1Iwe, ewe Samol mi Lapalap a apasa, “Iei kopwe aüseling, Israel nei chon angang, en nei üa afiluk.
2Ngang ewe Samol mi Lapalap üa föruk o afisuk me lon letipen inom, üa pwal alisuk. Kosap niuokus, Israel nei chon angang, Jesurun nei we üa filätä.
3Üpwe ninätiu koluk won fanüen chon kaka, üpwe pwal apupu chanpupu lon leni mi pwasapwas. Iwe, üpwe anomu Ngüni won mwirimwirum kana, pwal ai feiöch won noum kana.
4Repwe märitä usun chök fetil lon leni mi nüküchöchön, pwal usun chök wowo ünükün chanpupu.
5Iwe, eman epwe apasa, ‘Ngang nöün ewe Samol mi Lapalap,’ eman epwe püsin aita ngeni pwe i mwirimwirin Jakop, nge pwal eman epwe makei won pöün ‘Ngang nöün ewe Samol mi Lapalap’ o püsin achuolong lon ewe mwichen chon Israel.”
6Iei alon ewe Samol mi Lapalap, ewe Kingen Israel me an Chon Amanau, ewe Samol mi Unusen Manaman, “Ngang chök Kot ewe Aemanün me Amüchülan, esap wor eman Kot lüki.
7Iö a wewe ngeniei? Epwe ütä o pwärätä fän mesei. Iö a apworausa me lom ekewe mettoch repwe fis me mürin? Epwe pwärätä ngenikich mine epwe fis.
8Nei aramas, ousap fokun niuokus. Ifa usun, üsap aiti ngenikemi seni me lomlom tori ikenai o pwärätä ngenikemi meinisin mine epwe fis? Ämi nei chon pwärätä. Ifa usun, a wor eman Kot lüki? Apwi, esap fokun wor eu Achau lüki. Üsap silei eu.
9Iwe, ir meinisin mi föri uluulun anümwäl esap wor aüchear, esap pwal wor lomoten ekewe mettoch ra aücheani. Iwe, chon fel ngeni ekewe uluulun anümwäl ra chun o wewengau. Iei mine repwe lichipüng o säw.
10Eman mi falei eu uluulun kot ika föri eu uluulun anümwäl seni mächä pwe epwe fel ngeni, esap fokun wor lomotan.
11Iwe, i me chiechian kewe meinisin repwe lichipüng o säw. Ekewe soufalafal ra aramas chök. Repwe mwichefengen meinisin o ütä lon kapwüng. Nge repwe fokun niuokus, repwe pwal lichipüng o säw.
12Iwe, eman chon wüsi mächä a apwichi ewe mächä won ekkei o amaani. A angang won ren pöchökülen pöün pwe epwe fis eu uluulun anümwäl mi lapalapöch. Ren an achocho a echik o apwangapwangala, a pwal malülü ren an esap ün koluk.
13Nge eman soufalafal a aükü ewe irä ren an selin aükük o akiänni ren efoch piin, a pwal siseli ren nöün sisel. Iwe, a alapalapa ewe irä ngeni uluulun eman aramas mi fokun äteöch o aütai lon eu imw.
14Iwe, a pöküela irä setar ika afili efoch irä saipires ika ook ika efoch lein ekewe irän wöllap. A pwal fotuki efoch irä setar o witiwiti püngün üt pwe epwe märitä.
15Mürin, eman aramas a eäni och amwüch seni ewe irä. Iwe, a angei och pwe epwe aküw o arara ngeni, a pwal eäni amwüch pwe epwe umuni pilawa. Nge och a angei pwe epwe falei eu uluulun anümwäl seni o fel ngeni.
16Iwe, a keni eu kinikinin ewe irä, a amwota ochan fituk won, a ochoch o möt ren. A pwal püsin rar ren o apasa, “Oo, üa mefi kinamwe ren pwichikaren ei ekkei.”
17Nge seni lusun ewe irä a falei eu uluulun anümwäl fän äsengesin, a chapetiu mwan o fel ngeni, a pwal iotek ngeni o apasa, “Kopwe amanauaei, pun en ai kot.”
18Iwe, ekei aramas resap silei och, resap pwal wewe ren, pun Kot a achuna meser pwe resap tongeni küna, a pwal apüngü letiper pwe resap tongeni wewe.
19Iwe, esap wor eman a ekieki usun, esap pwal wor än eman sile me mirit pwe epwe apasa, “Eu kinikinin ewe irä üa keni lon ekkei, üa umuni pilawa won, üa pwal amwota ochäi fituk won o ochei. Ifa usun, üpwe föri seni ewe lusun irä eu uluulun anümwäl mi fokun anioput? Ifa usun, üpwe chapetiu mwen esop sopun amwüch?”
20Ei sokun aramas a wewe ngeni eman mi mongö falangen ekkei pwe epwe manau ren. Iwe, ren ekiekin letipan mi rikirik a tokola pwe esap tongeni püsin angasa, esap pwal aisini, “Ifa usun, esap och minen atuputup mine üa amwöchü lepei?”
21Iwe, ewe Samol mi Lapalap a apasa, “Israel, kopwe chechemeni ekei mettoch, kopwe chechemeni pwe en nei chon angang. Ngang üa afisuk pwe kopwe nei chon angang, ngang üsap manlükukala.
22Üa amorala om tokotokongau usun eu kuchu, pwal om tipis kana usun och ötüöt. Kopwe liwinitiei, pun ngang üa angasok.”
23Oupwe köl fän pwapwa, ämi läng, pun ewe Samol mi Lapalap a föri ei. Oupwe leüömong le köl, ämi alololun fanüfan. Oupwe chietä köl, ämi chuk kana, pwal ämi kewe irä meinisin mi mär lein wöllap. Pun ewe Samol mi Lapalap a pwärätä an ling ren an angasa nöün aramasen Israel.
24Iei alon ewe Samol mi Lapalap om Chon Amanau a föruk, “Ngang ewe Samol mi Lapalap, üa föri mettoch meinisin. Ngang chök üa ameresala läng, üa pwal oletala fanüfan, nge esap wor eman a alisiei.
25Ngang ätewe mi apatala manen ekewe soufos chofana o aitengaua ekewe soupwe, üa pwal esita ekewe chon tipachem o siwili ar tipachem ngeni umwes.
26Nge lupwen nei chon angang a osuni och, lupwen üa tinala nei chon künö pwe epwe pwärätä mine üa akota, üpwe pwal fokun apwönüetä mine üa eäni kapas. Üa apasa usun Jerusalem pwe epwe sosefäl, pwal usun ekewe telinimwen Juta pwe repwe kaüsefäl, nge mine a ta me wor üpwe aüsefälietä.
27Iwe, üa üreni alololun matau, ‘Kopwe pwas, üpwe pwal amorätä om kewe chanpupu.’
28Ngang üa apasa usun Sirus, ‘Ätei nei chon mas epwe apwönüetä unusen mochenin letipei.’ Iwe, epwe apasa pwe Jerusalem epwe kaüsefälitä, epwe pwal fis longolongun ewe imwenfel.”
