Job 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Job sogdebalid: “Dule gwalulenonikile, unnila sikwas gudii gued, ar bonigandi bukidar daed.

²Dulemar dutumaryobid. Dutumar argadele, bato dinguddaed, debayobi, dulemar gued. Sikwas-negsichid-nagunonidaeyobi, dulemar berguddaed.

³Bab-Dummad, ¿be deyob duledaedgi ataknasunde? ¿Be-asabin-igar-nabodagega be anse gornasunde?

⁴Degite, ¿ar doa ibmar-nued, ibmar-isganagi onogoe? Gege dule deyob imaked.

⁵Dulega ibagan-bergued bato sogles maid, bee be, bato ega niiwarbigwa-wilub-gudiguega ega ibagan mesisad. Degisoggu, gege a-ibagan-obicha gudii gued, ar deyob be imaksad.

⁶Mer bar egi be nakulege, ies be sae, na e-arbadiid-manigi wergudii be imakgwele.

⁷”Ar sapimarbela amba siklesale, gannar ainiardaed, degi, e-anagan dunguddaed.

⁸Ar sapi-e-malimar nungumai-inigwele, e-saila nungumai-inigwele,

⁹egi dii-aryoderdi, gannar sunna durgued. Sapi-gebe-diglesadyob e-anagan ainiardaed.

¹⁰Ar duledina, burgwisar bar daklegosulid. Ar dule burgwisale, ¿bia nadoe?

¹¹Ar igi demar dinguddae, degine, igi diwar dinguddabali,

¹²deyob dulemar berguddaed, bar gwisgusurdamalad. Ar mogir-arad-naid-berguedsega, geb dule-burgwismalad gwisgumaloed. Dule-burgwismalad e-gabmamaidgi geb atakdemaloed.

¹³”Be-urwemaid-berguedse neg-uangi be an-odukuena yeerban. Bitigi an-ebinsaega be ibagan nasikena yeerban.

¹⁴Dule burgwisale, geg bar gannar durgued. A-ulale, an-bendakleged-iba an bane-bane edarbedii gusaled.

¹⁵Geb agi be anse gornonikoed. An be-abin-imaknonikoed. Ar bee be, an-obinnisadsoggu, be yeer an-daknonikoed.

¹⁶Be an-gudiid emi be daked, an-isguedgindi bar be binsassulid.

¹⁷Ibmar-sagugi-ise-atinnar-melleddaedyobi, be an-isgued dikasuli meted. An-isgumalad bela be anga elisad.

¹⁸”Ar igi yar-dummad-mamaridele, akwamar-babatidele, baidsik ambakusdae, deyobi, be dule-e-ibmar-edarbediid be imaked.

¹⁹Ar igi-diimar akwamar-sabsursae, deginbali, diwar-dummad-nomaile, bela ese ibmarmar ebipilege, deyobi, dule-ibe e-bendakleged be osuloged.

²⁰Bela-bela be we-dule oitoged, be we-dule-obelogega imaked, bar e-wagar-daklesuli be imaked. Deyob, be we-dule neg-uanse barmeted.

²¹Ar e-mimmigan-nug ogannolenaile, we-duledi gwen bar wisguosulid. Ar e-mimmigan mesagwar-imaklenaile, we-duledi gwen wisguosulid.

²²Unnila e-san-nunmakedbi itoged, na e-nunmakdiidbali, wile-itodiid.”