Amɔsu 5

1

2

3

4

5

6

7

8

9

¹Bɛɛ Isirelibɑ, i swɑɑ dɑkio i nɔ gɔɔ swĩi yi nɑ mɔ̀ bɛɛn sɔ̃.

²Bɛɛ be i wɔrumɛ temɔ nge wɔndiɑ be bɑ gu, i ǹ mɑɑ seemɔ. Goo sɑri wi u koo bɛɛ seeyɑ.

³Domi Yinni Gusunɔ u geruɑ u nɛɛ, bɛɛn wuu ge gɑ tɑbu durɔbu nɔrɔbu (1.000) mɔ, bɑ̀ n tɑbu dɑ, tɔmbu wunɔbuwɑ (100) bɑ koo wurɑmɑ. Ge gɑ mɑɑ tɑbu durɔbu wunɔbu mɔ, tɔmbu wɔkurɑ bɑ koo tiɑ.

⁴Wee ye Yinni Gusunɔ u mɑɑ bɛɛ Isirelibɑ sɔ̃ɔmɔ. U nɛɛ; ì n kĩ i n wɑ̃ɑ, wiyɑ i ko kɑsu.

⁵I ku mɑɑ sɑ̃ɑru dɑ Betɛliɔ kɑ Giligɑliɔ kɑ Beri Sebɑɔ. Domi u koo de bu Giligɑligibu yoru mwɛɛri. Kpɑ bu Betɛligibu kɑm koosiɑ.

⁶Bɛɛ be i rɑ gem gɔsie weesu, kpɑ i kun mu gɑrisi gɑ̃ɑnu, i nɑ wi, Yinni Gusunɔn mi, kpɑ i wɑ i n wɑ̃ɑ, kpɑ u ku rɑɑ bɛɛ Isirelibɑ wɔri u mwɑ nge dɔ̃ɔ. Kpɑ i goo biɑ Betɛliɔ wi u koo dɔ̃ɔ wi go.

⁸Yinni Gusunɔwɑ u kperi bwese bwesekɑ kuɑ, mɑ u yen bɑɑyere yi yen ɑyerɔ. U rɑ yɑm wɔ̃kuru gɔsie yɑm bururɑm. Kpɑ u de sɔ̃ɔ sɔɔ gu tĩrɑ, gu gɔsiɑ wɔ̃kuru. U rɑ nim wɔ̃kun nim mɛnnɛ, kpɑ u mu yɛ̃kɑnɑ tem kpuro sɔɔ.

⁹Wiyɑ u rɑ dɑmgibun dɑm bue. Kpɑ u de bu ben wusun gbɑ̃rɑnu kɔsuku. Kɑ gem, win yĩsirɑ Yinni Gusunɔ.

¹⁰Bɛɛ Isirelibɑ, be bɑ bɛɛ sirimɔ dee dee, i rɑ n bu tusɑ, kpɑ i n kɑ wi u gem gerumɔ kɔ̃ruɑ.

¹¹I rɑ bwɛ̃ɛbwɛ̃ɛbu dɑm dɔre, i n ben gbeɑn dĩɑnu mwɛɛrimɔ kɑ dɑm. Yen sɔ̃, i ǹ sinɑmɔ bɛɛn diɑ sɔɔ ye i bɑnɑ kɑ kpee ni i dɑ̃kɑ. Mɛyɑ i ǹ mɑɑ bɛɛn resɛm ye i duurɑn bii duronun tɑm nɔrumɔ.

¹²Domi u bɛɛn torɑnu yɛ̃ nu kpɑ̃, u mɑɑ yɛ̃ mɑ i durum kuɑ too. I gemgibu nɔni sɔ̃ɔmɔ. I nɔm birɑn kɛ̃nu mwɑɑmɔ. Mɑ i yinɑmɔ bu sɑ̃ɑrobu ben gem wɛ̃ siri yerɔ.

¹³Sɑnɑm mɛni, sɑnɑm kɔ̃sumɑ. Yen sɔ̃, wi u lɑɑkɑri mɔ, wiyɑ u ko n nɔɔ mɑɑri.

¹⁴I de i n geɑ mɔ̀ n kun mɔ kɔ̃sɑ. Kpɑ i wɑ i n wɑ̃ɑ. Nge mɛyɑ Gusunɔ wɔllu kɑ tem Yinni u ko n kɑ bɛɛ wɑ̃ɑ nge mɛ i rɑ gere.

