1Koni iki, Yaxuba bɔnsɔnna, n ma walikɛne, ɛ tuli mati, n na Isirayila naxan sugandixi!
2Alatala ito nan falaxi, naxan i daxi, naxan i rafalaxi i nga kui, naxan i malima, a naxa, “Ɛ nama gaxu, n ma walikɛne, Yaxuba bɔnsɔnna, i tan Isirayila tinxinxina n naxan sugandixi.
3Bayo n ni igen nafama nɛn bɔxɔ xareni n yi xudene radangu tonbonni. N na n ma Nii Sariɲanxin nagodoma nɛn i bɔnsɔnne ma, n yi barakan sa i yixɛtɛne fe yi.
4E sabatima nɛn alo sɛxɛne burunna ra, alo wudi faɲine xudene dɛ.
5Muxuna nde a falama nɛn, a naxa, ‘Alatala nan gbee n na,’ boden yi a fala, a a xili nɛn ‘Yaxuba,’ gbɛtɛ yi a sɛbɛ a yiin ma, fa fala ‘Alatala gbeena,’ a yi a yɛtɛ xili ba a ‘Isirayila.’ ”
6Alatala ito nan falaxi, Isirayila Mangan naxan a xunbama, Alatala Sɛnbɛn Birin Kanna naxa, “N tan nan a fɔlɔn nun a raɲanna ra. Ba n tan na, Ala gbɛtɛ mi na.
7Nde luxi alo n tan? Na kanna xa a xuini te! A xa a yɛba n xa, naxan birin bata dangu xabu n singe ra muxune da waxatin naxan yi! A mɔn xa fe famatɔne fe fala, naxanye fama ligadeni!
8Ɛ nama gaxu, ɛ nama xuruxurun, n mi yi ɛ rakolonxi feni ito ma ba, n yi a rali ɛ ma xabu to mi na ra? N serene nan ɛ tan na. Ala gbɛtɛ na, ba n tan na ba? Ɛ kantan fanye gbɛtɛ yo mi na, ba n tan na. N mi gbɛtɛ kolon.”
9Naxanye birin suxurene rafalama, fuyantenne nan ne birin na, e se rafalaxi fisamantenne tɔnɔ yo mi na. E yɛtɛ serene nan e ra: E mi se toma, e mi fe kolon, e mɔn luma nɛn yagini.
10Muxun na alana nde rafala hanma suxurena nde, na tɔnɔ mi na.
11Na kanna nun a sifan birin yagima nɛn. Suxuren nafala muxune findixi adamadiine nan tun na. E birin xa e malan, e xa e maso. E gaxuma nɛn, e yagi e bode xɔn.
12Xabun nɛma bunbin xabuma, a walima tɛ wolonne nan na, a yi a rafala dɛɛramaan na. A a rawalima a sɛnbɛn nan na koni kamɛn na a suxu, a sɛnbɛn yi ɲan, min xɔnla yi a suxu, a xadan.
13Kabintan lutin sama nɛn wudin ma, a yi lutin funfun naba a ma, a yi a masoli wali seen na, a yi a radigilin, a yi a rafala muxu sawuran na, a lu adamadiyaan nɔrɔn birin yi alogo a xa a ti a batu banxini.
14A sumanne nan sɛgɛma hanma xarinne hanma warine a naxanye raluxi fɔtɔnni, e gbo. Xanamu, a fɔfɔna nde tongo, a tan yɛtɛɛn naxan sixi, tule igen yi sa a ma, a gbo.
15Adamadiine na wudina ndee ganma yegen na, e yi nde tongo, e yi e maxara a ra. E na nan ndee mɔn tongoma, e yi kudin so, e mɔn yi ndee tongo, e yi e gbee alana nde rafala, e yi e xinbi sin a bun, e suxuren nafala, e yi a batu.
16E yi a wudi dɔnxɛn findi yegen na, a gan, e yi suben ɲin ndee ra, e yi a gan ndee ra, e yi a don han e lugo. A mɔn yi a maxara, a yi a fala, a naxa, “N na n maxarama, n tɛɛ dɛgɛn toma yati! ”
17A wudin dɔnxɛna, a yi na rafala a gbee ala ra, a suxurena, a yi a xinbi sin a yɛtagi, a yi a batu, a naxa, “N xunba, bayo i tan nan n ma ala ra!”
18E mi fe kolon, e xaxili mi na, e yɛɛne raxixi alogo e nama sese to. E mi nɔɛ e mirɛ, e feene famu.
19Muxune mi e mirima, e xaxinla sɔtɔ, e mi feene yɛɛ toɛ alogo e xa a fala, e naxa, “N bata wudina ndee gan, n kudin so a ra, n yi suben gan ndee ra, n yi a don. N lan n xa a dɔnxɛn findi se haramuxin na ba, n yi n xinbi sin yegen bun?”
20E kankanma naxan ma, xuben nan gbansan na ra. E bɔɲɛn bata tantan, a e ralɔ ayi. E niin mi xunbama, e mi a falama, e naxa, “Seen naxan n yii ito ra, wulen xa mi a ra ba?”
21Yaxuba bɔnsɔnne, na feen xa rabira ɛ ma! Amasɔtɔ n ma walikɛɛn nan ɛ ra, Isirayila kaane! N na ɛ rafalaxi nɛn alogo ɛ xa findi n ma walikɛne ra, Isirayila kaane, n mi ɲinanma ɛ xɔn.
22N bata ɛ hakɛne ba ɛ ma alo kundaan kore xɔnna ma e nun ɛ yulubine alo kundaan xɔtɔnni. Ɛ xun xɛtɛ n ma, amasɔtɔ n bata ɛ xunba.
23Kore xɔnna, gbelegbele sɛwani, amasɔtɔ Alatala bata wali! Bɔxɔn bunna, sɔnxɔ sɛwani, geyane, ɛ xuini te e nun ɛ tan fɔtɔnne nun wudine birin. Amasɔtɔ Alatala bata Yaxuba yixɛtɛne xunba, a yi a binyen mayita Isirayila yi.
24Alatala ito nan falaxi, a tan naxan i xunbama, naxan i rafalaxi xabu i i nga kui, a naxa, “N tan, Alatala, n bata feen birin liga, n tan nan keden kore xɔnni fulunxi, n tan yɛtɛɛn nan bɔxɔ xɔnna saxi.
25N tan nan waliyine wule mantaxane kalama, n yi yiimatone findi daxune ra, n yi fekolonne raxɛtɛ xanbin na n yi e xaxilimayaan findi xaxilitareyaan na.
26N na n ma walikɛna falane rakamalima nɛn. N ma xɛrane na fe famatɔɔn naxanye rali, n na a rakamalima nɛn. N bata a fala Yerusalɛn ma, n naxa, ‘Muxune mɔn dɔxɔma nɛn a yi, Yuda taane mɔn tima nɛn, n mɔn yi taa kalaxine yitɔn.’
27N nɔɛ a falɛ tilinna ma, n naxa, ‘Xara, n xa i ya igen xɔri.’
28N yi a fala Kirusi ma, n naxa, ‘N ma xuruse rabana! A n waxɔn feene birin ligama nɛn.’ N na a fala Yerusalɛn ma, n naxa, ‘A mɔn xa ti!’ E nun Ala Batu Banxin ma, n naxa, ‘A mɔn xa bɛtɛn sa!’ ”
