Annabi Amosi 5

1

2

3

4

5

6

7

8

9

¹Wo wo tuli mati yi masenyi ra. N bara yi bɛɛti ba Isirayila bɔnsɔɛ ɲɔn fe ma.

²«Isirayila sɛniyɛntɔɛ bara faxa, a mu kelima sɔnɔn, a bara bira, mixi yo mu a rakelima.»

³Marigi Alatala naxa a masen, «Isirayila bɔnsɔɛ, Taa naxan xɛmɛ wulu keren xɛɛma gere sode, a xɛmɛ kɛmɛ nan gbansan toma gbilen na. Taa naxan xɛmɛ kɛmɛ xɛɛma gere sode, a xɛmɛ fu nan gbansan toma gbilen na.»

⁴Alatala naxa a masen Isirayila bɔnsɔɛ bɛ, «Wo fa n fen alako wo xa kisi.

⁵Wo naxa n fen Beteli, wo naxa siga Giligali, xa na mu a ra Beriseeba, barima Giligalika birin sigama nɛ konyiya kui, Beteli fan halakima nɛ.»

⁶Wo Alatala fen alako wo xa kisi. Xa na mu a ra, Yusufu bɔnsɔɛ, Alatala wo sɔntɔma nɛ tɛ ra. Betelika yo mu na naxan na tɛ raxubenma.

⁷Wo tan bara tinxinyi mafindi n naxɔnfe ra, wo bara yo sɛriyɛ ma.

⁸Alatala nan tunbuie sa koore ma, a dimi iyalan subaxɛ ma, a soge radula, kɔɛ xa so, a ye tongo baa ma, a na findi tunɛ ra, a goro bɔxi ma. Naxan na birin nabama, a xili nɛ Alatala.

⁹Alatala mixi xungbee halakima nɛ, a e xa yire makantaxie kana.

¹⁰E mixi xɔnma naxan kiiti sama sɛriyɛ ra, nɔndi falɛ mu rafan e ma.

¹¹Wo misikiinɛ tɔɔrɔma, wo baloe bama e yi ra duuti ra. Wo bara banxi tofanyie ti gɛmɛe ra, kɔnɔ wo mu fama sabatide nee kui. Wo bara wɛni sansi fanyie si, kɔnɔ wo mu fama na wɛni minde.

¹²N a kolon wo xa haakɛ nun wo xa yunubi gbo. Wo tinxintɔɛ tɔɔrɔma, wo sɛriyɛ bɛɲinma kɔbiri xa fe ra, wo mu setaree makiitima nɔndi ra.

¹³Na nan a toxi xaxilima dunduma, barima yi waxati mu fan.

¹⁴Wo fe fanyi fen, wo wo yi ba fe ɲaaxi ra, alako wo xa kisi, Mangɛ Alatala xa lu wo sɛɛti ma, alɔ wo a falama ki naxɛ.

¹⁵Wo xa fe ɲaaxi xɔn. Fe fanyi xa rafan wo ma. Wo xa kiiti xa tinxin. Xa wo na raba, tɛmunde, Mangɛ Alatala kinikinima nɛ wo tan Yusufu bɔnsɔɛ dɔnxɔɛe ma.

¹⁶Na nan a toxi won Marigi Alatala, Duniɲa Daa Mangɛ naxa a masen, «E e wa xui itema nɛ taa kui, e e wa xui itema nɛ kira xɔn ma. E xɛ sa xilima nɛ e xa e wa xui ite ɲɔn fe ma, e bɛɛtibae xilima nɛ e xa faxɛ bɛɛti ba.

¹⁷N nɛ dangima xɛ ra tɛmui naxɛ, n wa xui nan tun mɛma.» Alatala xa masenyi nan na ki.

¹⁸Ɲaxankatɛ na mixi bɛ naxan wama Alatala xa kiiti lɔxɔɛ xa fa. Wo wama munse xɔn ma na lɔxɔɛ? Na findima dimi nan na wo bɛ, Na mu findima naiyalanyi xa ra.

¹⁹Na luma nɛ alɔ mixi naxan a gima yɛtɛ ya ra, a fa sɔɲɛ li. A na so banxi kui, a a kilɔn banxi ra, bɔximase fa a xin.

²⁰Alatala xa kiiti lɔxɔɛ mu findixi dimi xa ra? Naiyalanyi yo mu na wo bɛ na lɔxɔɛ.

²¹«N bara wo xa sali xɔn, e mu rafan n ma fefe ma. N mu wama e xɔn feo.

²²Wo xa sɛrɛxɛ gan daaxi yo, wo xa farilɛ sɛrɛxɛ yo, wo xa xanunteya sɛrɛxɛ yo, e sese mu rafan n ma. N mu tinma e rasuxude, hali keren.

²³Wo bɛɛti xui makuya n na. N mu wama wo xa kɔra bɛɛti xui ramɛfe.

²⁴N wama naxan xɔn, tinxintɔɛe xa gbo wo ya ma alɔ ye naxan na baa ma. Wo xa fe fanyi xa lu alɔ xure naxan mu xɔrima.

²⁵Wo to nu na gbengberen yire ɲɛ tongo naani bun ma, wo sɛrɛxɛe ba nɛ? Ade.

²⁶Wo kuye maxanin nɛ, alɔ wo xa mangɛ ala, naxan xili Sikoti, xa na mu a ra wo xa tunbui ala, naxan xili Kiyun, wo naxee yailanxi wo yɛtɛ ra? Ade.

²⁷N fama nɛ wo xaninde konyiya kui Damasi xanbi ra.» Mangɛ Alatala xa masenyi nan na ki.