Isaias 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Heini he menge lalag ne mehitenged te Babilonia: Edsurung is menge kuntada he iring te eribpures he edeǥurus pehendiyà te Negev. Ebpuun heini ziyà te sibsivayan, he ziyà te mekahandekhandek he tanà.

²Nekelawas a te mekahandekhandek mehitenged te kedluib wey kebpendezaat. Sikiyu is menge tig-Elam wey menge tig-Media, liǥuwi niw is Babilonia ne surunga niw. Edhimesazen te Megbevayà is kebpeentusa zin te zuma he menge nasyun.

³Migkerker a wey mibmesakit is lawa ku tenged te neehè ku wey nezineg ku pinaaǥi te kebpekelawas ku, nesekitan a iring te vahi he ebeliliten.

⁴Nekehuyabhuyab is kumeng ku su egkerkeren a tenged te kegkahandek ku. Kenà a ebpekehimeley ke mezukilem, tenged te kegkulbai kedì.

⁵Nengandam te keemuran is menge upisyal. Midempasan dan is ebpinuuwan dan. Migkaan sikandan wey mid-inum, ne netekewtekew zan te mibensaǥan sikandan te, “Hendini kew, pengandam kew para te tebek!”

⁶Migkaǥi is Nengazen kayi te kedì te, “Savuk ka te vantey he ibpevantey te inged, ne ipekaǥi kandin is egkeehè din.

⁷Kinahanglan he ebpurung sikandin ebantey ne emun ebpekaahà sikandin te kerwahi wey pereuntud te kudà he ebparisparis, wey menge etew he ebpemen-untud te menge asnu wey menge kemilyu, kinahanglan he segugunè din petueni.”

⁸Ne mibensag is bantey te, “Datù, maandew wey mezukilem is kebantey ku he kayi a te turi.

⁹Ne ǥuntaan, ahàa niw man duen egkeehè ku he edhendini he menge kerwahi wey pereuntud te kudà he mibparisparis.” Ne mibpedayun megkaǥi haazà is bantey te, “Nezeetan en bes utew is Babilonia. Nengerupet en is langun he menge ledawan he menge ed-ezapen kayi ne nekepeyapat diyà te tanà.”

¹⁰Ne migkaǥi a te, “Sikiyu is menge emurè ku te inged he menge Israilihanen, he henduen be te trigu he migunas, edtudtulen ku keniyu is nezineg ku ziyà te Nengazen he Mekeǥeǥehem, he Megbevayà te Israel.”

¹¹Heini he menge lalag ne mehitenged te Edom: Duen etew ziyà te Edom he edtulung ed-insà kayi te kediey te, “Bantey, egkeuǥet pe be egkepawà.”

¹²Ne ke siak te, “Kenè en egkeuǥet ne egkepawè en, piru egkeuman ded egkezukilem. Ne emun egkesuat ka he ed-uman ed-insà, ne umani a kenikew insai.”

¹³Heini he menge lalag ne mehitenged te Arabia: Sikiyu is menge etew ziyà te Dedan, he is menge grupu te menge nigusyanti niw he ebpemenhipanew he egkampu ziyà te sibsivayan te Arabia,

¹⁴beǥayi niw te wahig is egkengemezahan. Sikiyu is menge meǥinged diyà te Tema, beǥayi niw te keenen is menge etew he nemelaǥuy puun te inged dan.

¹⁵Nemelaǥuy zan tenged te zekelà he tebek; edel-asen sikandan te neǥumeenan te ispada wey panà he menge kuntada zan.

¹⁶Migkaǥi is Nengazen kayi te kedì te, “Seled te senge-tuig, ne egketapus is kegkemekeǥeǥehem te Kedar.

¹⁷Deisey zà is egkesamà te menge mevurut he mememanà kayi. Egkehitavù heini su iyan a, is Nengazen he Megbevayà te Israel, is migkaǥi kayi.”