Emosi 5

1

2

3

4

5

6

7

8

9

¹Mi avosia sa zinama hie, gamu na butubutu Izireli, sa kinera lukalukana hie pa gugua mia gamu:

²“Hoqa se Izireli, sa Vineki Vaqura, lopu pude tekulu pule, ta luara palae pa nana popoa soti, meke loke tie si koa pude ovulu sage nia.”

³Hiera gua si zama nia e Zihova sa Baṉara: “Sa vasileana lavata sapu garunu taloa keke tina varane, si kote keke gogoto mo si kekere pule; sa vasileana hite sapu garunu taloa keke gogoto varane si kote ka manege puta mo si toa.”

⁴Hiera gua si zama la nia e Zihova koasa butubutu Izireli: “Hata Au pude mi toa;

⁵lopu la hata ia se Betolo, lopu la pa Qiliqali, lopu ene va seu la pa Biasiba. Ura se Qiliqali si kote ta raovo taloa, meke se Betolo si kote murimuri taloa.”

⁶Hata ia se Zihova pude mi toa, pude lopu gua si kote halala si Asa pa butubutu te Zosepa guana nika; kote variva mate si asa, meke loke tie pa Betolo kote boka va noso ia.

⁷Agoi pu iliri va pasa ia sa ṉinoṉo meke neti gore nia pa pepeso sa tinoṉoto.

⁸E Zihova si asa pu tavetedi sari pinopino Peliadesi meke Orioni, pu iliri va vaqavaqasa ia sa hinuporo meke va huporo ia sa rane la pa boṉi, pu tioko vagi kolo pa lamana pude va ruku boboso ia sa pepeso, e Zihova sa Pozana Sa.

⁹Asa tuturei huara i sari vasidi ṉiṉiradi meke ilasi sari vasileana ta gobadi.

¹⁰Gamu si kana i si arini pu gegegese pa koti meke hakohako ni si arini pu tozi ia sa hinokara.

¹¹Neti gamu sari pu malaṉa meke zuzuki gamu pude poni gamu huiti. Gua ke, sari vetu patu leleadi sapu ele kuri i gamu si lopu kote koa i gamu; sari inuma vaeni masurudi sapu ele lete i gamu, si lopu kote napo i gamu sari vaeni koa rini.

¹²Ura Arau tumae ni Qua visa ṉavulu sari mia tinavete kaleadi, meke vea noma gua sari mia sinea, ṉoṉovali gamu sari tie toṉoto meke vagi tinabara golomo meke hukati gamu pa koti sari vinilasa va toṉoto koari na tie malaṉa.

¹³Gua ke sa tie gilae si kote lopu kulu pa totoso gua arini, ura kaleadi sari totoso.

¹⁴Mi hata ia sapu leanana lopu sapu kaleanana, pude mi toa. Meke se Zihova Tamasa Tadi na Qeto Minate si kote koa koa gamu, gua sapu tozi ia gamu si gua tugo si Asa.

¹⁵Kana ia mo sapu kaleana, tataru nia sapu leana; kopu nia sa vinilasa va toṉoto pa korapa vetu varipitui. Hokara kote koa ia tataru se Zihova Tamasa Tadi na Qeto Minate koari ka visavisa tie koa holadi pa tutina e Zosepa.

¹⁶Gua ke hiera gua si zama nia e Zihova, se Zihova Tamasa Tadi na Qeto Minate: “Na uui si kote koa pa doduru sisiraṉa meke na kabo ta sigiti si kote ta avoso koari doduru varivarigarana. Sari tie lelete si kote ta tioko pude taruqoqo meke ari tie ta tabaradi pude lukalukana si kote uui.

¹⁷Na uui si kote pa doduru inuma vaeni, ura na kote ene nuquru gua si Arau pa vari korapa mia,”

¹⁸Mi talotaṉa si gamu pu aqa nia sa rane te Zihova! Na vea ke aqa qetuqetu nia gamu sa rane te Zihova? Asa rane si kote huporo sa popoa, lopu kalalasa.

¹⁹Kote gua sa tie sapu govete nia sa si keke laione meke tutuvu ia sa si keke bea, gua na tie sapu nuquru pa nana vetu meke va magogoso ia sa limana pa gobagoba si ta garata noki tu.

²⁰Vea, lopu kote huporo tu sa rane te Zihova, lopu kalalasa, dudukurumu toa, loke vasi kalalasana?

²¹Zama se Zihova, “Arau kana hola i, lopu hiva hokara ni Arau sari mia rane inevaṉa; maledere hola ni Arau sari mia vinarigara.

²²Pana paleke mae ni gamu koa Rau sari vinukivukihi va uququ meke vinariponi huiti, ba lopu kote qetu ni Arau. Pana paleke mae vinukivukihi binaere leleadi gamu, ba lopu kote arilaedi koa Rau si arini.

²³Va taloa i sari mia kinera vinahesi vevehedi! Koroqu avosi Arau sari mia mike hapu sara.

²⁴Ba mi va malumu ia sa ṉinoṉo pude totolo guana ovuku, sa tinoṉoto pude guana tototolo sapu lopu hite popa!

²⁵Kei gamu na butubutu Izireli, vea, hoke paleke mae ni gamu koa Rau sari mia vinukivukihi meke vinariponi koari ka made ṉavulu puta vuaheni pa soloso qega?.

²⁶Lokari. Ba kamahire sa kinehana sa mia beku Sakuti sapu poza nia baṉara gamu si ovulu sage nia gamu, meke Kaivani sa mia tamasa pinopino sapu telemia taveti.

²⁷Gua ke kote garunu taloa ni gamu Arau pa tinaraovo la pa kali la Damasikasi,” zama gua se Zihova, sa Tamasa Tadi na Qeto Minate sa Pozana Sa.