Amɔɔsɩ 3

1

2

3

4

5

6

7

8

9

¹Ḿpʋ́ɣʋ́ Tɑcɑɑ tɑsɑɑ sɩ: Ɩsɛɣɛlɩ nyǝ́mɑ mpɑ mɛ mɑ lǝsɑ Icipiti tɔ, mɛɣɛ mɑ yɔɣɔtǝɣɩ tɔm tǝnɛ.

²Mǝ tike kɛ mɑ sɔɔlɑ ɑtɛ yǝlɑɑ tǝnɑ tɑɑ nɑ mɑ́ lǝsɩ. Pǝ tɔɔ kɛ́ mɑɑ pɔɔsɩ-mɛɣɛ ɩsɑɣɑtʋ tǝnɑ nti ɩ́ lɑkɩ tɔ.

³Yǝlɑɑ nɑɑlɛ kɑ́ kɑɑ mpɑɑʋ nɑ pɑ tɑ mɑɣɑsɩ kʋ tɔm?

⁴Tɔɣɔlɑɣɑ kɑ nyɩɩsɩ yem kɛ́ hɔtʋɣʋ tɑɑ nɑ kɑ́ tɑ́ hiki tɔɣɔnɑɣɑ? Ye tɔɣɔlɑɣɑ pǝyɑɣɑ tɑ kpɑ pʋlʋ, kɑɑ kiisi yem kɛ́ kɑ tɑntɛ tɑɑ?

⁵Sumɑɣɑ kɑ tii yem kɛ́ ɑpɑɩ tɑɑ nɑ kɑ́ tɑ́ nɑ toolee? Yɑɑ puluɣu kɑ́ kpǝtɩ yem nɑ kʋ tɑ puu pʋlʋ?

⁶Pɑɑ hʋlɩ ɑpɑlʋtutuɣu kɛ yem nɑ yǝlɑɑ kɑɑ nyɑ? Yɑɑ wɑhɑlɑ kɑ́ tii ɩcɑtɛ tɑɑ kɛ́ yem nɑ Tɑcɑɑ mɑ́ mɑ tɑ kɔnɑ-ɩ?

⁷Mpʋ tɔ, ye tɔɣɔlɑɣɑ ɩ́ nyɩɩsɑɑ ɑweɣe sɔɣɔntʋ kɑɑ kpɑ? Yɑɑ ye Tɑcɑɑ mɑ́ mɑ yɔɣɔtǝnɑ ɩlɛ pɑ kisi mɑ tɔm tɛlǝsʋɣʋ? Pɔpɔtʋ fɛɩ leleŋ, Ɩsɔ Tɑcɑɑ mɑ́ mɑ kɑɑ lɑ pʋlʋ nɑ mɑ́ ŋmɛsɩ Ɩsɔ kʋyɔɣɔtʋtʋ tɛlǝsǝlɑɑ.

⁹Tɑcɑɑ sɩ: Ɩ kpɑɑlɩ Asǝtɔtɩ nɑ Icipiti pǝ kɑwulɑsɩ kutuluŋ nyɔɔŋ tɑɑ. Yǝlɑɑ ɩ́ kpeɣeli Sɑmɑlii pulɑsɩ tɑɑ, nɑ ɩ́ nɑ́ ɩsɑɣɑtʋ sɔsɔɔntʋ nɑ mʋsʋŋ wei pɑ lɑkɩ tɔ.

¹⁰Pɑ tɑ nyɩ mpi pɑ yɑɑ yɑɑsi kʋpɑŋ tɔ. Mpi pɑ lɛɛkǝɣɩ mʋsʋŋ nɑ pɑ́ ŋmɩɩlǝɣɩ tɔɣɔ pɑ nyǝkɑ pɑ kɑwulɑsɩ tɛɛsɩ tɑɑ.

¹¹Pǝ tɔɔ kɛ́ kolontu kɑ nyɑlɑ mǝ tɛtʋ. Ɩ kɑ́ yɔkɩ mǝ koloosi nɑ ɩ́ kuu mǝ wontu.

¹²Ḿpʋ́ɣʋ́ Tɑcɑɑ yɔɣɔtɑɑ sɩ: Teitei ɩsɩɩ tɔɣɔlɑɣɑ kpɑɑkʋɣʋ heu nɑ tiikulu hiki nɔŋkpɑɑsɩ yɑɑ ŋkpɑŋʋɣʋ titite kɛ ɑseetɑ tɔ, ḿpʋ́ɣʋ́ pɩɩ lɑ Sɑmɑlii nyǝ́mɑ nɑ pɑ kpelɑsɩ kʋpɑŋsɩ.

¹³Ḿpʋ́ɣʋ́ Tɑcɑɑ Ɩsɔ Tomɑ tǝnɑ tʋ kpɑɑlɑɑ sɩ: Ɩ́ tɛlǝsɩ Yɑkɔpʋ lʋlʋɣʋ nyǝ́mɑ sɩ

¹⁴kʋyɑkʋ nɑkʋlɩ mɑɑ kɔɔ Ɩsɛɣɛlɩ nyǝ́mɑ mɛɣɛ lɛɛtʋɣʋ kɛ mǝ ɩsɑɣɑtʋ. Mɑɑ wɑkǝlɩ Petɛɛlɩ tǝlɑɑlɛnɑɑ, nɑ mɑ́ kpɛsɩ kɔtɑɣɑ tǝlɑtɛ hǝlǝŋɑsɩ.

¹⁵Mɑɑ yɔkɩ toŋtʋnɑɑ lʋŋlɛ kutuluŋ, nɑ yolumɑ nyǝŋ. Pɑ kutuluŋ wei pɑ lɑpɑ kɑcɔkɑ nɑ tuuŋ kelɑ tɔ, nɑ pɑ ɑtɛ nɑ ɩsɔ kutuluŋ nɑ ɩ́ pǝsɩ ncɑɑ. Tɑcɑɑ mɑ́, mɑ yɔɣɔtǝnɑ mpʋ.