AMƆƆSI 5

1

2

3

4

5

6

7

8

9

¹Kɛ̀ Kuyie mpɑ̃ɑ̃nɑ́ɑǹtì nɑ́ɑǹtòo bɛ́i nkɛ dɔ̀: Díndi Isidɑyɛɛribɛ kéntɛ́nɛ̀ fɛsɑ́útìfɛ̀ n sɑutɛ fɛ̀ di kpɛ́í.

²Isidɑyɛɛribɛ tu dɛsɑpùmbirɛ ndɛ kɛ do kɛ duɔ́ kɛ cɑ̃ɑ̃nko kɛ dò ndɛ̀ kú, wèè borɛ̀ íi nhò í bo.

³Kɛ̀ ti Yiɛ̀ nKuyie mbɛ́i nkɛ dɔ̀: Isidɑyɛɛribɛ ɛkɛ̀ miɛkɛ dìì kó bɛhɑ̃ɑ̃pɔ̀mbɛ̀ do bo tɛkɔùpíítɛ̀, bɛ̀ tɛ̃́nkɛ bɑ́ɑ́ pɛ̃ɛ̃tɛ́ tɛkɔ̀ùtɛ̀ (100). Bɛ̀ɛ̀ do bo tɛkɔ̀ùtɛ̀ (1000), bɛ̀ tɛ̃́nkɛ bɑ́ɑ́ pɛ̃ɛ̃tɛ́ tɛpíítɛ̀.

⁴Mí ndi Yiɛ̀ nKuyie mmíì di nɑ́ɑ́ ndíndi Isidɑyɛɛribɛ kɛ tú: N wɑmmúnɛ̀ kɛ̀ dɛ̀ɛ yie nkɛ̀ di nfòù.

⁵Dɛ̀ nɛ̀ í tú n yɛ̃ ndi kɔtɛ Betɛɛdi kɛ n tú di n wɑnti Betɛɛdi yóó dɔúnkomu, di mɛ mbɑ́ɑ́ kɔtɛ Kidikɑɑdi bɛ̀ yóó ò pɔ̀ntɛmu, di bɑ́ ntú di bo kɔtɛ Bɛɛrisebɑɑ.

⁶N wɑmmúnɛ̀ mí ndi Yiɛ̀ nKuyie, kɛ̀ dɛ̀ɛ yie nkɛ̀ di nfòù, kɛ̀ dɛ̀ í dò mmɛmmɛ muhɑ̃ɑ̃́ mbo cútóo kɛ dí do díndi Sosɛfu yɑɑ̀bí, dɛ yiɛ̀ mmɛ nyí bo Betɛɛdi wèè bo nɑ kɛ mù kùɔ.

⁷Di yónkùnnɛ tibeéntì nti, di í bekù kɛ̀ dɛ̀ sìɛ́.

⁸Mí ndi Yiɛ̀ nKuyie mmíì dɔ̀ɔ̀ siwɑ̃̀ɑ̃, míì ɔ̃ɔ̃ ceetɛ kɛyensɔ̀ùkɛ̀ kɛ̀ dɛ̀ɛ nɑɑ́ ndiwennɛ́cɑ̀nnì, míì ɔ̃ɔ̃ tíí ndɑ̀mɛ́ɛ̀rì kó mɛniɛ nkɛ́ mɛ̀ yɑɑtóo kɛtenkɛ̀. Míì tu di Yiɛ̀ nKuyie.

⁹Míì ɔ̃ɔ̃ duɔ́ nkɛ̀ bɛ̀ɛ pɔntɛ onìtì kperì, kɛ́tɑ o cɛ̃kpetɛ̀ kɛ́hɛí o kpɛrɛ.

¹⁰Di níímmu wèè bekùnɛ̀ timɔ́mmɔnti, di í dɔ́ wèè nɑ̀ɑ́ ntimɔ́mmɔnti.

¹¹Di fɛ̃́ũnko mɛ̀ɛ̀ kpɛ́í mbɛcĩ̀rìbɛ̀ kɛ duɔ́ nkɛ̀ bɛ̀ di dokìi dididɛ̀ì mɔ̀nnì. Nɛ̀ dɛ kpɛ́í di í tɑti sicɛ̃sɑ̀ɑ̀sì di mɑɑ́ sì nɛ̀ yɛtɑ̃́sɑ̀ɑ̀yɛ̀, di mɛ nyí yóó yɑ̃̀ fínyĩ̀ kó dɛtie ndi fìíkú dɛ̀ kó mɛnɑɑ̀.

¹²N yɛ̃́mu di cɑɑ̀rìmɛ̀ mɑ̀mɛ̀, di yɛi nyí sénní, díndi bɛ̀ɛ̀ fɛ̃́ũnko bɛ̀ɛ̀ í cɑ̀ɑ̀rɛ̀ mùmɑmù kɛ cɔú ticuuti tibeéntì miɛkɛ, bɑ́ di í kommu bɛcĩ̀rìbɛ̀.

¹³Dɛɛ̀ kpɛ́í nte yɛmɔ̀rɛ̀ yɛiyɛ yiɛ mmiɛkɛ kɑ̀ɑ bo ncĩ́ɛ̃́kɛ́mɛ̀ tɔ̃ũ.

