1Sa hinodana sa vivinei te Zobi. Zama si asa,
2“Zama hinokara si rau koasa Tamasa toana, sa Tamasa pu tagoi sari doduru ṉiniraṉira, pu vata lotaṉa au pa tinasigiti. Asa va kilasa au si rau pu loke qua ginugua sea.
3Sa beruqu si lopu kaqu zama nia si keke tiṉitoṉa kaleana, meke sa meaqu si lopu kaqu kokoha, sipu korapa toa qua si arau, meke sa siniṉo te Tamasa si koa nana pa isuqu,
5Lopu kaqu zama nia rau, sapu toṉoto sa vivinei tamugamu; kaqu toketoke nia rau sa qua tinoṉoto osolae mate si rau.
6Sa qua tinoṉoto si kaqu kopu eko nia rau meke lopu kote beto nia rau, loketoṉa kaiqa ginugua sea si gilania rau sapu kote pada pude zutu pule nau si rau.
7Sari qua kana si madi gua ari na tie kaleadi, saripu raza au si madi gua arini pu lopu tavetia sa tinoṉoto.
8Na sa si boka tavetia sa tie sapu lopu raṉea sa Tamasa, be vagi pania Tamasa sa nana tinoa?
9Lopu kaqu avosia Tamasa sa kinabo tanisa, pana raza sa tinasuna koasa.
10Lopu kote dogoria tugo sa sa qinetuqetu pa vinahesina sa Tamasa pu tagoi sari doduru ṉiniraṉira. Lopu kote varavara la tugo si asa koasa Tamasa doduru totoso.
11Maqu va tumatumaeni gamu sa ṉiniraṉira te Tamasa; sari na tinavete te Tamasa pu tagoi sari doduru ṉiniraṉira si maqu va bakali koa gamu.
12Ba lokari, gamu ele dogori mia si hire, na vea ke zama hoboro mae si gamu koa rau?
13Hie sa hinia tadi tie kaleadi kote poni ni sa Tamasa, sa tinago kote vala nia Tamasa pu tagoi sari doduru ṉiniraṉira koasa tie sapu loke nana tataru.
14Vea soku gua sari nana koburu ba kote mate beto mo pa vinaripera, sari tuna si kote mate mo pa inovia.
15Arini pu boka toa hola si kote mate pa oza, meke sari dia naboko ba lopu kaqu kaboi.
16Sari tie kaleadi si kote tago poata soku guana onone, meke kobi poko sapu soku hola nia sapu ta hivae,
17ba sari tie toṉoto kote va sagei sari poko arini, meke sari tie leadi kote variva hia ni sari poata.
18Sa vetu kuria sa si guana aba tanisa kaqa, guana ipi pa soloso tadi tie hukue.
19Na tie tagotagona totoso la puta si asa, ba totoso tukeli sa matana si loketoṉa tu si koa.
20Tarazuzu paleke vagina si asa guana naqe, na vivirua ovulu taloa nia pana boṉi.
21Sa givusu pa gasa rimata si paleke taloa nia si asa meke lopu koa, la sa meke saputu pania pa nana vetu.
22Hiru la raza koasa; loke nana tataru, sipu korapa hiva govete nia sa sa ṉiburuna sa givusu.
23Sa givusu ṉiṉirana si guana popohara lima meke va sisire, meke pavei govete gua sa ba hihiovo luli la tugo.
