Isaías 44

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Jehová soged: “An-mai-Jacob-dulamar, Israel-dulamar-an-na-susad. ¡Emigi, nue be an-itogo!”

²Weyob Bab-Jehová-be-obinnisadi, sapibeneggi be-omesisadi, be-bendakmaidi, soged: “Jacob-dulamar, melle be dobgu, be an-mai gued, Jesurún, ani an be-susad.

³Napa-dinnaganaba dii-suurmakega an imakoed, nega-dinnaganaba dianmar an omesoed. Be-wagangine, An-Burba an odegoed, be-anagangine, ise-nued an binsaoed.

⁴Gagan-oglegwichiyobi gumaloed, dianmar-gaka-nagaba sapi-senigana-gwigwichi-daeyobi gumaloed.

⁵Dule-gwensak sogdagoed: ‘An Bab-Jehováʼgad gued.’ Dule-baiddi ‘Jacobʼye’ nugguoed. Dule-baidmoga e-argangi weyob narmakoed: ‘Ani an, Bab-Jehováʼgadi.’ Geb Israel-nug e-nugga imakoed.”

⁶Weyobi, Bab-Jehová, Israel-dulemar-e-Rey, Israel-dulemar-Bendakmaidi, degi, Bela-Gangued-Nikadi, soged: “Ani an gebesailadid, anse bergunaibalid, Bab-Dummad-baidi sulid.

⁷¿Doa anyob gusunna? ¡Dule anyobile, sunmakdo! An an-dulamar-urbisad-akale, ibmarmar-gusad sogdo. ¡An-asabin, yoo-ibagan-guoedgi sunmakdo!

⁸¡Melle be gwayemar, gandik be imakmar! ¿Ar bato an bega sogsasursi? ¿Dikasurgus an be-owisossursi? Ar bemar an-barsogega gumalad. ¿Ar Bab-Dummad-baid maisi? Suli. ¿Bab-Dummad-baid bebina-sogedi maisi? Suli. Gwen Bab-Dummad-baid-gudii an dakdisulid.”

⁹Dule ibmar-bab-dummadyob-imakleged-sobmaladi, ibmar-nuedga gusulid. E-ibmar-bur-yeerdakle-sobarmaladi, gwen ibmar-nuedga gusulid. E-sobmaladi, na wismalanad, we-ibmar-bab-dummadyob-imaklegedde, aku atakmalad, uaya yallirmalad.

¹⁰Dule-bab-dummad-baid-sobedi, we-ibmar ega ibmar-nuedga gusulid. Degi, esgoro-diregwadgi bab-dummadyob-imakleged-sobedi, we-ibmar ega ibmar-nuedga gusulid.

¹¹Bela dule-ega-san-uksamaladi, bingedar itomaloed, we-ibmar-sobedgi-arbamaladi, unnila dulemar gumalad. Bela bular ambikudamarsun, bela dagmarsun. Ar bela ise-gwayar bukudmaloed, nue-bingedar itodmaloed.

¹²Dule-esgoro-sobed, esgoro amied. Geb soo-ginnitibidgine, esgoro mesed. Geb mardogi sarsogar bab-dummadyob-imakleged sobed. Ise nuesaar imaked. Ar dule-esgoro-sobedi, mas-gunsuli-arbanaile, gobsurbalile, nolloleddaed.

¹³Dule-ibmar-sobedi, suargi-ibmar-soboed dubgi wilub-imaked. Geb esgoro-garagwadgi ibmar sobed, ibmar-orokwaa-saedgi wagar-wilub-onoged. Geb a-sorbali, akwa duleyob-daklege, degi, yeerdaklege sobed, adi, neg-bipigwad-yaba ogwisegar.

¹⁴Dule-baigan nikabalid, urwar-digmalad. Geb dii-wiedi a-urwarmar odummoged. Geb urwar siklegega bukidar nika gunonikoed. Ciprés-warmardibe, barya-warmardibe, sapurba digdamalad, nue-odummogedse imakdamalad.