¹⁴Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò bɛ́i nkɛ dɔ̀: Wɑmmúnɛ̀ mɛsɑ̀ɑ̀ nkɛ yóu mɛyɛi, nkɛ̀ dɛ̀ɛ yie nkɛ̀ di nfòù, mɛmmɛ Mpɑkɛdɑɑ m bo ndi bonɛ̀mɛ̀ kɛ ndònnɛ̀ n di nɑ́ɑ́mmɛ̀.

¹⁵Nníínnɛ̀ mɛyɛi kɛ́dɔkɛ mɛsɑ̀ɑ̀, tũntɛnɛ̀ tibeéntì kɛ́mbekù dɛ̀ bèkúmɛ̀, kɛ̀ dɛ̀ɛ yie nkɛ̀ Mpɑkɛdɑɑ kuɔ́ mmɛsémmɛ̀ Sosɛfu yɑɑ̀bí ìì kpɑɑ́.

¹⁶Ntɛ Mpɑkɛdɑɑ, Kuyie nkùù bɑkɛ́ dɛmɔu kù tu mù, kù tu isɑ́útìi bo dɑ́tínnɛ́ dihɛì dimɔu miɛkɛ, bɛnìtìbɛ̀ bo nkuɔ̀ ntipíìtì timɔu kɛ tú: Eeyoo! Eeyoo! Kɛ̀ bɛ̀ ńyu dɛpɑɑ nyɛmbɛ̀ kɛ̀ bɛ̀ bo kɑri mukṹṹ. Bɛnìtìbɛ̀ bo nwɑnti bɛ̀ɛ̀ nɔ mmukúdɑbònkɔmmù.

¹⁷Yɛkúdɑbùò mbo dɑ́tínnɛ́ dɛpɑɑ ndɛmɔu miɛkɛ kɛ yɛ̃́ n yóó di síékɛ́mɛ̀, mí ndi Yiɛ̀ nKuyie mmíì bɛ́i.

¹⁸Kɛ̀ ti Yiɛ̀ nKuyie mbɛ́i nkɛ dɔ̀: Di bo yɑ̀ díndi bɛ̀ɛ̀ bɑ̀ɑ̀ n kó diyiè, di yɛ̀mmɛ̀ dò ndɛ kó diyiè yóó di tɔnní bɑ? Dì yó ntú dibiìnnì ndi, di í yó ntú kuwenniku.

¹⁹Dɛ kó diyiè kpɛrɛ yó ndònnɛ̀ onìtì wèè cokù wenwe dicìrícìrì kɛ conɛ̀ kumuntonkù, kɛ kò nkɛ tɑ o cĩ́ɛ̃̀tɛ̀, kɛ ĩkú kumɑrí kɛ̀ fɛwɑ̀ɑ̀fɛ̀ ò dɔntɛ́.

²⁰Di yɛ̀mmɛ̀ bɑ́ ndò nKuyie nkó diyiè yó ntú kuwenniku kpɛri, dì yó ntú dibiìnnì ndi.

²¹Kɛ̀ ti Yiɛ̀ nKuyie mbɛ́i nkɛ dɔ̀: M pɛ̃̀mmu di kó mubɑ́ɑmmu, n dɛ̀ sènkɛ̀rìmu, n tɛ̃́nkɛ í dɔ́ kɛ́keè di tĩ̀rɛ̀ di tiku yɛ̀ kó kunɔ́ú.

²²N yí dɔ́ di n feu ìì wũɔ̃ kɛ tuɔ̀ nɛ̀ di m pɑ̃ɑ̃ nyɛ̀ɛ̀ pɑ̃rɛ̀. Yɛnɑɑdɑkɛ̀ mɛkùɔ̀ nkpɛyɛ di n feu yɛ̀, n yí dɛ̀ wùó!

²³Dí fũtɛnɛ̀ m borɛ̀, kutoweku di wékíí kù kɛ tú iyiɛ, n yí dɔ́ kɛ́keè di kutìdùùtì kó yɛdɑbùò.

²⁴N dɔ́ tibeéntì sɑ̀ɑ̀tì tiì mbo di cuokɛ̀, kɛ pũɔ̃̀ mmɛniɛ nkɔ̃mɛ, kɛ́ndò ndinɛ́bòrì ɔ̃ ndòmmɛ̀, kɛ bɑ́ɑ́ kṹṹ.

²⁵Isidɑyɛɛribɛ di do n feumu iwũɔ̃ yɛbie nsipísìnɑ̀ɑ̀ di do dɔ̀ɔ̀ yɛ̀ dikpɑ́ɑ̀ miɛkɑɑ̀?

²⁶Di do dɔ̀ɔ̀ dibɔɔ̀ Mɔdɔki nɛ̀ Defɑ̃ɑ̃ kó tɛwɑ̃̀tɛ̀ ntɛ kɛ́ ndɛ̀ bɑ̀ɑ́.

²⁷Dɛɛ̀ te kɛ̀ n yóó di dennɛ kɛ dí pɛ̃ɛ̃ mBɑbidɔnni, mí ndi Yiɛ̀ nKuyie mmí nwèè yètìrì tu Mpɑkɛdɑɑ míì bɛ́i.