Jesaja 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Honeniŋ, Wofuŋ e karorac gagasac‐ticnehec irec faio ŋehuc ra Aigita mâreŋko fisikac. Fisime Aigitare nemufâc jaŋe ere maio ɋarac ɋarac qaniŋmu; â Aigita ŋic jaŋe maŋjeŋic omaeocmu.

²Eme no Aigita ŋic jaŋe suru jâiŋ ejarepe jaŋackoaŋ rârâsi eniŋmu, ehuc hahac ɋa â âgo bago â haene haene â ŋic gurune gurune jaŋe jaŋaczia qaqac eniŋmu hâcne.

³Iŋuc ehuc Aigita ŋic hâbi‐jeŋic goroŋkeocmu â mumupaŋ‐jeŋic qape wahame nemu â qaŋgec bapa, bawe â faŋfaŋ mu wioc ejarenʒepieŋ.

⁴Eme no Aigita ŋic jaŋe bomboŋ râŋgeŋ bârâŋgeŋne moc ere meo râec‐jopapemu; eme ŋicwofuŋ ʒâʒâicne moczi bomboŋ ejareocmu, Wofuŋ, Anutu Tâpiri Ɋuŋɋasaŋ Wofuŋ nore dâŋ iŋuc.

⁵Nilu opâ sâkozi fâre wahame ʒicke kereŋ eocmu;

⁶eme opâ hatane hatane jaŋe âsu finiŋmu, â Aigita opâ sâko jaŋe ʒickerâ kereŋ seŋseŋkeniŋmu, ehame saparac â ʒamac ʒamac i hâmo qanʒaraŋ eocmu.

⁷Nilu opâ micnao kânoŋ bapa wiac â wiac gâcne sarakicne sasawa i hâmo ʒaŋ eha mâŋâŋzi ficne sueme tâtie‐fâreocmu.

⁸Eme qowi gie bapa ŋic jaŋe ki mamakuc eniŋmu, â hawic‐jeŋic opâo behe jumbieŋ jaŋe harac huacbuc eniŋmu.

⁹Gec siŋiŋ baeŋgopieŋ jaŋe qurutuaniŋmu â he wiac fueŋgopieŋ jaŋe weaŋkeniŋmu.

¹⁰Wiac irec gie bapa ŋic jaŋe busâqoc mananiŋmu â moneŋ gie baeŋgopieŋ jaŋe buheric ejareocmu.

¹¹Zoaŋ haere ŋic fekicne ŋoŋe ŋic mutuc matacne, â Farao dâŋte babaficfâc‐ticne ŋoŋe ŋicguru maŋ tâmiric. Ŋoŋe fuŋne weniŋucte Farao ʒiŋuc âzâcneeŋgopieŋ: “No mamana ŋic jaŋeraonec fuapo, no ŋicwofuŋ esecne jumbiŋ jaŋere ɋâric.”

¹²Mamana ŋicfâcge jaŋe weni? Jaŋe Anutu Tâpiri Ɋuŋɋasaŋ Wofuŋzi Aigita mâreŋte dâŋ mupaŋkewec i mufua‐garehuc gazaniŋ me!

¹³Zoaŋ haere ŋic fekicne jaŋe ŋic mutucne embiŋ, â Memfisi haere ŋic fekicne jaŋe eatuc‐jopakicne; Aigita ŋic gurune gurune micnefâc‐jeŋic jaŋe ŋicfâc‐jeŋic ejarepie qâsoriembiŋ.

¹⁴Wofuŋ e maŋsifuc bâfua‐jarewec; eme jaŋe ŋicfâc‐jeŋic bânie‐jarepie eebapa‐jeŋic sifuckeekac, ine ŋic moczi opâ momori nâku maŋne sifuckeme maŋuhuc biric boroc eekac irec sâc eeŋgopieŋ.

¹⁵Eme Aigita mâreŋte ŋic ʒâŋe biŋehec me ʒâŋe biŋe tâmiric jaŋe gie moc ʒuhuckerâ bapa i mi eniŋmu.

¹⁶Dameŋ ira Aigita ŋic jaŋe ŋokac iŋucne eniŋmu, eha Anutu Tâpiri Ɋuŋɋasaŋ Wofuŋzi meticne fotariehuc jaŋeraopec bâfeŋneme bipic tara‐jareha hâwic‐jopaocmu.

¹⁷Eme Aigita ŋic jaŋe Juda mâreŋte manapie hâhâwicne eocmu; ehame Juda mâreŋte manasu‐jarepie sâc hâwic‐jopaocmu, i Anutu Tâpiri Ɋuŋɋasaŋ Wofuŋzi dâŋ mupaŋkewec fokac irec.

¹⁸Dameŋ ira Aigita mâreŋko hae sâko 5 irec rune jaŋe Kanaaŋte dâŋmarac eniŋmu, ehuc Anutu Tâpiri Ɋuŋɋasaŋ Wofuŋ ere biŋe erâ juniŋte mujomireniŋmu; hae i jaŋeraonec moc irec ʒâŋe Ʒoaŋ Hae muniŋmu.

¹⁹Dameŋ ira Aigita mâreŋ wâmbuŋnao Wofuŋte alata moc ŋeocmu â qaŋeŋnao Wofuŋte qânâ wâtuŋ moc domaocmu.

²⁰Izi hâcne Aigita mâreŋko Anutu Tâpiri Ɋuŋɋasaŋ Wofuŋ ere ma â mumutaniŋ eocmu; eme fific guguriŋfâc‐jeŋic jaŋere erâ Wofuŋ wira wâwâsic ecnepie babafic moc sore‐jareocmu, eme eki juju gie bahuc batarac‐jopaocmu.

²¹Eme Wofuŋ e fuŋne‐ticne Aigita ŋic bataniŋke‐jareme Aigita jaŋe dameŋ ira Wofuŋ hone taraniŋmu, erâ bâzi rikecnerâ taha bacnehuc kiŋaŋ qacneniŋmu â Wofuŋtao dâŋ mupaŋkerâ fârine bâfuaniŋmu wâc.

²²Eme Wofuŋ e Aigita ŋic jopaocmu, joparâ wâc bâmiriŋ‐jopaocmu; eme jaŋe Wofuŋtao risieniŋmu; eki ine mu huacbuc‐jeŋic manarâ bâpiaŋ‐jopaocmu.

²³Dameŋ ira Aigita mâreŋkonec hata moc fuarâ raku Asiria mâreŋko fisiocmu, ehame Asiria ŋic â Aigita ŋic jaŋe iiqic ehuc juniŋmu, ehuc qâturerâ Wofuŋ kiŋaŋ qacnehuc juniŋmu.

²⁴Dameŋ ira Israezi Aigita â Asiria qâtec‐jofahuc guru namba 3 eocmu, ehuc mâreŋ wâmbuŋnao jambuŋhec juocmu.

²⁵Eme Anutu Tâpiri Ɋuŋɋasaŋ Wofuŋzi ʒiŋuc muhuc jambuŋ‐jopaocmu: “Aigita ŋicguru‐nane â Asiria meqâreŋ‐nane â Israe ŋic fuŋfuŋfâc‐nane ŋoŋerao jambuŋ‐nanezi fotâcnerâ fozejec.”