¹⁵Geb dulemar e-anagan soo-ogaega imakdamalad. Dule waegala, sapan-negabala ogadamalad. Egi soo-ogasale, madu yodamarbalid. Deginbali, egi suar-nuchu sobdamarbalid. Geb e-nug-odummoddamalad. Ibmar-sobaled-bab-dummadyob-imakleged sobdamarbalid. Geb asabin yokorgi-sindigar sigdamalad.

¹⁶Abala, a-suar, sapanga imakdamalad. Egine, geb na mas dudamalad, degi, san nariddamarbalid, geb nue-immelesdamalad. Geb deginbali, egi wadamarbalid. Sogdedamalad: “Soo-gasgu, wis uka-uegus-itole.”

¹⁷Geb suar-gwabgusadgi, suar-nuchu sobdamalad, e-bab-dummadga imakdamalad. Geb asabinni yokorgi-sindigar sigdamalad, e-nug odummoddamalad. Geb ise-wilegar ega sogdedamalad: “Be an-bendake, ar bee be, an-bab-dummadid.”

¹⁸Ar we-dulemar ibmar wissurmalad. Akusunna ibmar itomalad. Ar nue-atakmar-inigwele, akusunna ibmar dakmalad. Neg-aku-itomaladid, akusunna ibmar-itomaladid.

¹⁹Amba ibmar-wisgued napid. Amba magar-ibmar-itoged abeged. Ar gwen weyob binsasurmalad, weyob sogsurmalad: “Suar, abala madu-yoega an ebusad, abala an egi san-narisbalid, a-san an guchad. ¿A-suar-gwabgusadgi, an ibmar-isgana sobode? ¿Ar we-suar-asabin ande yokorgi-sindigar sigode?”

²⁰Ar we-dulemar sooburu-maeyobi gumalad. Dukin e-binsaedbali yamoledimalad. Geg na-dukin agi onomalad, degi, geg sogbalid: “¡We an-argan-nuedsik-ibmar-ganikidi, ibmar-binsaledid!”

²¹Bab-Dummad weyob sogded: “Jacob-wagan, we-ibmar be insao. Ani an be-obinnisad, be an-maiga-gued, Israel-dulemar, an gwen be-iegosulid. Israel-wagan, ar be an-maiga gued.

²²Burwa-sibugana-yogguddaedyobi, an bega be-ibmar-isgana-imaked, osulosad. Degi, boo-aisakiddaedyobi, an bega be-isgued osulosad. Gannar be anse dage, ani an be-nudaksad.”

²³Isaías weyob sogded: “Mogir-billi, Bab-Jehová-ibmar-imaksadgi weligwaledgi be namak. Napa-yaa-matusurmalad, gandikidba be gormakmar. Yalamar, sapurmar, degi, bela e-sapimar, binnasuli be namakmar. Ar ade, Bab-Jehová Jacob-dulemar-bendaksad, Bab-Dummadi e-gandikid-yeerdakleged Israel-yalagi oyosad.”

²⁴Weyob Bab-Jehová-be-bendakedi, sapibeneggi-be-omesisadi soged: “Ani an Bab-Jehová gued, bela ibmar-obinnisadid. Ani an wargwen mogir-billi egasadid. Ani an dukin napneg onasosadid. Dule gwen an-bendaksasulid.

²⁵”Ani an Bab-Dummad-gayaburba-barsogedyob-san-imakdamalad-e-ibmar-sogedi, ega guega an imakdasulid. Nergan an obingesadaed. Dule-binsaed-ibegana sikirmakega an imakdaed. E-binsaed-nikaa-daedi, gannar-gannar-ibmar-obaredga an imakdaed.

²⁶Ani an an-maimar-gayaburba ogannodaed. Degi, anga-gayaburba-berbemalad anse-ibmar-egisedi, sogedba-guega an imakdaed. ”Ani an soged, ‘Jerusalén-neggwebur gannar sigoye, Judá-neggweburmar gannar bukuoye, e-neg-bibichismalad, gannar an nudakoye.’

²⁷Ani an demar-wilasailad odinnoged. Degi, diwar-odinnogega an igar ukbalid.

²⁸Ani an Rey-Ciroʼgi soged: ‘Anga sibad-wawaad-edarbed guye. An-ibmar-abegedi anga sogedba imakoye. Jerusalén-neggwebur gannar sigoye. Anse-goled-neg-e-saila gannar megoye.’ ”