Jopo 14

1

2

3

4

5

14

19

31

38

39

40

41

42

¹Jopome leya. Namwa endagimi manjisi porai ingya nalyamo dupwa yuu gii malu kararamo ingya nalyamopa randa doko simbwaro sipyamo karamano.

²Namwa ee rasinya ambwa sinya ingyapala dee pana narama ingilyamo. Namwa mee imambulinde karapala pana narama ingilyamo.

³Namba dopale ingyuo karo dokona Anatu embame namba nyuo pyalya pyana pyuo kandarese?

⁴Akali mendaki mendemepe renge karo petenge dupwana renge poo pyasi mende alowa pyuo pirami ingya nalu nao nalyamo.

⁵Banya yuu gii kanape karara dusipa embame lao retenge dokona kapa karapala yalara ingya nalyamo.

⁶Dokona baa maso rae maiyuo pyuo karenale yaki nyepala kae.

⁷Isa mende poko lakalyaminyi dokona dee imbu pira kata doko singiko. Doko dee kamba imbu pipala andengeko.

⁸Isa pokonge dokona sinju doko yando nao pingi dupwa rumbyuo pilyamopape

⁹imbu doko rangeme ipwa manjo andenge.

¹⁰Isa doko dopa pyuo pelyamopape akali baa kumuo otengepya. Baa kumapelyamopa dee anja epo karase?

¹¹Akali kumungi doko dee epa nangepya. Mee ipwa sokole lengepya.

¹²Yake doko singinyili pyuo silyamo dokopa akali doko luu palyuo sili lao kumasi sulu soo singipya.

¹³Anatu embame namba luu luu kumuo puu lapala yaki nyuo kaepili yaka. Dopa pipala embena imbu singi doko otaramopa namba dee suu pyaro lao yuu gii mende nyipili yaka.

¹⁴Akali doko kumara ramo doko dee lete eparase? Nambana randa epelyamo doko pao otaparamopa yuu gii elyape dokona epo kararo lao iso karapuli yaka.

¹⁵Dokopa embame namba kyakale larenepa namba wasiinyi dokome pii isingi laronopa emba rae maiyuo karare.

¹⁶Dopa pyuo paramo dokopa embame namba apa pyuo karena lao lee minyuo karapala koo piru dupwana yaka lao kara nare.

¹⁷Embame nyuo yalu pyuo retapala kame sakao kaeyare. Koo piru dupwa kwuanyi nemboko karare.

¹⁸Yuu kyau dupwa angi lakao nyingi. Rondo dupwana kana munjamae porai dupwa mendasa lakao pao singi.

¹⁹Kana dupwa ipwa nyingiko. Apu reeko dupwame yuu dupwa kalao soo pengeko. Doko suu pyao embame akali doko ene suu pyao karapya dupwa kata roko pyao kumasilini.

²⁰Emba keta iki porai renge palipala akali doko dopa pyuo dee epa nara lao pyao nembalu nembo nembelene. Banya lenge kambu doko alowa pyuo gyaa kyai pyuo kumuo pelyamo.

²¹Banya ikinyingi dupwa ketae pao akali ingyuo kararamipi panda randa mairaminyi isa paramipi lao sepa nao mee kopyali ingyuo kumuo pena letene.

²²Banya yanenge sii lapyamo dokona iki suu pyao kyawa sisingi baa rangena randa pipyamo dolapona iki suu pyao sepala kumulyamo.