¹⁵I kɔ̃sɑ tusio kpɑ i geɑ kĩɑ. I de gem mu siribu di siri yerɔ. Sɔrɔkudo Gusunɔ, wɔllu kɑ tem Yinni u koo bɛɛ Isirelibɑn tɔn be bɑ tiɑrɑ wɔnwɔndu kuɑ.

¹⁶Yen sɔ̃, Gusunɔ wɔllu kɑ tem Yinni u geruɑ u nɛɛ, tɔmbɑ koo gɔɔ wuri ko yɑm kpuro, kpɑ bɑ n sumɔ swɛɛ sɔɔ, bɑ n mɔ̀, wee, wee! Bɑ koo gbɑɑ wukobu sokumɑ bu gɔɔ wooru sinɑ, kpɑ bu gɔɔ swĩigibu mɛnnɑmɑ.

¹⁷Sɑnɑm mɛ u koo bɛɛ wɔrimɑ, kɑ be bɑ wɑ̃ɑ gberɔ kpuro bɑ koo gɔɔ swĩwɑ. Yinni Gusunɔwɑ u yeni geruɑ.

¹⁸Bɔ̃rurobɑ bɛɛ be i Yinni Gusunɔn siribun tɔ̃ru mɑrɑ. Mbɑ i yĩiyɔ i wɑ tɔ̃ɔ te sɔɔ. I n yɛ̃ mɑ tɑ ko n sɑ̃ɑwɑ yɑm wɔ̃kuru, n ǹ mɔ yɑm bururɑm.

¹⁹I ko i n sɑ̃ɑwɑ nge tɔnu wi u gbee sunɔ dukɑ suurimɔ, mɑ u kɑ yɑɑ gɔbɑ gɑɑ yinnɑ. Ye u duɑ win dirɔ u gɑnɑ nɛnuɑ, mɑ wɑɑ yɑ nùn dɔmɑ.

²⁰Yinni Gusunɔn tɔ̃ɔ te, tɑ sɑ̃ɑwɑ yɑm wɔ̃kuru n ǹ mɔ yɑm bururɑm. Tɑ tĩriwɑ niki niki, yɑm bururɑm sɑri.

²¹Yinni Gusunɔ u nɛɛ, u bɛɛn tɔ̃ɔ bɑkɑ ni i rɑ nùn diiye tusɑ. U ǹ mɑm mɑɑ kĩ u bɛɛn mɛnnɔsun woo nɔ.

²²Ì n nùn yɑ̃ku dɔ̃ɔ mwɑɑrɑrugiru kuɑ kɑ mɑɑ kɛ̃nu, u ku rɑ nu mwɛ. Mɛyɑ u ku rɑ mɑɑ bɛɛn siɑrɑbun yɑ̃kunu mɛɛri ni i rɑ ko kɑ yɑɑ sɑbe ni nu gum mɔ.

²³I kɑ bɛɛn womusun wɔkinu doonɔ win bɔkun di. U ǹ mɑɑ kĩ u bɛɛn mɔrɔkunun wurenu nɔ.

²⁴Adɑmɑ i de gem mu n wɑ̃ɑ bɛɛn suunu sɔɔ, mu n kokumɔ nge nim mɛ mu ku rɑ kpe.

²⁵Bɛɛ Isirelibɑ, i kɑ kuɑ wɔ̃ɔ weeru gbɑburu sɔɔ, i nùn yɑ̃kunu kɑ kɛ̃nu kuɑre nge mɛ?

²⁶Bũu wi bɑ mɔ̀ Sɑkutu wi i gɑrisi bɛɛn sunɔ kɑ sere kperɑ ye i sɑ̃ɑmɔ i mɔ̀ Kewɑni, i nin bwɑ̃ɑroku ni i tii kuɑ sɔɔre nge mɛ i sɔɔwɑ gisɔ? Bɛɛn tii i yɛ̃ mɑ i ǹ koore mɛ.

²⁷Yen sɔ̃, u koo de bu bɛɛ yoru mwɛɛri bu kɑ dɑ sere Dɑmɑsin berɑ giɔ. Wi, Gusunɔ wɔllu kɑ tem Yinniwɑ u yeni geruɑ.