Amɔɔsɩ 8

1

2

3

4

5

6

7

8

9

¹Ḿpʋ́ɣʋ́ Tɑcɑɑ lɑpɑ nɑ mɑ tɑsɑ toosuɣu. Tɩɩŋ pee kʋpǝpɩɩnɑ nɑ tɔkʋ ntɛ́ mɑ nɑwɑ.

²Ɩlɛnɑ ɩ́ pɔɔsɩ-m sɩ: Pepeɣe n nɑɑkɩ, Amɔɔsɩ? Mɑ sɩ Tʋɣʋ pee wenɑ ɑ pɩɩwɑ tɔ ɑ tɔkʋ. Mpʋɣʋlɛ sɩ: Mɑ yǝlɑɑ Ɩsɛɣɛlɩ nyǝ́mɑ pɩɩwɑɣɑ, pɑ tɑlɑ pɑ tǝnɑɣɑ. Mɑ kɑɑ tɑsɑ-wɛɣɛ wiiu.

³Mɑ heelɑ-wɛ sɩ: Ɩsɔ Tɑcɑɑ mɑ, mɑ hʋʋlɛ kʋyɑkʋ wule, kɑwulɑɣɑ tǝyɑɣɑ tɑɑ yontu kɑ́ pǝsɩ wulɑ. Ɩlɛnɑ sǝtɑɑ sɔɣɔtɩ, nɑ pǝ́ sumɑ tiɣitiɣi.

⁴Ḿpʋ́ɣʋ́ Tɑcɑɑ tɔmɑ sɩ: Mpɑ mɛ mǝ fɛlǝɣɩ kʋnyɔntʋnɑɑ kɛ nɔɔhɛɛ, nɑ ɩ́ kʋɣɩ tɛtʋ tɑɑ wɑhɑlɑ nyǝ́mɑ,

⁵ɩlɛnɑ ɩ́ tɔŋ sɩ ɩsɔtʋ kʋfɑlʋ ɑcimɑ ɩɩ tɛŋ lɔŋ sɩ tǝ́ tɑɑtɩ. Aɑɩyee sɩ, kʋyɑkʋ kʋhɛɛsʋɣʋ nɑɑ tɛŋ lɔŋ sɩ tǝ lǝsɩ tɔɣɔnɑɣɑ pee nɑ tǝ́ pɑsɑ mɑɣɑsǝlɑɣɑ. Ɩlɛnɑ tǝ́ kpɑɑsɩ kɑ liɣitee. Nɑ tǝ́ lu sɑnǝyɑnɑɑ kʋmuɣullɑɑ,

⁶nɑ tǝ́ kpɛŋǝɣǝnɑ toolee nɑ tǝ́ pɛɛtǝɣɩ. Ye kʋnyɔntʋ tɑ pǝsɩ nɑ ɩ́ fɛlɩ-mɛɣɛ ntɑŋkpɑlɑ liɣitee, ɩlɛ ɩ́ kpɑ-ɩ yomle.

⁷Ḿpʋ́ɣʋ́ Tɑcɑɑ tuuwɑ sɩ: Nɑ tɛtʋ nti ɩ́ hɔŋnɑ mǝ tɩ ɩsǝntɔ tɔ, mɑ kɑɑ sɔɔ mǝ lɑkɑsɩ sǝnɛ.

⁸Pǝ tɔɔ kɛ́ tɛtʋ kɑ́ sele, nɑ tǝ tɑɑ yǝlɑɑ tǝnɑ cɑɣɑ lǝyɑɣɑ. Tɩɩ kpɑɑkɩ nɑ tǝ́ tiiki ɩsɩɩ Nili pɔɣɔ lʋm.

⁹Ḿpʋ́ɣʋ́ Tɑcɑɑ Ɩsɔ tɑsɑɑ sɩ: Kʋyɑŋkuɣu mɑɑ yele nɑ ilim tʋ pǝ sikuɣu wɑɑtʋ. Ɩlɛnɑ sǝkpɛtʋɣʋ nyɑlɑ tɛtʋ tǝnɑ tɔɔ.

¹⁰Mɑɑ pǝsǝnɑ mǝ ɑcimɑ kɛ lǝyɑɣɑ, nɑ mǝ lɑŋhʋlʋmlɛ yontu pǝsɩ wulɑ. Nɑ yǝlɑɑ tǝnɑ looli pɑ nyɔɔŋ ɩsɩɩ lǝyɑɣɑ nɑ pɑ́ suu lǝyɑɣɑ wontu ɩsɩɩ fɔlǝtɔnɑɑ tɑkɑ, ɩsɩɩ pǝyɑɣɑ ɩkpɑmlɛ sǝpǝnɑ. Ɩlɛnɑ pǝ tǝnɑɣɑ mpʋ pǝ́ pǝsɩ lɑŋwɑkǝllɛ kʋyɑkʋ.

¹¹Ḿpʋ́ɣʋ́ Tɑcɑɑ tɔmɑ sɩ: Mɑɑ kɔnɑ wɑhɑlɑ kɛ kʋyɑkʋ nɑkʋlɩ. Wɑhɑlɑ ɩnǝɣǝlɛ sɩ mɑ kʋyɔɣɔtʋtʋ nɩɩʋ kʋnyɩɩlʋɣʋ kɑ́ kpɑ yǝlɑɑ, nɑ pǝ kǝlɩ ɩsɩɩ nyɔɣɔsɩ yɑɑ lʋkɔtʋ kʋkʋɣʋ-wɛ tɔ.

¹²Pɑɑ cɔɔ yem kɛ́ tɛtʋ tǝnɑ, nɑ pɑ́ pɛɛkǝɣɩ sɩ pɑ́ nɩɩ mɑ tɔm, ɑmɑ pɑ kɑɑ nɑ.

¹³Kʋyɑŋkuɣu lʋkɔtʋ kɑ́ kʋ ɩfepiyɑ ɑkpɑlɑ nyǝ́mɑ, nɑ pɛɛlɑɑ kʋpɑmɑ, nɑ pɑ́ pi-wɛ.

¹⁴Nɑ mpɑ pɑ tuukinɑ Sɑmɑlii tʋɣʋ, yɑɑ Tɑŋ nyǝŋkʋ yɑɑ Pɛɛsepɑ nyǝŋkʋ tɔ. Pɑ tǝnɑ pɑɑ hoti, pɑ kɑɑ tɑsɑ kʋlʋɣʋ.