Jesaja 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Ʒâʒâkiriŋ mâŋâŋ hâhâwicne juwic mâreŋkonec ware fisiekac irec sâcko mâreŋ burocnaonec, â mâreŋ sâqocnaonec wiac moc fisikac.

²Ʒâŋe‐nane bâtâcneme wiac hâhâwicne kecʒiŋuc honepo: Soroŋ qaqazi soroŋ qaocmu â ima qaqazi ima qaocmu. Elam, go ware fec, Media go somâ râec! Babe haere erâ harac huacbuc ee i bâniniŋke‐fârezepac.

³Irec buʒâic enarekac i ŋokac gozi kicjopame ʒâic manaeŋgopieŋ irec sâc; no wiac i hone manac erâ maŋnane gâckeme bipic‐nane tarakac.

⁴Maŋnane fâfârekac, bipic‐nane tarame weaŋkekopac; no mârâc jaha owâ ririŋte manape biaŋke jujec miŋecgac ine manape hâhâwicne ekac.

⁵Tiwâ ʒepe bâmockeeŋgopieŋ, fofo rumackeeŋgopieŋ, nânâ opâ nâeŋgopieŋ. Ajoc, ŋic fekicne ŋoŋe faharerâ maro saŋ jâwec ruacneniŋ!

⁶Wofuŋ e ʒiŋuc nazawec hâcne: “Go ra ruc bapa ŋic âzâcnetec domahuc wiac honeocmu sâc mufuazejec.

⁷Ehuc ŋic jajaheczi becâsic jajahecko ŋehuc hehendeŋ wareŋgopieŋ, me doŋgi birinehec me kamele birinehec, iŋuc honec‐joparâ hazec râe‐jâmbâŋkezejec.”

⁸Eme honec‐jopaweczi ʒiŋuc muhuc owackewec: “O Wofuŋ, no ruc bapa ficko ʒoaŋ ʒora domaekopac â dodoma‐naneo domahuc ŋafe sâc ʒâŋe fihuc juekopac.

⁹Erâ manaŋgopieŋ, becâsicko ŋic jajahec jajaheczi hehendeŋ ware fisiŋgopieŋ.” Iŋuc murâ muwec: “Babe hae sâko tâtiewec, tâtie‐jâmbâŋkewec hâcne; ehame nemufâc‐ticne jaŋere ɋâŋ qâqâtâc i mâreŋko henʒaŋ qanʒaŋ‐jopa‐fârekicne.”

¹⁰O ŋicfâc‐nane sipiric‐ŋopakicne â âtenʒaŋ‐ŋopakicne, Anutu Tâpiri Ɋuŋɋasaŋ Wofuŋ, Israere Anutu eraonec dâŋ manapo i hâcne mufua‐ŋarekopac.

¹¹Seiri mâreŋkonec ŋic moczi ʒiŋuc wira‐narekac: “Ruc bapa ŋic, ŋafe bembeŋne me ʒoricne fokac? Ruc bapa ŋic, ŋafe biac taraocmu me?”

¹²Ruc bapa ŋiczi muwec: “Hae i furezo ekac; erâ dapâc fokac jaha. Ŋoŋe wiac irec me irec manazo murâ mocwâc risie ware wionʒepieŋ.”

¹³Dedaŋ ŋic, Arabia mâreŋ fotâcnehuc jueŋgopieŋ ŋoŋe hae ŋafeme kâte qâhâcko waha guŋ fonʒepieŋ.

¹⁴O Tema mâreŋ rune, ŋoŋe opâre hâmoŋgopieŋ jaŋe opâ gumec‐jopanʒepieŋ, â wisehuc juŋgopieŋ jaŋe nânâ jare gumec enʒepieŋ.

¹⁵Jaŋe ʒikare wiseŋgopieŋ, sâqe unuckekicne â tepe âpârekicne â ʒikare tâpiri wânʒâŋ irec wiseŋgopieŋ hâcne.

¹⁶Irec Wofuŋ e ʒiŋuc nazawec: “Jara moc, kiŋaŋ qaqa jaŋere jara dameŋ iŋucne, i tarazo eha Kedara ŋic ɋuŋɋasaŋ‐jeŋic sasawa omaeocmu.

¹⁷Eme Kedara ŋicguru tepeŋicfâc‐jeŋic nâfocne juniŋmu jaŋere ʒare i afecne mac.” Wofuŋ, Israere Anutu eki iŋuc muwec hâcne.