Job 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ola pipul hu jidan laibala garram shotwan laif en dei jidan brabli soriwan.

²Wi jis laik det purdiflawa weya im binijap kwikbala, en det shedo weya im gowei kwikbala.

³Wal mi askim yu main God. Wotfo yu oldei lukinatbat langa mi? Yu garra gibit mi feyago langa kothaus?

⁴Nomo eni pipul iya jidan raitwei.

⁵Blanga wi taim langa dijan wel yubin meigim, en melabat kaan tjeinjim.

⁶Wotfo yu nomo libum melabat en larram melabat jidan gudbalawei wen melabat oldei dumbat adwek?

⁷“Wen sambodi kadimdan det tri, im stil gin gro igin.

⁸Blanga im rutpat im gin go nogudwan,

⁹bat if yu wodarimbat im garram woda, yu luk det tri im gedim nyuwan bushis en im jidan laibala.

¹⁰Melabat difrinwan. Wen melabat dai melabat binijap olagijawan. Melabat kaan neba gidap igin.

¹¹Melabat jidan jis laik det riba wen im stap ranranbat en jis laik det lilwan krik wen im jidan draiwan.

¹²Wen melabat dai, wi kaan neba gidap igin raidap det skai garra binij. Nomo enibodi gin meigim wi gidap brom det greib.

¹³Ai wandim yu blanga haidim mi langa greibyad weya detlot dedwan pipul oldei jidan, en if yu nomo wail langa mi enimo, yu garra jinggabat langa mi en yu garra seibum mi.

¹⁴“Wen olabat dai yu reken pipul garra gidap laibala igin? Nomeda aibin abum loda trabul bat stil ai garra weidabat blanga det taim.

¹⁵Yubin meigim mi en wen yu wandim mi, yu garra jingat langa mi, en ai garra ensim langa yu.

¹⁶Yu garra lukaftumbat langa mi, bat yu kaan kaundimat ol detlot nogudbala ting blanga main.

¹⁷Yu garra pudumwei olabat en yu garra fogedabat ol main nogudbalawei aibin oldei dumbat.

¹⁸“Langa dijan wel ola bigwan hil buldan en ola rok buldan du.

¹⁹Wen det rein im buldan brabli hebiwan, det woda im meigim det rok jidan rabishwan en im washimwei ola graun. Wal lagijat na yu oldei binijimap ola gudbala ting melabat oldei jinggabat.

²⁰Wen melabat dai yu tjeinjim det wei hau melabat luk en yu pudumwei melabat olagijawan.

²¹Melabat kaan jidan laibala blanga luk melabat bigininimob en sabi if olabat garra jidan gudbalawei o nogudbalawei.

²²Melabat oldei filim melabat ronwan pein, en wen melabat kraikraibat, wal im oni blanga melabat ronselp.” Lagijat na Job bin prei.