Luku 19:8-32

⁸Pɑ tɑlɑ tǝyɑɣɑ tɑɑ, ɩlɛnɑ Sɑkee kʋlɩ nɑ ɩ́ heeli Tɑcɑɑ sɩ: Tɑcɑɑ, mɑ seee, mɑɑ fɑɣɑ mɑ kʋpɑm kɛ cɑlɩ nɑ mɑ́ hɑ kʋnyɔntʋnɑɑ. Ye mɑɑ muɣulɑ nɔɣɔlʋ nɑ mɑ́ tɔɣɔ ɩ liɣitee, mɑɑ fɛlɩ pʋntʋ kɛ pǝ tɔm liɣiti.

⁹Tǝnɑɣɑ Yesu tɔmɑ sɩ: Sɑŋɑ tǝyɑɣɑ kɑnɛ kɛlɛ kɑ nyǝ́mɑ nɑ́ nyʋɣʋ ntɛ́. Pǝ tɑɣɑ pʋlʋ, Sɑkee mɑɣɑmɑɣɑ nɑ́ kɛ́ Apǝlɑhɑm pǝyɑɣɑ tɔtɔɣɔ mɛɛ.

¹⁰Yʋlʋ Pǝyɑɣɑ mɑ́ mɑ kɔmɑɣɑ sɩ mɑ pɛɛkǝɣɩ mpi pǝ lepɑ tɔ nɑ mɑ́ yɑ pǝ nyʋɣʋ.

¹¹Ḿpʋ́ɣʋ́ Yesu tɑsɑ mpɑ pɑ nɩɩ tɔm nti ɩ yɔɣɔtɑɑ tɔɣɔ ɩsɔ sɛɛʋ. Pǝ tɑɣɑ pʋlʋ, pɑ kpɛɣɛtǝnɑ Yosɑlɛm tɔ, yǝlɑɑ hʋʋkɑɣɑ sɩ ntɑnyɩ Ɩsɔ kɑ́ sʋʋ Kɑwulɑɣɑ tɔɣɔʋ kɛ tǝnɛ ɩnǝɣɩ kpɑkpɑɑ nɑ pɑ́ nɑ́.

¹²Ɩsɔ wei ɩ sɛɛ-wɛ tɔɣɔlɛ sɩ: Kɑwulɑɣɑ tǝyɑɣɑ tɑɑ ɑwulumpu nɔɣɔlʋ ɩ kʋlǝnɑ nɑ ɩ́ polo tɛtʋ pooluŋ nyǝntʋ sɩ pɑ́ tʋ-ɩ kɑwulɑɣɑ, nɑ pǝ́ tɛmɑ ɩlɛ ɩ mǝlɩ.

¹³Ɩ cɑɑkɑɣɑ tɛɛʋ, ɩlɛnɑ ɩ́ yɑɑ ɩ tǝmlɛ nyǝ́mɑ nɑɑnʋwɑ, nɑ ɩ tɑlɑ-wɛɣɛ liɣitee nyǝɣǝlʋɣʋ nyǝɣǝlʋɣʋ kɛ pɑ nyɔɔŋ tɔɔ. Nɑ ɩ́ heeli-wɛ sɩ: Ɩ́ tɑɑtǝnɑ liɣitee ɑnɛ, hɑlɩ mɑ́ polo mɑ́ kɔɔ.

¹⁴Amɑ ɩ ɩcɑtɛ nyǝ́mɑ luɣu nɑ́ fɛɩ-ɩ, ɩlɛnɑ pɑ́ kʋsɩ tillɑɑ sɩ pɑ́ polo pɑ́ heeli-wɛ sɩ: Tɩɩ cɑɑ sɩ ɑpɑlʋ ɩnɩ ɩ́ lɑ tɑ wulɑʋ.

¹⁵Pɑ tʋ ɑpɑlʋ ɩnǝɣɩ kɑwulɑɣɑ ŋkɛ, ɩlɛnɑ ɩ́ kʋlɩ nɑ ɩ́ mǝlɩ ɩ ɩcɑtɛ tɑɑ. Ḿpʋ́ɣʋ́ ɩ kotɑ ɩ tǝmlɛ nyǝ́mɑ mpɑ ɩ kɑ cɛlɑ liɣitee tɔ, sɩ ɩ nɑɑ ɩsǝnɑ ɩsǝnɑ pǝ sɛɛ-wɛnɑɑ tɔ.

¹⁶Ḿpʋ́ɣʋ́ kɑncɑɑlɑɣɑ nyǝŋ kʋlɑɑ nɑ ɩ́ tɔ sɩ: Tɑcɑɑ, pǝ sɛɛ-m liɣitee nyǝɣǝtʋ nɑɑnʋwɑ kɛ́ nyǝɣǝlʋɣʋ ŋku n kɑ cɛlɑ-m tɔ kʋ tɔɔ.

¹⁷Tǝnɑɣɑ wulɑʋ tɔmɑ-ɩ sɩ: Pǝ wɛ teu, n kɛ́ tǝmlɛ tʋ kʋpɑŋ kɛ́. Timpi ɩsɩɩ n lɑpɑ teu kɛ pǝcɔ nyǝm tɑɑ ɩsǝntɔ tɔ, n kɑ́ tɔɣɔ ɑcɑlɛɛ nɑɑnʋwɑ tɔɔ kɛ́ kɑwulɑɣɑ.

¹⁸Ɩlɛnɑ nɑɑlɛ nyǝŋ nɑ́ɑ́ kʋlɩ nɑ ɩ́ tɔ sɩ: Tɑcɑɑ, pǝ sɛɛ-m liɣitee nyǝɣǝtʋ kɑkpɑsɩ kɛ nyǝɣǝlʋɣʋ ŋku n kɑ cɛlɑ-m tɔ kʋ tɔɔ.

