Isaías 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Egipto-yar-guoedgi iduakwaa sunmaklesad: Bab-Jehová be dakmala. Mogir-gwae-gwae-iirmakmaid-birgi-sii, Egipto-yalase danikid. Egipto-e-bab-dummagan e-abin wawanmakbukwad. Egipto-dulemar nue dobe-itomalad.

²Bab-Jehová soged: “Egipto-dulemar na abin-abin-urwemalaga an imakoed, na e-gwenad-e-gwenad-egi-gwisgumalaga an imakoed, dulemar-na-e-aimarbo-urwega an imakoed, neggweburmar-na-abin-abin-urwemalaga an imakoed, yalamar-na abin-abin-urwemalaga an imakoed.

³Egipto-dulemar suli-suli itodamaloed, bab-dummadyob-imaklemaladse idakdemaloed. Dule-burgwarmalad-e-burbase idakdemaloed, bab-dummad-gayaburba-barsoged-bundorse idakdemaloed. Yoo-ibmar-guoed-soged-dulese idakdemaloed, anmar ibu imakoye. Degi-inigwele, e-igarmar igarga-guega an imakosulid.

⁴Egipto-dulemargi dule-bulegan yar-seega an imakoed. Rey-isgana yar-seega an imakoed. Ani Bab-Jehová-Bela-Gangued-Nikad soged.

⁵”Demar-naid dingudoed, Nilo-diwar-maid bela dinna naoed.

⁶Dian-akwiar-mamaid sunnasuli yapanne gudoed, Nilo-diimar-iirmakmaidi, iremai gudoed, bela dinna naoed. Nallayob-daklemaladi, degi, nagwaryob-daklemaladi, bela burgwidoed.

⁷Nilo-diwar-gakaba ibmar-digarmaladi, bela burgwidoed, Nilo-diwar-gakaba ibmar-nanaidi, bela bergudoed, bela swiri naoed, bar daklegosulid.

⁸Bela dule Nilo-diwargi-ua-somaladi, degi, bela saki-miar-ua-gamaladi, bukib binsadmaloed, bela bodmaloed.

⁹Bela dule lino-mor-nued-sobedgi-arbamaladi, degi, saki-sobedgi-arbamaladi, suli-suli itodamaloed.

¹⁰Ua-galugi-arbamaladi, nue-wiles itodamaloed, ar bela e-sakimar itiridoed.

¹¹”Zoán-neggwebur-e-dummagan, dule-binsaed-ibedye be sogdimalad, bemar dule-gegeganad. Ar bemar Faraónʼga binsaed-isgana ukdimalad. Ar igi yogasaar bemar sogmalosunna: ‘Anmar binsaed-ibedye, epenne-reymar-binsaed-ibegan-megismaladse binsaed amismaladye.’

¹²”Egipto-rey, ¿be-dule-binsaed-ibegande bega igigudmarsunna? Emide, be-dule-binsaed-ibegan bega sogmardo, ibu Bab-Jehová-Bela-Gangued-Nikadi, Egipto-dulemargi imaksokali, igi-Egipto-dulemar-idu igar-amismaidi, bega sogmarbardo.

¹³Zoán-neggwebur-e-dummagan dule-binsaedsulidga nadmalad, Menfis-neggwebur-e-dummagan ese yamolesmalad. We-neggwebur-e-dummagan, Egipto-yala noar sesmalad.

¹⁴Ani an Bab-Jehová dule-binsaed-dakmaladgine, suli-suli-neg-itoged-burba egi nasiksad. Bela Egipto-dulemar-ibmar-imakedi, noarsaila imakdemalad. Igi-dule-mummudi, agar-agar banamakdii, debayobi, Egipto-yala banamaksiid.

¹⁵Gege bar Egipto-yar-ulale, ibmar imakleged. Ar dule-dummagana, dule-ibmar-wismaladi, dulamar-bukwadi, degi, sordamala, gege bar Egipto-yar-bendakega ibmar imakmalad.”

¹⁶A-ibagangine, Egipto-dulemar, Bab-Jehová-Bela-Gangued-Nikad sabsur-e-odurdakega egi gwisgualile, omeganyobi dobe itodmaloed.

¹⁷Egipto-dulemar Judá-dulemar-dobe itodamaloed. Ar Judá-dulemargi wis binsadmalale, bato dobed egi nagudmaloed. Ar ade, Bab-Jehová-Bela-Gangued-Nikadi Egipto-dulemar-idu igar-bulegan amisad.

¹⁸A-ibagangine, Egiptoʼgi neggwebur-gwaatale Canaán-dulemar-gayaba sunmakdemaloed, degi, ise-sogar Bab-Jehová-Bela-Gangued-Nikadga sogdemaloed: Anmar be-sogedba damaloye. A-neggwebur-gwagwenad nugguoed, Herez-neggweburye.

¹⁹A-ibagangine, Egipto-yalagi Bab-Jehováʼga ibmar-ogumakar-ukleged-aila sigoed. Geb degine, yar-abingunaid-nagaba Bab-Jehováʼga akwa-dummad ogwismarbaloed.

²⁰Ar a-akwa-dummadi Egipto-dulemarga e-wilubga guoed. Adi, oyogega, Egipto-dulemar Bab-Jehová-Bela-Gangued-Nikad-e-nug odummomarmoye. Ar Egipto-dulemar Bab-Jehováʼse mesagwar-dule-e-imakmaladgi e-ollor-imakega gotemaloed. Bab-Jehová ega dule-e-abonoged, degi, dule-e-ular-gwisgued barmidagoed, adi, mesagwar-dule-e-imakmaladgi ollor-imakegar.

²¹A-ibagangine, Bab-Jehová Egipto-dulemar magar-e-dakega imakoed, ede, nue-Bab-Dummad guye. Geb Egipto-dulemar magar daknonimaloed, wede, Bab-Jehová nue-Bab-Dummad guye. Degi, Bab-Jehováʼga ibmar-oburgwar ukdemaloed, ibmar-gwagmar ega ukdemaloed. Bab-Jehováʼga ise-ibmar-imakoye-sogmaloedi, na sogedba ega imakmaloed.

²²Bab-Jehová bonigi Egipto-dulemar-naibi-imaknonikoed, geb a-sorbali, onugubaloed. Geb degi, Egipto-dulemar Bab-Jehováʼba gannar nagudmaloed, degine, Bab-Dummad wile amar-dakoed, degi, onuguoed.

²³A-ibagangine, Egipto-akale, Asiria-yalase igar-dummad megoed. Geb Asiria-dulemar Egiptoʼse nanabukwa gumaloed, degi, Egipto-dulemar Asiriaʼse nanabukwa gumarmogoed. Egipto-dulemar, Asiria-dulemarbo Bab-Jehová-nug odummobukwa gumaloed.

²⁴A-ibagangine, yala-sogapaa ambikumaloed: Egipto, Asiria, Israel. Degi, wemar-yalagi neggwebur-bamaladba egi nued binsalegoed.

²⁵Ar ade, Bab-Jehová-Bela-Gangued-Nikad bela we-yalamargi ise-nued binsaoed, weyob sogdoed: “Egipto an-dulamarga gued. Egi nued binsalesun. Asiria-dulemargi nued binsalesun, ani an urbisad. Degi, Israel-dulemargi nued binsalesun, wedi angadid. Ani an we-dulemar susad.”