1Gita doduru si podo pa barikaleqe, nada tinoa si papakana mo, meke siṉia tinasuna.
2Noma sage si gita meke tuturei harahara guana havoro; meke murimuri palae guana maqomaqo ene holana.
3Vea kaqu kopu totoko ni tu Agoi sari tie gugua arini, babe turaṉa vagi i pude Agoi na pitu i?
4Esei boka vagi vura nia si keke tiṉitoṉa viana koasa tiṉitoṉa sapu lopu viana? Loke tie!
5Agoi ele pada vekoi sari rane tana tie, Agoi gilania visa sidara si kote toa si asa. Ele pada i Goi meke lopu boka ta hobe.
6Ke Mu doṉo va seu koa gami; Mamu veko gami; mami qetuqetu be boka si gami koasa tinoa tasunana hie.
7Na huda ba rovea gita sapu kote toa si asa; be ta maho gore, ba kote tuvulu sage pule nana.
8Sari karosona si kote podalae mate luli, meke sari dadagana si kote popozu,
9ba pana tiqu la ia na kolo si kote liho vura nana mo, meke tuvulu sage guana linete vaqura.
10Ba gita na tie pude mate, si asa mo sa vina betobeto tadigita; mate si gita meke beto mo.
11Guana ovuku sapu beto totolo, meke na kopi sapu popa,
12sari tie sapu mate si lopu tekulu sage pule. Lopu kaqu vaṉunu pule si arini sipu korapa koa nana sa maṉauru; lopu kaqu hite niu si arini pa dia pinuta.
13Leana be tome paki au mo Agoi pa lovu; tome paki au mo vasina, osolae hola sa Mua tinaṉaziri. Leana be va nonoga vekoa Agoi sa totoso pude balabala pule au.
14Be mate sa tie, si vegua, boka toa pule mae si asa? Be gua asa, ba kote aqa qua si rau, aqa, osolae hokoto sa tinasuna hie.
15Meke kote titioko si Goi meke kote olaṉa si rau, na kote qetu nau Goi, arau pu tavetau Goi pa Limamu.
16Meke kote kopu luli ni Goi sari qua inene, ba lopu kote kopu luli ni Goi sari qua sinea.
17Sari qua sinea si kote voi tomei Goi pa huneke; kote nobi tamunu i Goi sari qua tinavete kaleadi.
18Ba lopu gua tu, sari na toqere si kote zuzulu, meke sari na toa si kote tava rizu taloa,
19Guana kolo sapu va murimuri pani sari na patu, meke na ruku sapu paleke taloa ni sari pepeso; si Agoi Tamasa sipu huara pani Goi sari lolomo tamigami pude koa va leana.
20Ṉiṉira holani gami Goi ke lopu boka si gami meke mate; pa minate hobei Goi kineha mami meke garunu taloani gami.
21Sari tumami si vagi vina lavata ba lopu gilania gami, meke lopu ta tozini gami totoso variva kurekure si arini.
22Va nonoga i mo gami sari tinasigiti pa tini mami, meke talotaṉa ni gami sari tinasuna pa mami tinoa.”