¹⁹Tǝnɑɣɑ wulɑʋ tɔmɑ ɩ́lɛ́ sɩ: Nyɑɑ tɔɣɔ ɑcɑlɛɛ kɑkpɑsɩ tɔɔ kɛ́ kɑwulɑɣɑ.

²⁰Tǝmlɛ tʋ lɛlʋ nɑ́ kʋlɑɑ, ɩlɛnɑ ɩ́ tɔ sɩ: Tɑcɑɑ, nyɑ́ nyǝɣǝlʋɣʋ ŋku n kɑ cɛlɑ-m tɔɣɔlɔ. Mɑ hɔkɑ-kʋɣʋ sɑɑlɑɣɑ tɑɑ kɛ́ nɑ mɑ́ sɩɩ.

²¹N wɛ-m sɔɣɔntʋ kɛ́. Pǝ tɑɣɑ pʋlʋ, n kɛ́ yʋlʋ kɑtɛ tʋ kɛ́. N tɑ sɩɩ mpi tɔ mpǝɣɩ n kpɑkǝɣɩ, nɑ timpi n tɑ tuu tɔ tǝnɑɣɑ n kʋŋ.

²²Tǝnɑɣɑ wulɑʋ tɔmɑ-ɩ sɩ: N kɛ́ tǝmlɛ tʋ ɩsɑɣɑʋ kɛ́, nyɑ́ mɑɣɑmɑɣɑ nyɑ́ kʋyɔɣɔtʋtʋ kɛ mɑ kʋɣʋnɑ nyɑ́ tɔm. N kɑ nyǝmɑ́ teu sɩ mɑ kɛ́ yʋlʋ kɑtɛ tʋ, nɑ mpi mɑ tɑ sɩɩ tɔɣɔ mɑ kpɑkǝɣɩ, pǝ́cɔ́ timpi mɑ tɑ tuu tɔɣɔ mɑ kʋŋ.

²³Ɩlɛ pepe tɔɔ kɛ́ n tɑɑ tʋ mɑ liɣitee kɛ pɑnci tɑɑ? Mɑ kɔmɑ ɩsǝntɔ tɔ, mɑɑ mɑɣɑnɑ pǝ sɛɛ ɑ tɔɔ nɑ mɑ́ kpɛntɩ nɑ mɑ́ mʋ.

²⁴Ḿpʋ́ɣʋ́ ɩ heelɑ ɩ cɔlɔ nyǝ́mɑ sɩ: Ɩ́ lɛɛkɩ liɣitee nyǝɣǝlʋɣʋ ŋkʋɣʋ ɩ niŋ tɑɑ, nɑ ɩ́ sɔɔsɩ nyǝɣǝtʋ nɑɑnʋwɑ tʋ.

²⁵Tǝnɑɣɑ pɛlɛ pɑ cɔ-ɩ sɩ: Tɑcɑɑ, kɛ ɩ́lɛ́ ɩ wɛnɑ nɑɑnʋwɑ?

²⁶Ḿpʋ́ɣʋ́ wulɑʋ cɔ-wɛ sɩ: Mɑ heeliɣi-mɛ sɩ timpi pǝ wɛɛ tɔ tǝnɑɣɑ pǝ sɔɔsǝɣɩ. Amɑ wei ɩ fɛɩnɑ pʋlʋ tɔ, pɑɑ pǝciimɑɣɑ kɛ́ ɩ wɛnɑ, pɑɑ lɛɛkɩ kɛ́.

²⁷Tɔʋ, ɩ́ kɔnɑ mɑ kolontunɑɑ mpɑ pɑ kisɑɑ sɩ mɑ́ tɑɑ tɔɣɔ pɑ tɔɔ kɛ́ kɑwulɑɣɑ tɔɣɔ cǝnɛ, nɑ ɩ́ kʋ-wɛɣɛ mɑ ɩsɛntɑɑ.

²⁸Yesu tɛmɑ ḿpʋ́ɣʋ́ yɔɣɔtʋɣʋ, ɩlɛnɑ ɩ́ tɛɛ nɔɣɔ nɑ ɩ́ pukinɑ Yosɑlɛm.

²⁹Pɑ kɔmɑ pɑ kpɛɣɛtǝnɑ Petɑfɑsɩ nɑ Petɑnii nɑ Olifinɑɑ pʋɣʋ, ɩlɛnɑ ɩ́ tili ɩ ɩfɑlɑɑ tɑɑ nɑɑlɛ sɩ:

³⁰Ɩ́ polo ɩcɑtɛ nte tǝ wɛ nɔɣɔ tɔɔ cǝnɛ tɔ. Ɩ́ tɑlɑɑ, ɩ́ kɑ́ mɑɣɑnɑ pɑ tʋ kpɑŋɑɣɑ pile nɑtǝlǝɣɩ ŋmǝnɑɣɑ. Nɔɣɔlʋ tɑ cɑɣɑtɑ tǝ tɔɔ. Ɩ́ hɛtɩ-tɛ nɑ ɩ́ kɔnɑ.

³¹Nɔɣɔlʋ ɩ́ pɔɔsɑ-mɛ sɩ: Ɩ́ hɛtǝɣɩ-tɛ suwe? Ɩ́ cɔ pʋntʋ sɩ: Tɑcɑɑ cɑɑkǝnɑ.

³²Ḿpʋ́ɣʋ́ mpɑ ɩ tilɑɑ tɔ pɑ tɛɛwɑ, nɑ pɑ́ mɑɣɑnɑ pǝ tǝnɑɣɑ teitei ɩsɩɩ Yesu kɑ tɛm-wɛɣɛ heeluɣu tɔ.