Amɔɔsɩ 5

1

2

3

4

5

6

7

8

9

¹Ɩsɛɣɛlɩ nyǝ́mɑ ɩ́ nɩɩ mǝ sǝm wulɑ:

²Ɩsɛɣɛlɩ wɛ kɛ́ ɩsɩɩ pɛɛlɔ wei ɩ sǝpɑ tɔ. Ɩɩ tɑsǝɣɩ kʋlʋɣʋ. Pǝ́cɔ́ nɔɣɔlʋ kɑɑ kʋsɩ-ɩ.

³Mpi tɔ, Tɑcɑɑ Ɩsɔ yɔɣɔtɑ Ɩsɛɣɛlɩ tɔm sɩ: Ye yǝlɑɑ iyɑɣɑ (1000) polɑ yoou, nɩɩnʋwɑ (100) tike kɑ mǝlǝnɑ. Ye nɩɩnʋwɑ (100) polǝnɑ, nɑɑnʋwɑ kɛ pɩɩ sɔɔ.

⁴Tɑcɑɑ yɔɣɔtɑɑ sɩ: Ɩ kɔɔ mɑ kiŋ nɑ mɑ́ hɑ-mɛɣɛ weesuɣu.

⁵Amɑ ɩ́ tɑɑ polo Petɛɛlɩ, nɑ Kilikɑɑ, nɑ Pɛɛsepɑ ɑcɑlɛɛ tǝkɔtǝlɛnɑɑ. Pǝ tɑɣɑ pʋlʋ, pɑɑ kuu Kilikɑɑ nyǝ́mɑ, nɑ pɑ́ kpiisi Petɛɛlɩ nyǝ́mɑ.

⁶Yosɛɛfʋ lʋlʋɣʋ nyǝ́mɑ mɛ, ye ɩ́ cɑɑ weesuɣu, pǝ wɛɛ sɩ Tɑcɑɑ kɛ ɩ́ pɛɛkɩ. Tɔfɔ tɔɔ, ɩ́lɛ́ ɩ kɑ́ pǝsɩ kɛ́ ɩsɩɩ kɔkɔ nɑ ɩ́ nyɑɣɑ pǝ tǝnɑɣɑ Petɛɛlɩ. Nɔɣɔlʋ kɑɑ pǝsɩ kɑ teesuɣu.

⁷Wɑɩyo, ɩ́ lɑɣɑsǝɣɩ tɑmpɑnɑ nɑ ɩsɑɣɑtʋ, nɑ ɩ́ muɣuliɣi tɑmpɑnɑ nyǝ́mɑ.

⁸Tɑcɑɑ lɑpǝnɑ ɩsɔtʋlʋŋɑsɩ kɛ wɑɑnɩ wɑɑnɩ. Ɩnɩ ɩ lɑɣɑsǝɣǝnɑ sǝkpɛtʋɣʋ kɛ nyɑɑlǝm, nɑ nyɑɑlǝm kɛ sǝkpɛtʋɣʋ. Nɑ ɩ́ hɔŋ teŋku lʋm nɑ ɩ́ pǝlǝɣɩ tɛtʋ tɔɔ. Ɩ hǝtɛ ntɛ́ Tɑcɑɑ.

⁹Ɩnɩ ɩ kʋɣʋnɑ toŋtʋnɑɑ nɑ ɩ́ lɑkɩ pɑ koloosi ɑcɑlɛɛ kɛ ncɑɑ.

¹⁰Mǝ tɑɑ kpɑɑkǝnɑ tɑmpɑnɑ yɔɣɔtʋlʋ kɛ hʋʋlɛ tɑɑ kɛ́, nɑ wei ɩ hʋlǝɣɩ-mɛɣɛ mǝ tǝwɑkǝllɛ tɔ.

¹¹Ɩ́ muɣuliɣi ɑcɑmɑɑ nɑ ɩ́ ŋmɩɩlǝɣɩ pɑ kʋhɑlǝm. Pǝ tɔɔ kɛ́ ɩ́ kɑɑ nɩɩ mǝ kutuluŋ kʋpɑŋ leleŋ. Pǝ́cɔ́ ɩ́ kɑɑ tǝŋ mǝ lɛsɛŋnɑɑ kʋpɑmɑ sʋlʋm.

¹²Mɑɑ sɔɔkɩ mǝ ɩsɑɣɑtʋ tuutuumɑ tɑɑ nɑtǝlɩ. Ɩ́ muɣuliɣi yʋlʋpɑŋ nɑ ɩ́ mʋɣɩ kʋcɔɔŋ. Ɩlɛnɑ ɩ́ kʋɣɩ ɑcɑmɑɑ tɔm kɛ hʋʋlɛ tɑɑ.

¹³Tɑsǝkǝlɛ tʋɣʋ wɑɑtʋ kɔlɔ ɩnɛ. Pǝ tɔɔ kɛ́ lɑɣɑtʋnɑɑ sumɑ sɩ pǝ́ tɑɑ kɔɔ pǝ nɑ-wɛ.

