esap wor achachach ie. Om chepel a uren mongö mi anö.

¹⁷Nge iei Kot a apwünguk usun an apwüngü eman chon föföringau, a küük met mi pwüng ngonuk.

¹⁸Kopwe afäliik pwe esap wor eman epwe atupuk ren chomong wöü, kosap mwütätä eu watten lifangen amichimich epwe atokok.

¹⁹Ifa usun, om siö ika unusen om pöchökül repwe alisuk seni riaföü?

²⁰Kosap asüküsükü pwin, lupwen chon ekewe mwü ra kärila seni lenier.

²¹Kopwe afäliik pwe kosap kul ngeni föföringau, pun iei popun ka küna sosot ren riaföü.

²²Nengeni, Kot a tekia lon an manaman. Iö a eman chon kait usun i?

²³Iö a aiti ngeni mine epwe föri, ika iö a tongeni apasa ngeni, ‘Ka föri mine a mwäl?’

²⁴Kopwe chechemeni pwe kopwe ingeiti an angang aramas ra kölü lon ar köl.

²⁵Aramas meinisin ra küna mine a föri, ra chök tongeni nenengeni me toau.

²⁶Kot a fokun tekia, nge kich sisap tongeni weweiti. Esap wor eman a tongeni aleani ükükün ierin manauan.

²⁷A angeatä ekewe chiin koluk seni won pwül o siwili nüküchöchön ngeni üt.

²⁸Ewe üt a püngütiu seni läng o püngümongetiu won aramas.

²⁹Ifa usun, eman a tongeni weweiti usun an ameresala ekewe kuchu, pwal usun an apüngü chopulap seni lenian.

³⁰Nengeni usun an atoropasa ekewe inefi ünükün o pwölüela epin matau.

³¹Ren ekei sokun lapalap a apwüngü chon ekewe mwü, a pwal fangoto chomong mongö.

³²A amasoua pöün ren inefi o allük ngeni pwe epwe küw ewe lenien ännen.

³³Ewe chopulap a asisilätä pwe eu mölümöl epwe waroto, pwal ekewe pwiin kow ra silei pwe epwe war.