1Israel-dulemar, nue itomalo, gayaburba-wile-itoged-namaklegedgi, an bega namaksokalid.
2“Israel-dulemar yagwa-swilidik-yeerdaklegedyobid, be sabsur-omukulesmalad. Bar be gannar gwisguosulid. Napagi meremai be guoed, dule-be-ogwised sate guoed.”
3Bab-Jehová-Bur-Gandik-Maid, Israel-dulemarga weyob soged: “Neggwebur-gwensak sorda-miligwen (1,000) bila-onogedse-naele, unnila dulatar (100) durgumaloed. Ar neggwebur-gwensak dulatar (100) bila-onogedse-naele, unnila e-ambe (10) durgumaloed.”
4Bab-Jehová Israel-dulemarga weyob soged: “Be an-amimalale, be dula-gudii gumaloed.
5Melle be Betel-neggweburse bar namala. Gilgal-neggweburse melle be bar namala, degi, Beerseba-neggweburse melle be bar namarbali, ar ade, Gilgal-dulemar galesa seledmaloed, degi, Betel-neggweburdi bela berguoed.”
6Bab-Jehová be amimala, adi, be dula-gudii gumaloed. Degisulile, Bab-Jehová José-wagangi sooyobi aidenonikoed, We-soo, bela Betel-neggwebur ogumakoed. Dule we-soo-oginnega sate guoed.
7Igar-innikigwadi, igar-isganaga be imakmalad. Bur Igar-napiragwadi obanagwar be imakmalad.
8Bab-Dummad niisgwa-danaled Pléyadesʼye-bileged obinnisad, degi, niisgwa-baigan Oriónʼye-bileged obinnisbalid. Bab-Dummad neg-sipusulidi, neg-meegwadga imaked, degi, neg-meegwad, negsichidga imakbalid. Bab-Dummad demar-bukibse goled. Geb napneggi dii-owiega imaked. ¡E-nuga, Bab-Jehováʼye nugad!
9Bab-Jehová neggandikmalad osuloged, dule-ambikued-neggandikmalad osulobalid.
10Bemar, igar-nudaked-neggi dule-igar-nudakega-arbamaladi, isdar dakmalad, degi, dule-napira-ibmar-soged, isdar be dakmarbalid.
11Ar bemar, dule-wilegana ibigwensuli imakmarsoggu, degi, orosgi-dakleged-trigoʼgi, mani-galeged-bennuked ega be igar-mesismarsoggu, a-ulale, be-akwa-neg-sobsamaladgi, be megosurmalad. Degine, nainugi be-uva-naid-e-vino gwen be gobosurmalad.
12Bemar-ibmar-isgana-yaisur-imaksad an wisid, be-isgumalad-yaisulid an wisid. Bemar, dule-innikigwad ibgwensur imaked, igar-nabolemaladgi emarse be manigi baklemalad. Degine, igar-nabolegedgi dule-wileganagi be gwisgumalad.
13Agala, weyob neg-gunaidgine, dule-binsaed-nikadaedi bogi gudidaed. Ar ade, we-ibagande nuedsulid.
14Melle igar-isgana be amimala, bur igar-nued be amimala, adi, be dula-gudii gumaloed. Degidbali, Bab-Dummad-Jehová-Bela-Gangued-Nikadi, bemarba gudii guoed.
15Igar-isgana be obane, igar-nuedbina be soge, igar-nabiroleged-neggi, igar-innikigwadba igar be nabomala. Abakale, Bab-Dummad-Jehová-Bela-Gangued-Nika-Maid, José-wagan-besmalad wile dakalile.
16Agala, Bab-Dummad-Jehová-Bela-Gangued-Nika-Maid weyob soged: “Bela-dule-ambikumaladgi, dulemar-ise-boale itolegoed, degi, bela galimbaba wile-itolegedba binnasur-gornanai itolegoed. Bomalaga sapur-dorganse gorlegoed, degi, bomalaga dulemar-manigi-bomaladse gorlegoed.
17An sabsur-bemar-wiodanikile, bela uva-digarmaladba dule-boe itolegoed. Ani an Bab-Jehová-guedi weyob soged.”
18Dule, Bab-Jehová-sabsur-odurdaked-iba-abitogele, ¡duledar-wilesmar! ¿Ar ibiga we-ibade edarbesunna? Ar we-iba negasichidbi naguoed, neg-meegwad naguosulid.
19Dule aisaar achumigur-idu-wakinmaiyob guoenad, degi-inigwele, wiob-abingudagoed. Deyobiyobi, a-iba ega guoed. Dule e-negyaba-dogmaile, galugi akadapiyob guoed, galugi-akadapidba naibegi-warmaksayobi guoed. Deyobiyobi, a-iba ega guoed.
20Bab-Jehová-sabsur-odurdaked-ibade negasichidbi-nai guoed, neg-meegwad-nai guosulid. Bela neg-gubyagwaledbi-nai guoed, neg dale-dalesaar daklegosulid.
21Bab-Jehová sogdebalid: “Ibamar be anga onogedi, an isdar-daked. Bemar bulakwaa an-nug-odummogega itoakwaa-anse-gormaladi, yeer-ito an-imaksulid.
22Ar bemar anga be-ibmar-ogumakar-ukleged ukele, an abingaosulid. Ibmar-gwagmar anga be ukele, an abingaosurbalid. Amba gwenatigwar-guega moli-bebe-nikad-senigana-wardummagan-ukleged, an be-ibe abingaosurbalid.
23Be-namaked-oimaksiid an itobisulid. Be-gar-cítara-goled, an itobisulid.
24Bur, dii-aryomaiyobi, igar-naboleged galesuli selemai abeleged, degi, diwar-suurmakmaiyobi, igar-innikimalad selemai abeleged.
25”Israel-dulemar, bemar birga-dulabo (40) nega-dulesulidganba gudigusmargua, ¿anga be napiragwadgi ibmar-ogumakar-ukleged uksamarsi? ¿Anga be napiragwadgi ibmar-ukleged uksamarsi? Suli.
26Emide, bemarde nuchu-Moloc-e-neg-sobaled be semamaid. Degi, nuchu-Quiún be semamaid. Wemarde niisgwa-e-nuchumar-nanaed, bemar we-ibmarmar-sobsamaladi, gwen Bab-Dummadsulid.
27Degisoggu, dikasuli Damasco-neggwebur-dakasik an be-balimetemaloed.” Bab-Jehová deyob soged. E-nuga, Bab-Dummad-Bela-Gangued-Nikadye nugad.