¹⁴Ɩ́ yele ɩsɑɣɑtʋ nɑ ɩ́ lɑ kʋpɑntʋ. Ɩlɛnɑ Pǝ tǝnɑ pǝ tʋ Ɩsɔ wɛɛ mǝ wɑɑlɩ kɛ́ tɑmpɑnɑ, ɩsɩɩ ɩ yɔɣɔtʋɣʋ tɔ.

¹⁵Ɩ́ kisi ɩsɑɣɑtʋ nɑ ɩ́ sɔɔlɩ kʋpɑntʋ, nɑ ɩ́ tǝŋǝɣɩ tɑmpɑnɑ kɛ hʋʋlɛ tɑɑ. Ntɑnyɩ Pǝ tǝnɑ pǝ tʋ Ɩsɔ kɑ́ wii Yosɛɛfʋ lʋlʋɣʋ kɑkɑɑsɑɣɑ pǝtɔɔtǝlɛ.

¹⁶Ḿpʋ́ɣʋ́ Pǝ tǝnɑ pǝ tʋ Ɩsɔ Tɑcɑɑ yɔɣɔtɑɑ sɩ: Pɑɑ nɩɩ lǝyɑɣɑ wulɑ kɛ nɔnɔɔsɩ tɛɛ. Yǝlɑɑ kɑ́ mɑkɩ kɑpusi kɛ hɑpɛɛ tǝnɑ tɔɔ sɩ: Mpusi wei kɛlɛ, mpusi wei kɛlɛ? Pɑɑ yɑɑ hɑtɑɑ nɑ wiilɑɑ kɛ wiiu.

¹⁷Wɑɑtʋ wei mɑɑ kɔɔ yǝlɑɑ kɛ fɛlʋɣʋ tɔ, lǝyɑɣɑ wulɑ kɑ́ nɩɩ lɛsɛŋ tɑwɑ tǝnɑ tɑɑ.

¹⁸Tɑcɑɑ kʋyɑkʋ sɔsɔɔʋ tɑŋlɑɑ mɛ, pǝ tɑɣɑ nyɑɑlǝm kɛ ɩ́ kɑ́ nɑ́ kʋ wule yoo. Amɑ sǝkpɛtʋɣʋ kɛ́.

¹⁹Teitei ɩsɩɩ yʋlʋ seekuɣu tɔɣɔlɑɣɑ, nɑ ɩ́ sulinɑ kɑ cɑmnɑ, ɩlɛnɑ ɩ́ sʋʋ tǝyɑɣɑ nɑ ɩ́ teesinɑ koluŋɑ. Ɩlɛnɑ tʋm nyɑsɑ-ɩ tɔ.

²⁰Tɑcɑɑ kʋyɑkʋ sɔsɔɔʋ kɑ́ wɛɛ ḿpʋ́ɣʋ́. Kʋ tɑ kɛ nyɑɑlǝm nyǝŋkʋ. Amɑ sǝkpɛtʋɣʋ kɛ́.

²¹Ḿpʋ́ɣʋ́ Tɑcɑɑ tɔmɑ sɩ: Mɑ tɑɑ kpɑɑnɑ mǝ kɔtɑsɩ nɑ mǝ kotuŋ kɛ́.

²²Mǝ kɔtɑsɩ nsi kɔkɔ nyɑɣɑ sɩ tǝnɑ tɔ nɑ mǝ tɔɣɔnɑɣɑ nyǝŋsɩ lɩɩ-m sɔŋ. Mɑɑ tɩɩ cɑɑ mǝ nɑwee nim nyǝnɑ.

²³Ɩ́ yele kokoole kɛ mɑ ŋkpɑŋŋ tɑɑ sɩ ɩ́ yooki-m yontu. Mɑɑ cɑɑ mɑ́ nɩɩ mǝ cǝmǝŋ tɑŋ.

²⁴Pǝ kǝlɑ teu sɩ ɩ́ yele nɑ tɑmpɑnɑ wɛɛ mǝ hɛkʋ, ɩsɩɩ pɔɣɔ sɔsɑɣɑ ŋkɑ kɑɑ nyɔɔkɩ tɔ.

²⁵Ɩsɛɣɛlɩ nyǝ́mɑ mɛ, pɩɩsɩ nɩɩlɛ wei ɩ́ tɔmɑ wʋlɑɣɑ tɛtʋ tɑɑ tɔ ɩ́ lɑpɑ-m kɔtɑsɩ nɑ?

²⁶Ntɔŋ mǝ tɩɩŋ Sɑkutɩ nɑ Kewɑŋ wei ɩ́ sɑɑkɑ mǝ tɩ tɔɣɔ ɩ́ kɑ tɔkɑɑ nɑ ɩ́ lɑɑkɩ?

²⁷Pǝ tɔɔ kɛ́ mɑɑ yele nɑ pɑ́ ponɑ-mɛɣɛ Tɑmɑsɩ ɩcɑtɛ wɑɑlɩ kɛ Asilii tɛtʋ tɑɑ. Pǝ tǝnɑ pǝ tʋ Ɩsɔ mɑ́, mɑ yɔɣɔtǝnɑ mpʋ.